ថៃបើកប្រតិបត្តិការសង្គ្រោះអន្តោប្រវេសន៍តាមទូក
អាជ្ញាធរថៃ បានប្រកាសនៅល្ងាចថ្ងៃចន្ទទី ២៥ ឧសភានេះ បញ្ចេញនាវាផ្ទុកឧទ្ធម្ភាគចក្រ ដើម្បីជួយស្រោចស្រង់ជីវិតជនអន្តោប្រវេសន៍តាមទូក ដែលកំពុងរសាត់ ក្នុងផ្ទៃសមុទ្ទអង់ដាម៉ង់។ បើតាមការប៉ាន់ស្មានរបស់អង្គការសហប្រជាជាតិ មានជនអន្តោប្រវេសន៍ជាច្រើនពាន់នាក់ កំពុងធ្វើដំណើររត់ភៀសខ្លួន តាមសមុទ្ទចេញពីប្រទេសបង់ក្លាដែស និងភូមា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៣
“ថៃបានប្រើមធ្យោបាយធំ ជាមូលដ្ឋានអណ្តែតទឹក មានគ្រូពេទ្យ ចាំជួយសង្គ្រោះជនភៀសខ្លួន រ៉ូហ៊ីងយ៉ា រត់តាមទូក” ! នេះបើតាមសេចក្តីប្រកាសរបស់លោកប្រាយុទ្ធចាន់អូចា នាយករដ្ឋមន្ត្រីនៃរបបសឹកថៃទៅកាន់អ្នកសារព័ត៌មាន ដោយបញ្ជាក់បន្ថែមទៀតថា នៅពេលនាវិកថៃប្រទះភ្នែកឃើញទូកជនភៀសខ្លួនហើយ ថៃនឹងសង្គ្រោះអ្នកដំណើរទាំងអស់នោះ ឱ្យឡើងលើនាវា មុននឹងបញ្ជូនទៅនាំទៅកាន់ជំរំភៀសខ្លួនបណ្តោះអាសន្ននៅម៉ាឡេស៊ី និងឥណ្ឌូណេស៊ី។ គ្មានជនភៀសខ្លួនណាម្នាក់ ត្រូវអនុញ្ញាតឱ្យស្នាក់នៅបណ្តោះអាសន្នលើទឹកដីថៃទេ លើកលែងតែអ្នកជំងឺ និងអ្នករបួស ត្រូវទទួលការព្យាបាល ក្នុងមន្ទីរពេទ្យថៃ។
ប្រតិបត្តិការសង្គ្រោះទ្រង់ទ្រាយធំនេះ ស្ថិតនៅក្រោមបញ្ជាការថៃទាំងស្រុង បើទោះបីជារដ្ឋាភិបាលសឹកព្រមបានបើកទ្វារទទួលស្វាគមន៍កិច្ចសហប្រតិបត្តិការជាមួយអាមេរិកយ៉ាងណាក៏ដោយ។ វ៉ាស៊ីនតោន ដែលមានទំនាក់ទំនងតានតឹងជាមួយថៃ គិតចាប់តាំងពីរដ្ឋប្រហារខែឧសភា២០១៤មក បានចូលជួយប្រទេសក្នុងតំបន់ ដោយបញ្ចេញយន្តហោះទៅត្រួតពិនិត្យដែនសមុទ្ទ អង់ដាម៉ង់ ដៅមើលទូកដឹកជនភៀសខ្លួន។ រដូវវស្សាម៉ូសុងកាន់តែខិតមកដល់ ជនអន្តោប្រវេសន៍រ៉ូហ៊ីងយ៉ានៅបង់ក្លាដែល ឬភូមា ប្រមាណជាងពីរពាន់នាក់ កំពុងបណ្តែតតាមទូកសំដៅម៉ាឡេស៊ី ឬឥណ្ឌូណេស៊ី។ នេះបើតាមការប៉ាន់ស្មានរបស់អង្គការសហប្រជាជាតិ។
នៅថ្ងៃសុក្រខាងមុខនេះ ថៃនឹងទទួលរៀបចំបើកជំនួបកំពូលតំបន់ ដើម្បីដោះស្រាយវិបត្តិអន្តោប្រវេសន៍តាមទូក ជាជនជាតិរ៉ូហ៊ីងយ៉ា កាន់សាសនាអ៊ីស្លាម ដែល រងគ្រោះជាងគេបំផុតមួយនៅលើលោក ភាគច្រើនរស់នៅក្នុងភូមា បានរត់គេចពីភាពក្រីក្រនៅបង់ក្លាដែល និងពីអំពើហិង្សាសហគមន៍នៅភូមាពីសំណាក់សហគមន៍ពុទ្ធសាសនា។ ការភៀសខ្លួនតាមទូកដែលបានក្លាយជាសោកនាដកម្ម ព្រោះដំបូងឡើងម៉ាឡេស៊ី ឬឥណ្ឌូណេស៊ី ព្រមទាំងថៃ ច្រានចេញដែនទឹកខ្លួនរៀងៗខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ