ប៉ូលិសថៃស្រាវចាប់បណ្តាញប្រឆាំងរាជានិយម
ប៉ូលិសថៃបានប្រកាសនៅថ្ងៃអង្គារទី ១០ កុម្ភៈនេះថា បានស្រាវជ្រាវចាប់បានបណ្តាញប្រឆាំងនឹងរាជានិយម ដែលបានផ្សព្វផ្សាយបង្ហោះឯកសារសំឡេង បរិហារគ្រួសាររាជវង្ស។ មេកើយដែលបានរត់គេចខ្លួនពីប៉ូលិសអស់ជាច្រើនថ្ងៃ ត្រូវចាប់ខ្លួនបាន នៅយប់ម្សិលមិញ និងត្រូវជាប់ចោទពីបទជេរប្រមាថព្រះមហាក្សត្រ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៣
ហាសាឌីន អ៊ុរ៉ៃប្រៃវ៉ាន់ Hasadin Uraipraiwan ដែលទំនងជាមេកើយបណ្តាញឈ្មោះថា បានប៉ូដ Banpodj ត្រូវបានប៉ូលិសថៃតាមចាប់ខ្លួនតាំងពីពីរសប្តាហ៍មកហើយ ដោយបានប្រកាសផ្តល់ប្រាក់រង្វាន់២០ម៉ឺនបាត ដល់អ្នកដែលឃាត់ខ្លួនជននេះបានផង។
ចាប់ខ្លួនបាននៅល្ងាចម្សិលមិញ នៅក្នុងសណ្ឋាគារមួយនាទីក្រុងបាងកក ហាសាឌីន ត្រូវបានជាប់ចោទពីបទប្រមាថរាជានិយម និងត្រូវបានឃុំឃាំងខ្លួនដោយយោធា។ មនុស្ស៦នាក់ផ្សេងទៀត ត្រូវបានចាប់ខ្លួនដែរ ក្នុងសំណុំរឿងតែមួយ គឺបណ្តាញបានប៉ូដ បានផ្សព្វផ្សាយឯកសារសំឡេង ជាថាសCD ជេរប្រមាថរាជវង្ស។
ជាប់ឈ្មោះជាមេខ្លោងដឹកនាំក្រុមប្រឆាំងនឹងរាជានិយម ប៉ុន្តែប៉ូលិសមិនបានរកឃើញមានការពាក់ព័ន្ធជាមួយក្រុមផ្សេងទៀតទេ។ ទំព័រសង្គមហ្វេសប៊ូករបស់ក្រុមនេះ មានអ្នកចូលមើលដល់ទៅ១០ម៉ឺននាក់។ ចំណែកឯសារព័ត៌មានក្នុងស្រុកវិញ បានភ្ជាប់ហាសាឌីន ទៅនឹងក្រុមអាវក្រហម ចលនាគាំទ្រលោកអតីតនាយករដ្ឋមន្ត្រីថៃ ថាក់ស៊ីន និងយីងឡាក់ ស៊ីណាវ៉ាត់។
សូមបញ្ជាក់ថាកាលពីសប្តាហ៍មុន សកម្មជនអាវក្រហមម្នាក់ ក៏ត្រូវបានប៉ូលិសចាប់ខ្លួននិងបញ្ជូនទៅតុលាការពីបទផ្សព្វផ្សាយព័ត៌មានមិនពិតទាក់ទងនឹងសុខភាពរបស់ព្រះមហាក្សត្រភូមិបុល។ ចលនាអាវក្រហមនេះ ក៏ធ្លាប់ជាប់សង្ស័យថា បានលួចដាក់គ្រាប់បែកនៅ មុខមជ្ឈមណ្ឌលពាណិជ្ជកម្មជាយទីក្រុងបាងកក កាលពីដើមខែ។ ប៉ុន្តែសម្រាប់ប្រមុខអាវក្រហម នេះជាការចោទប្រកាន់របស់រដ្ឋាភិបាលសឹក ដែលចង់បំបាក់ចលនារួមរួបដើម្បីលទ្ធិប្រជាធិបតេយ្យ ក្រោមផ្លាកការពាររាជានិយមតែប៉ុណ្ណោះ។
ប្រទេសថៃល្បីខាងមានច្បាប់ការពាររាជានិយម ដ៏តឹងតែងបំផុតនៅលើលោក សារព័ត៌មានជាតិនិងអន្តរជាតិ ត្រូវបង្ខំចិត្តហាមឃាត់ខ្លួនឯង រាល់ប្រធានបទទាក់ទងនឹងរាជានិយម ព្រោះសូម្បីតែ ការរាយការណ៍ដោយលម្អិតពីបទល្មើស ក៏អាចនឹងត្រូវជាប់ចោទថា រំលោភច្បាប់ជេរប្រមាថព្រះមហាក្សត្រដែរ។ បើតាមមាត្រា១១២ ការជេរប្រមាថព្រះ មហាក្សត្រ មហាក្សត្រីយានី ក្សត្រស្នងរាជ ត្រកូលរាជវង្សអាចនឹងជាប់ទោសក្នុងពន្ធនាគារដល់ទៅ១៥ឆ្នាំ។ ច្បាប់នេះកាន់តែតឹងតែង និងមានលក្ខណៈនយោបាយកាន់តែខ្លាំង ព្រមទាំងការចាប់ខ្លួនច្រើនឡើងៗ តាំងពីក្រុមយោធាឡើងកាន់អំណាច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ