ចិនក្តៅក្រហាយជាថ្មី បន្ទាប់ពីមន្រ្តីជប៉ុនចូលទៅគោរពវិញ្ញាណក្ខន្ធ នៅវិហារយ៉ាស៊ូគូនី
អនុរដ្ឋមន្រ្តីការបរទេសចិនបានកោះហៅឯកអគ្គរាជទូតជប៉ុន ឲ្យមកស្តាប់ការប្រឆាំងដាច់ខាតរបស់ចិន បន្ទាប់ពីរដ្ឋមន្រ្តីម្នាក់របស់រដ្ឋាភិបាលជប៉ុនបានចូលទៅគោរពវិញ្ញាណក្ខន្ធនៅវិហារយ៉ាស៊ូគូនី នៅព្រឹកថ្ងៃសុក្រនេះ។ កន្លងមក វត្តមានរបស់មន្រ្តីរដ្ឋាភិបាលជប៉ុន នៅវិហារយ៉ាស៊ូគូនីដ៏ចម្រូងចម្រាសតែងតែបង្កឲ្យមានការមិនសប្បាយចិត្តពីប្រទេសចិន និងកូរ៉េដែលធ្លាប់រងគ្រោះដោយសារអាណានិគមនិយមកងទ័ពជប៉ុន ក្នុងសង្រ្គាមលោកលើកទីពីរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៣
នៅព្រលឹមស្រាងៗថ្ងៃសុក្រនេះ លោកយូស្ហីតាកា ស្ហីនដូ រដ្ឋមន្រ្តីកិច្ចការផ្ទៃក្នុង និងទំនាក់ទំនងរបស់រដ្ឋាភិបាលលោកអាបេមិនមែនធ្វើដំណើរតែម្នាក់ទៅគោរពវិញ្ញាណក្ខន្ធ នៅវិហារយ៉ាស៊ូគូនីទេ។ តាមតួលេខផ្តល់ដោយវិហារយ៉ាស៊ូគូនី សមាជិកដែលមាននិន្នាការអភិរក្សនិយម និងមកពីគណបក្សកាន់អំណាច ប្រមាណ១៦០ផ្សេងទៀត បានធ្វើដំណើរ ទៅគោរពវិញ្ញាណក្ខន្ធ នៅវិហារយ៉ាស៊ូគូនី។
នៅប៉ុន្មានម៉ោងក្រោយព្រឹត្តិការណ៍នេះ ទីក្រុងប៉េកាំងបានសំដែងការមិនសប្បាយចិត្ត និងប្រឆាំងនឹងទស្សនកិច្ចរបស់មន្រ្តីជាន់ខ្ពស់ជប៉ុននៅវិហារយ៉ាស៊ូគូនី។ តាមអ្នកនាំពាក្យរបស់ក្រសួងការបរទេសចិន ការចូលទៅគោរពវិញ្ញាណក្ខន្ធនៅវិហារយ៉ាស៊ូគូនី គឺជាការបង្ហាញឲ្យឃើញថា តូក្យូមានចេតនាចង់លាងសម្អាតខ្លួនពីប្រវត្តិឈ្លានពានរបស់យោធាជប៉ុន និងចង់កែប្រែមេរៀនប្រវត្តិសាស្រ្តស្តីពីសង្រ្គាមលោកលើកទីពីរ។
វិហារយ៉ាស៊ូគូនី ជាវិមានកប់សពទាហានជប៉ុនប្រមាណ ២លាន ៥សែន នាក់ ដែលគេចាត់ទុកថា ជាអ្នកដែលបានបូជាជីវិត ដើម្បីបុព្វហេតុប្រទេសជាតិ។ នៅឆ្នាំ ១៩៧៨ សពរបស់អតីតមេដឹកនាំជាន់ខ្ពស់ជប៉ុន១៤ នាក់ ដែលត្រូវបានតុលាការអន្តរជាតិកាត់ទោសក្នុងបទឧក្រិដ្ឋកម្មសង្រ្គាម ក្រោយសង្រ្គាមលោកលើកទីពីរ ក៏ត្រូវគេកប់នៅវិហារយ៉ាស៊ូគូនីដែរ។ ដូច្នេះ ចាប់តាំងពីពេលនោះមក ការទៅគោរពវិញ្ញាណក្ខន្ធរបស់មន្រ្តីជាន់ខ្ពស់ជប៉ុន នៅវិហារយ៉ាស៊ូគូនីតែងតែបង្កឲ្យមានការប្រឆាំង និងថ្កោលទោសជានិច្ចពីសំណាក់ប្រទេសចិន និងកូរ៉េខាងត្បូង។
លោកយូស្ហីតាកា ស្ហីនដូ រដ្ឋមន្រ្តីកិច្ចការផ្ទៃក្នុង ដែលចូលទៅវិហារយ៉ាស៊ូគូនីអះអាងថា លោកទៅទីនោះ ក្នុងនាមបុគ្គល គឺដើម្បីទៅគោរពវិញ្ញាណក្ខន្ធជីតារបស់លោកដែលឈ្មោះរបស់គាត់មានឆ្លាក់នៅក្នុងវិហារយ៉ាស៊ូគូនីនោះដែរ។ ដូច្នេះ លោកស្ហីនដូមិនបានគិតថា រឿងនេះនឹងបង្កឲ្យមានភាពល្អក់កករក្នុងទំនាក់ទំនងការទូតជាមួយប្រទេសជិតខាងទេ។
សូមបញ្ជាក់ថា បើទោះបីជាមានការប្រឆាំងពីប្រទេសចិន និងកូរ៉េ មន្រ្តីជាន់ខ្ពស់របស់រដ្ឋាភិបាល និងសភាជប៉ុនឧស្សាហ៍ទៅគោរពវិញ្ញាណក្ខន្ធសព នៅវិហារយ៉ាស៊ូគូនី នៅអំឡុងពិធីបុណ្យសរទរដូវ (រដូវលំហើយ)ប្រចាំឆ្នាំ។ លោកនាយករដ្ឋមន្រ្តីជប៉ុន ស្ហីនហ្សូ អាបេវិញ បើទោះបីជាមិនបានទៅវិហារយ៉ាស៊ូគូនីដោយផ្ទាល់ ប៉ុន្តែ កាលពីថ្ងៃព្រហស្បតិ៍ម្សិលមិញ លោកបានផ្ញើដង្វាយ ទៅវិហារយ៉ាស៊ូគីនី ក្នុងឱកាសពិធីបុណ្យសរទរដូវ ដែលត្រូវបញ្ចប់ នៅថ្ងៃអាទិត្យចុងសប្តាហ៍នេះ។ ចាប់តាំង ពីលោកបានបានឡើងធ្វើជានាយករដ្ឋមន្រ្តីជប៉ុន នេះជាលើកទីបីហើយ ដែលលោកអាបេបានផ្ញើអំណោយ ក្នុងនាមបុគ្គល ទៅវិហារយ៉ាស៊ូគីនី។ ចិន និងកូរ៉េខាងត្បូងបានរិះគន់ឥរិយាបទរបស់លោកអាបេ កាលពីថ្ងៃព្រហស្បតិ៍ ក្នុងពេលដែលទីក្រុងប៉េកាំងបានប្រាប់លោកនាយករដ្ឋមន្រ្តីជប៉ុនកុំឲ្យធ្វើដំណើរទៅគោរពសព នៅវិហារយ៉ាស៊ូគូនី ដើម្បីជាការគោរពដល់ចិន និងប្រទេសផ្សេងទៀត ដែលធ្លាប់រងគ្រោះដោយយោធាជប៉ុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ