ប៉េកាំងរំលោភជាញឹកញយទៅលើការហាមឃាត់របស់ អ.ស.ប. ពាក់ព័ន្ធនឹងកូរ៉េខាងជើង
ចុះផ្សាយនៅថ្ងៃ៖
ស្តាប់ - ០៣:៥៦
របាយការណ៍មួយរបស់អង្គការសហប្រជាជាតិបានចោទប្រទេសចិនថា បានរំលោភជារឿយៗទៅលើការហាមឃាត់ពុំឲ្យនាំសព្វាវុធនិងគ្រឿងប្រណិតចូលប្រទេសកូរ៉េខាងជើង។ នេះបើយោងតាមសារព័ត៌មានជប៉ុន Asahi Shimbun ដែលបានចេញផ្សាយនៅថ្ងៃសុក្រទី២២មិថុនានេះ។
បើយោងតាមអ្នកជំនាញការរបស់អង្គការសហប្រជាជាតិ ប្រទេសចិនបានរំលោភដល់ទៅ២១ដងក្នុងរយៈពេលពីរឆ្នាំកន្លះ ទៅលើសេចក្តីសម្រេចចិត្តរបស់ក្រុមប្រឹក្សាសន្តិសុខនៃអ.ស.ប. ពាក់ព័ន្ធនឹងកូរ៉េខាងជើង ពីចន្លោះឆ្នាំ២០០៦ និងឆ្នាំ២០០៩។ របាយការណ៍នេះនឹងត្រូវគេផ្សាយឲ្យដឹងជាសាធារណៈនៅសប្តាហ៍ក្រោយ។
ជារឿយៗកំពង់ផែចិនបានត្រូវយកមកប្រើធ្វើជាទីកន្លែងសម្រាប់សំចត ដោយសហគ្រាសចិនដែលដើរតួនាទីជាអ្នកកណ្តាលក្នុងសកម្មភាពទាំងនេះ។ ក្នុងចំណោមការរំលោភ២១លើករបស់ប្រទេសចិន មានពីរលើកពាក់ព័ន្ធនឹងការនាំចេញចូលនូវគ្រឿងសម្ភារៈសម្រាប់យកទៅប្រើនៅក្នុងការផលិតអាវុធប្រល័យលោក ឬ កាំជ្រួចមីស្ស៊ីលអន្តរទ្វីប។
យោងតាមសារព័ត៌មានជប៉ុនអាសាហ៊ីស្ហ៊ីងប៊ុង ការរំលោភរបស់ទីក្រុងប៉េកាំង ទៅលើសេចក្តីសម្រេចចិត្តរបស់ក្រុមប្រឹក្សាសន្តិសុខនៃអ.ស.ប. ពាក់ព័ន្ធនឹងកូរ៉េខាងជើង មានដូចជាការបញ្ជូនដោយទីក្រុងព្យុងយ៉ាងទៅប្រទេសស៊ីរី ដោយឆ្លងកាត់តាមកំពង់ផែចិន Dalien នូវគ្រឿងឧបករណ៍អេឡេត្រូនិកសម្រាប់ផលិតកាំជ្រួចមីស្ស៊ីល។
គួរកត់សម្គាល់ថា នៅឆ្នាំ២០១០តៃវ៉ាន់ធ្លាប់បានបញ្ជូនទៅប្រទេសកូរ៉េខាងជើងដោយឆ្លងកាត់តាមប្រទេសចិននូវគ្រឿងម៉ាស៊ីនឧបករណ៍សម្រាប់យកទៅប្រើនៅក្នុងវិស័យយោធា ហើយនៅមានការរំលោភ១៣លើកទៀតរបស់ប្រទេសចិន ពាក់ព័ន្ធការនាំផលិតផលប្រណិតចូលប្រទេសកូរ៉េខាងជើង។
សារព័ត៌មានជប៉ុនអាសាហ៊ីស្ហ៊ីងប៊ុន ធ្លាប់បានផ្សាយឲ្យដឹងម្តងរួចទៅហើយនៅដើមខែមិថុនាកន្លងទៅនេះថា ទីក្រុងប៉េកាំងបានបញ្ជូនទៅកូរ៉េខាងជើងនៅឆ្នាំ២០១១នូវយានយន្តសម្រាប់ប្រើបាញ់កាំជ្រួចមីស្ស៊ីលបួនគ្រឿង ធុនWS-51200 ដែលនាំចេញដោយក្រុមហ៊ុនសាធារណៈចិនឈ្មោះ China Aerospace Science and Technology Corp. ។ ប៉ុន្តែទីក្រុងប៉េកាំងបានបដិសេធការចោទប្រកាន់ទាំងនេះ។
សូមបញ្ជាក់ថា ក្រុមប្រឹក្សាសន្តិសុខនៃអ.ស.ប.បានអនុម័តសេចក្តីសម្រេចចិត្តដាក់ទណ្ឌកម្មទៅលើប្រទេសកូរ៉េខាងជើងពីរលើក ម្តងនៅឆ្នាំ២០០៦ ម្តងទៀតនៅឆ្នាំ២០០៩ ពោលគឺនៅក្រោយពេលដែលរបបកុម្មុយនិស្តនៃទីក្រុងព្យុងយ៉ាងធ្វើការសាកល្បងអាវុធនុយក្លេអ៊ែររបស់ខ្លួនម្តងៗ។ សេចក្តីសម្រេចចិត្តរបស់ក្រុមប្រឹក្សាសន្តិសុខនៃអ.ស.ប. លេខ១៧១៨និង១៨៧៤ ហាមឃាត់ពុំឲ្យនាំចូលប្រទេសកូរ៉េខាងជើងនូវ សព្វាវុធធុនធ្ងន់ ហើយនិងបច្ចេកវិទ្យាដែលអាចនាំឲ្យឈានទៅរកការផលិតអាវុធនុយក្លេអ៊ែរ។
ហើយទណ្ឌកម្មទាំងនោះបានត្រូវគេពង្រីកពង្រឹងបន្ថែមទៀត ក្រោយពីប្រទេសកូរ៉េខាងជើងបានបាញ់សាកល្បងដាក់ផ្កាយរណបរបស់ខ្លួនបញ្ចូលទៅក្នុងតារាវិថីនៅថ្ងៃទី១៣មេសា ដែលសហរដ្ឋអាមេរិកនិងសម្ព័ន្ធមិត្តចាត់ទុកថា ជាការបាញ់សាកល្បងកាំជ្រួចមីស្ស៊ីលអន្តរទ្វីបរបស់ទីក្រុងព្យុងយ៉ាង។ ក៏ប៉ុន្តែនៅខែមេសានោះ ក្រសួងការបរទេសអាមេរិកាំងបានទទួលការធានាអះអាងពីទីក្រុងប៉េកាំងថា ប្រទេសចិនគោរព សេចក្តីសម្រេចចិត្តរបស់ក្រុមប្រឹក្សាសន្តិសុខនៃអ.ស.បពាក់ព័ន្ធនឹងការហាមឃាត់ពុំឲ្យនាំចូលប្រទេសកូរ៉េខាងជើងនូវសព្វាវុធធុនធ្ងន់ ហើយនិងបច្ចេកវិទ្យាដែលអាចនាំឲ្យឈានទៅរកការផលិតអាវុធនុយក្លេអ៊ែរ។
សំណួរមួយបានលេចឡើងចោទសួរថា តើហេតុអ្វីបានជាប្រទេសចិនរំលោភទៅលើ សេចក្តីសម្រេចចិត្តរបស់ក្រុមប្រឹក្សាសន្តិសុខនៃអ.ស.ប. ហើយបែរជាទៅជួយប្រទេសកូរ៉េខាងជើងបែបនេះ?
ចម្លើយរបស់អ្នកវិភាគជាច្រើនយល់ឃើញថា ក្រៅពីមូលហេតុទីក្រុងព្យុងយ៉ាងជាសម្ព័ន្ធមិត្តចាស់របស់ខ្លួន ទីក្រុងប៉េកាំងចង់រក្សាស្ថានភាពនៅឧបទ្វីបកូរ៉េឲ្យនៅដដែល។ ទាំងនេះក៏ដោយហេតុថា បើស្ថានភាពនៅឧបទ្វីបកូរ៉េនៅដដែល នោះប្រទេសចិននឹងអាចបន្តមានសកម្មភាពអភិវឌ្ឍន៍សេដ្ឋកិច្ចរបស់ខ្លួនដែលកំពុងតែស្គាល់ការរីកចម្រើនដ៏ខ្លាំងក្លា ជាជាងងាកមកខ្វល់ខ្វាយពីបញ្ហាស្ថានភាពយុទ្ធសាស្ត្រដ៏វឹកវរនៅប៉ែកឦសាននៃប្រទេសរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ