អ.ស.ប៖ការប្រើប្រាស់ថ្នាំញៀនមេតំហ្វេតាមីនផ្ទុះឡើងខ្លាំង នៅអាស៊ី
អង្គការសហប្រជាជាតិបានទាញសញ្ញាប្រកាសអាសន្នស្តីពីការកើនឡើងនៃការប្រើប្រាស់ថ្នាំញៀន ប្រភេទមេតំហ្វេតាមីន នៅអាស៊ី។ តាមរបាយការណ៍ប្រចាំឆ្នាំ ដែលត្រូវគេបង្ហាញឲ្យដឹង នៅថ្ងៃសុក្រនេះ នៅក្នុងទីក្រុងបាងកក ថ្នាំញៀនសំយោគ ភាគច្រើនមានប្រភពចេញមកពីប្រទេសភូមា។
ចុះផ្សាយនៅថ្ងៃ៖
ស្តាប់ - ០២:១៣
ការិយាល័យប្រយុទ្ធប្រឆាំងនឹងថ្នាំញៀនរបស់អង្គការសហប្រជាជាតិទាញសញ្ញាប្រកាសអាសន្ន បន្ទាប់ពីចំនួនថ្នាំញៀនមេតំហ្វេតាមីនដែលគេចាប់បាន នៅក្នុងឆ្នាំ ២០១២កន្លងទៅមានប្រមាណ ២២៧លានគ្រាប់ គឺកើនឡើង ដល់ជាងពាក់កណ្តាលនៃចំនួនថ្នាំញៀនដែលគេឃាត់ ចាប់បាន កាលពីឆ្នាំ២០១១។ តាមរបាយការណ៍ ចំនួនថ្នាំញៀនសំយោគនឹងនៅបន្តកើនឡើង នៅឆ្នាំ ២០១៣នេះ។
លោកShawn Kelly អ្នកវិភាគរបស់អង្គការសហប្រជាជាតិ បានពន្យល់ថា ចំនួនថ្នាំញៀនសំយោគ ដែលគេចាប់បាន មានការកើនឡើង អាស្រ័យដោយមូលហេតុមួយចំនួន ដូចជា ការកើនឡើងនៃប្រតិបត្តិការរបស់អាជ្ញាធរដើម្បីចុះចាប់ថ្នាំញៀន ការហូរចូលនៃថ្នាំញៀនមកពីតំបន់ដទៃ ចូលមកអាស៊ី និងការកើនឡើងយ៉ាងខ្លាំងនៃការផលិតថ្នាំញៀនមេតំហ្វេតាមីន នៅក្នុងប្រទេសភូមា។
តាមរបាយការណ៍របស់អង្គការសហប្រជាជាតិ ប្រទេសដែលគេចាប់ថ្នាំញៀនច្រើនជាងគេ គឺចិន ដែលមានជាង ១០២លានគ្រាប់ បន្ទាប់មកគឺថៃ ដែលថ្នាំញៀនជាង៩៥លានគ្រាប់ត្រូវគេចាប់បានពីការជួញដូរថ្នាំញៀន។ ពោលគឺ ថ្នាំញៀនដែលគេចាប់បាន នៅចិន ថៃ ភូមា និងឡាវ តំណាងឲ្យដល់ទៅ ៩៩ភាគរយ នៃថ្នាំញៀនសរុប ដែលគេចាប់បាន នៅអាស៊ី។
ថ្នាំញៀនសំយោគដែលមានតម្លៃប្រែប្រួលទៅតាមប្រទេស គឺតម្លៃ៣ដុល្លារ នៅឡាវ និងថ្លៃរហូតដល់២០ដុល្លារក្នុងមួយគ្រាប់ នៅសិង្ហបុរី ត្រូវគេចូលចិត្តប្រើច្រើន នៅតាមផ្លូវ និងរង្គសាលនៅបណ្តាប្រទេសអាស៊ីខាងកើត និងអាស៊ីអាគ្នេយ៍។ មិនថា នៅចិន ឬនៅថៃ ថ្នាំញៀនដែលគេចាប់បាន សុទ្ធតែមានប្រភពនាំចូលពីប្រទេសភូមា។ ភូមាដែលត្រូវបានអង្គការសហប្រជាជាតិចាត់ទុកជាប្រទេសផលិតអាភៀនធំទីពីរនៅលើពិភពលោក បន្ទាប់ពីអាហ្វហ្កានីស្ថាន។
អ្នកជំនាញខាងថ្នាំញៀននៅអាស៊ីបានវាយតម្លៃថា នៅមុនការរំលាយរបបសឹកភូមា ឆ្នាំ ២០១១ ការផលិតថ្នាំញៀនបានកើនឡើងខ្លាំង នៅភូមា ដោយសារក្រុមឧទ្ទាមបានសម្រុកលួចផលិតវា ដើម្បីលក់យកលុយទៅទិញអាវុធ។ រហូតមកដល់បច្ចុប្បន្ននេះ បើទោះបីជាមានការចរចាសន្តិភាពរវាងក្រុមឧទ្ទាម និងរដ្ឋាភិបាលស៊ីវិលភូមាថ្មី ការផលិតថ្នាំញៀន សំយោគ នៅតែមាន ជាពិសេស នៅកន្លែងដាច់ស្រយាល ក្នុងរដ្ឋស្ហាន ក្នុងប្រទេសភូមា ដែលកន្លែងផលិតថ្នាំញៀនត្រូវបានគេរកឃើញថា បានដំណើរការផលិតក្នុងទម្រង់ជារោងចក្រឧស្សាហកម្ម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ