បារាំងបញ្ចុះបញ្ចូលជប៉ុនឱ្យជួយប្រយុទ្ធប្រឆាំងភេរវកម្ម
រដ្ឋមន្ត្រីក្រសួងសេដ្ឋកិច្ច ហិរញ្ញវត្ថុ និងឧស្សាហកម្ម បារាំង លោក មីស្ហែល សាប៉ាំង (Michel Sapin) បានទទូចនៅថ្ងៃចន្ទទី ១៩មករា នេះ សុំឱ្យតូក្យូគិតគូរពីភាពចាំបាច់ នៃការធ្វើកិច្ចសហប្រតិបត្តិការ ដើម្បីប្រយុទ្ធប្រឆាំងនឹងការផ្តល់ហិរញ្ញវត្ថុភេរវកម្មអន្តរជាតិ។ ថ្វីបើមានឆន្ទៈគ្រប់គ្រាន់មែន ប៉ុន្តែជប៉ុនត្រូវការប្រឹងប្រែងខ្លាំង ក្នុងវិស័យប្រយុទ្ធប្រឆាំងភេរវកម្មនេះ។
ចុះផ្សាយនៅថ្ងៃ៖
ស្តាប់ - ០១:៤២
គ្រោះរងភេរវកម្មលើទឹកដីជប៉ុនមានតិចតួចណាស់ ប៉ុន្តែអ្វីដែលគ្មានព្រំដែន ដែលមានចរាចរណ៍ពេញពិភពលោក គឺចរន្តប្រាក់។ ភេរវកម្មតាមផ្លូវហិរញ្ញវត្ថុអាចមានគ្រប់ពេលវេលា។ គឺក្នុងអត្ថន័យនេះហើយដែលរដ្ឋមន្ត្រីក្រសួងហិរញ្ញវត្ថុបារាំង បានពន្យល់ប្រាប់សមភាគីជប៉ុន នៅទីក្រុងតូក្យូថា ត្រូវធ្វើគ្រប់យ៉ាងដើម្បីប្រយុទ្ធប្រឆាំងភេរវកម្មអន្តរជាតិ ជាពិសេសប្រឆាំងនឹងហិរញ្ញវត្ថុដែលយកទៅបម្រើប្រយោជន៍ភេរវជន។
នេះមិនមែនជាលើកទីមួយដែលបារាំង បានលើកយ៉ាងទទូចអំពីការប្រយុទ្ធប្រឆាំងនឹងភេរវកម្មតាមផ្លូវហិរញ្ញវត្ថុ ព្រោះបើប្រទេសមានហិរញ្ញវត្ថុកាន់តែសំខាន់ កាន់តែមានចលនា នោះដំណើរផ្ទេរប្រាក់របស់ភេរវជនឆ្លងកាត់ក៏កាន់តែអាចមានច្រើន។ ប្រាក់អាចធ្វើចរាចរណ៍បានលឿន និងងាយស្រួលជាងមនុស្សឆ្ងាយណាស់។ មិនបង្កគ្រោះភ័យដល់បុគ្គលណាមែន ប៉ុន្តែគ្រោះថ្នាក់អាចមានធំទៅថ្ងៃក្រោយ ព្រោះគេមិនអាចមើលដឹងថាមានអ្វីលាក់នៅពីក្រោយប្រព័ន្ធអេក្រង់បានទេ។
ហេតុដូច្នេះហើយបានជាជប៉ុន ត្រៀមជាស្រេចនឹងធ្វើកិច្ចសហប្រតិបត្តិការជាមួយបារាំង ប៉ុន្តែជប៉ុនត្រូវការពេលវេលា និងផ្លូវដើរវែងឆ្ងាយទៀត ព្រោះជប៉ុនមានទីផ្សារហិរញ្ញវត្ថុពិសេសជាលក្ខណៈរបស់ជប៉ុន។ ចំណោទហិរញ្ញវត្ថុភេរវនិយម មិនមែនជាប្រធានបទសម្រាប់ទ្វេភាគីឡើយ បញ្ហានេះនឹងត្រូវលើកទៅជជែកថ្នាក់អន្តរជាតិ នាឱកាសជំនួបកំពូលហ្សេ២០ នៅទីក្រុងអ៊ីស្តង់ប៊ូលលើកក្រោយផង។
ក្នុងរយៈពេលទស្សនកិច្ចបីថ្ងៃ ថ្វីបើប្រធានបទភេរវនិយមគ្របដណ្តប់ខ្លាំងមែន ប៉ុន្តែបារាំងនិង ជប៉ុន ក៏បានឆ្លៀតពិភាក្សាអំពីនយោបាយសេដ្ឋកិច្ច ដែលប្រទេសទាំងពីរមានឆន្ទៈដូចគ្នាគឺប្រយុទ្ធប្រឆាំងនឹងកំណើនសេដ្ឋកិច្ចតិចតួច អូសបន្លាយនិងអតិផរណាទាបជ្រុល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ