អន្តោប្រវេសន៍តាមទូក ៖ អាមេរិកអំពាវនាវឱ្យភូមាផ្តល់សញ្ជាតិដល់ជនជាតិរ៉ូហ៊ីងយ៉ា
នាឱកាសបំពេញទស្សនកិច្ច និងក្រោយពីបានជួបពិភាក្សាជាមួយប្រមុខដឹកនាំប្រទេសភូមា ថេន សេនរួច អនុរដ្ឋមន្ត្រីក្រសួងការបរទេសអាមេរិក លោក Antony Blinken បានអំពាវនាវឱ្យភូមាផ្តល់សញ្ជាតិដល់ក្រុមជនជាតិភាគតិច កាន់សាសនាអ៊ីស្លាម គ្មានទឹកដីរ៉ូហ៊ីងយ៉ា ដើម្បីបិទបញ្ចប់ចរន្តរត់អន្តោប្រវេសន៍តាមទូក ដ៏គ្រោះថ្នាក់។
ចុះផ្សាយនៅថ្ងៃ៖
ស្តាប់ - ០១:៥៤
ក្នុងពេលដែលឥណ្ឌូណេស៊ី កំពុងខ្នះខ្នែងផ្នែកការទូតជាមួយភូមា សហរដ្ឋអាមេរិកក៏មិននៅស្ងៀមដែរ។ លោក Antony Blinken អនុរដ្ឋមន្ត្រីក្រសួងការបរទេសអាមេរិក បានដឹកនាំប្រតិភូ ចូលជួបប្រធានាធិបតីភូមា លោក ថេនសេន នៅទីក្រុងណៃពិដោ។ នៅចំពោះមុខអ្នកកាសែត អាមេរិកបានជំរុញឱ្យអាជ្ញាធរភូមា គិតគូរផ្តល់សញ្ជាតិដល់ជនជាតិភាគតិចរ៉ូហ៊ីងយ៉ាង ព្រោះបើតាមលោកប្រមុខការទូត « គ្មានប្រទេស គ្មានចំណែកពាក់ព័ន្ធក្នុងបែបរដ្ឋបាលប្រទេស គឺជាប្រភពនៃភាពសង្ស័យ និងរុញច្រានមនុស្សឱ្យធ្វើអន្តោប្រវេសន៍ »។
ជាចម្លើយតប បើតាមអ្នកនាំពាក្យប្រធានាធិបតី ភូមាសន្យានឹងខិតខំធ្វើ ការពារជនជាតិភាគតិចកាន់សាសនាអ៊ីស្លាមរ៉ូហ៊ីងយ៉ា ដោយត្រូវធ្វើការផ្ទៀងផ្ទាត់សញ្ជាតិរបស់ជនអន្តោប្រវេសន៍ទាំងនេះថាតើត្រូវការជំនួយ ត្រូវការការពារ និងសញ្ជាតិភូមាឬអត់។ អាជ្ញាធរភូមានឹងជំនួយរួចរៀបចំការធ្វើមាតុភូមិនិវត្តន៍។
ជាការកត់សម្គាល់នៅថ្ងៃសុក្រនេះ អាជ្ញាធរភូមាបានជួយសង្គ្រោះជាលើកទីមួយ ទូកអន្តោប្រវេសន៍ ដែលមានផ្ទុកជនជាតិរ៉ូហ៊ីងយ៉ាជាង២០០នាក់។ បន្ទាប់ពីបានផ្តល់ការព្យាបាលចាំបាច់ និងចំណីអាហារហើយ ទាហានភូមាក៏បានសណ្តោងទូកអន្តោប្រវេសន៍នោះមកកាន់ជំរំបណ្តោះអាសន្នក្នុងទឹកដីភូមា ជាចំណុចចាប់ផ្តើមវិញ។
រ៉ូហ៊ីងយ៉ា ជាជនជាតិភាគតិច ដែលរងគ្រោះជាងគេនៅលើពិភពលោក បើតាមអង្គការសហប្រជាជាតិ។ ភាគច្រើនរស់នៅលើទឹកដីភូមា ប៉ុន្តែមិនត្រូវបានទទួលស្គាល់ជាពលរដ្ឋស្របច្បាប់ឡើយ។ ចរន្តភៀសខ្លួនមានជាច្រើនឆ្នាំហើយ ប៉ុន្តែសកម្មភាពនេះ ត្រូវបង្វែរទិសតាមសមុទ្ទ មានគ្រោះថ្នាក់ខ្លាំង បន្ទាប់ពីថៃបើកយុទ្ធនាការកម្ចាត់ឈ្មួញជួញអន្តោប្រវេសន៍ តាំងពីដើមខែឧសភាមក។ ក្នុងរយៈពេលតែពីរបីថ្ងៃ អន្តោប្រវេសន៍ប្រមាណបីពាន់នាក់ បានធ្វើដំណើរមកដល់ដែនឆ្នេរថៃ ម៉ាឡេស៊ី ឥណ្ឌូណេស៊ី តែត្រូវបានច្រានចេញទៅវិញ។ ទើបតែតាំងពីថ្ងៃពុធ ក្រោមសម្ពាធអន្តរជាតិប៉ុណ្ណោះដែលប្រទេសក្នុងតំបន់សង្គ្រោះអន្តោប្រវេសន៍តាមទូកបណ្តោះអាសន្ន រង់ចាំការបញ្ជូនទៅកាន់ប្រទេសទីបី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ