ឈប់សម្រាកប្រាំថ្ងៃនៅប្រទេសថៃដោយហេតុតែគ្រោះមហន្តរាយទឹកជំនន់
អាជ្ញាធរថៃបានប្រកាសនៅថ្ងៃអង្គារម្សិលមិញឲ្យឈប់សម្រាកប្រាំថ្ងៃ ដើម្បីទុកពេលឲ្យប្រជាជននៅទីក្រុងបាងកកនិងនៅម្ភៃប្លាយខេត្តរៀបចំធ្វើការទប់ទល់នឹងគ្រោះទឹកជំនន់ដ៏សែនធ្ងន់ធ្ងរពុំដែលកើតមាននារយៈកន្លះសតវត្សរ៍ចុងក្រោយនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥២
រដ្ឋាភិបាលរបស់លោកស្រីយីងឡាក់ស៊ីណាវ៉ាត្រាដែលកំពុងប្រឈមមុខប្រយុទ្ធទល់នឹងគ្រោះទឹកជំនន់ដ៏សែនធ្ងន់ធ្ងរពុំដែលកើតមានចាប់តាំងពីលោកស្រីបានឡើងមកកាន់កាប់អំណាចកាលពី២ខែមុន បានប្រកាសឲ្យមានការឈប់សម្រាកចំនួនប្រាំថ្ងៃចាប់តាំងពីថ្ងៃព្រហស្បតិ៍ទី២៧ដល់ថ្ងៃចន្ទទី៣១តុលាឆ្នាំ២០១១ ដើម្បីទុកពេលឲ្យប្រជាពលរដ្ឋធ្វើការប្រយុទ្ធទប់ទល់នឹងគ្រោះទឹកជំនន់។
គេបានប្រមាណថា នឹងមានទឹកជោរជន់ខ្លាំងនៅចុងសប្តាហ៍នេះ អាចបង្កឲ្យមានបញ្ហាដល់ការបង្វែរបង្ហូរទឹកឲ្យធ្លាក់ទៅក្នុងឈូងសមុទ្រថៃ ហើយអាចធ្វើឲ្យរមណីយដ្ឋានមួយចំនួននៅទីក្រុងបាងកកស្គាល់ការលិចលង់ផង។
គួរកត់សម្គាល់ថា យ៉ាងតិចមានទឹកប្រមាណ៨លានម៉ែត្រគុបបានត្រូវគេបង្វៀងបង្ហូរចេញ។ ក៏ប៉ុន្តែ បេះដូងនៃទីក្រុងបាងកកដែលជាដង្ហើមនៃសេដ្ឋកិច្ចថៃ នៅតែឋិតនៅក្រោមការគំរាមនៃគ្រោះទឹកជំនន់ ដោយហេតុតែកម្ពស់នៃទឹកទន្លេ Chao Phraya បានកើនឡើងដល់កម្រិតកំពូល ហើយនិងមានទឹកភ្លៀងអាចធ្លាក់យ៉ាងខ្លាំងបន្ថែមទៀត ដែលជាមូលហេតុធ្វើឲ្យគ្រោះទឹកជំនន់រីករាលដាលកាន់តែខ្លាំងឡើងៗ។
អាជ្ញាធរថៃបានជម្លៀសប្រជាជននៃទីក្រុងបាងកកមួយចំនួនដែលបានរត់ទៅរកជម្រកនៅព្រលានយន្តហោះដែលឋិតនៅប៉ែកខាងជើងនៃរាជធានី យកទៅដាក់នៅខេត្ត Chon Buri ។
នៅលើវិស័យដឹកជញ្ជូនវិញ ក្រុមហ៊ុនអាកាសចរណ៍ថៃ Nok Air បានប្រកាសផ្អាកការហោះហើរចេញពីអាកាសយានដ្ឋាន Don Muang រហូតដល់ថ្ងៃទី១វិច្ឆិកាឆ្នាំ២០១១ខាងមុខ។
សូមបញ្ជាក់ថា គ្រោះមហន្តរាយទឹកជំនន់លើកនេះបានបណ្តាលឲ្យរោងចក្រថៃជាច្រើនបិទទ្វារជាបណ្តោះអាសន្ន ហើយបានធ្វើឲ្យខូចខាតអស់ប្រមាណ៣,២ពាន់លានដុល្លារអាមេរិក។ ហេតុដូច្នេះហើយបានជារដ្ឋាភិបាលថៃបានប្រកាសនៅថ្ងៃអង្គារម្សិលមិញថា នឹងមាន “ផែនការជំនួយសាងសង់ស្ថាបនាឡើងវិញ” ដែលមានចំនួនទឹកប្រាក់១០,៦ពាន់លានដុល្លារសម្រាប់ជួយដល់សហគ្រាសថៃខ្នាតតូចនិងមធ្យម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ