ជប៉ុនសន្យាកាត់បន្ថយឧស្ម័នផ្ទះកញ្ចក់ឱ្យបាន២៦% នៅឆ្នាំ២០៣០
ជប៉ុន ប្រទេសបញ្ចេញឧស្ម័នផ្ទះកញ្ចក់លំដាប់លេខ៦នៅលើពិភពលោក បានបញ្ជូនឯកសារសន្យាកាត់បន្ថយផ្សែងពុល២៦% ពីពេលនេះដល់ឆ្នាំ២០៣០ ដើម្បីចូលរួមចំណែកប្រយុទ្ធប្រឆាំងនឹងការឡើងកំដៅនៃភពផែនដី។ ប៉ុន្តែកម្មវត្ថុរបស់ជប៉ុននេះ ត្រូវបានក្រុមអ្នកឯកទេសក្នុងប្រទេសនិងអ្នកបរិស្ថាន យល់ថាមិនគ្រប់គ្រាន់ឡើយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៧:១៨
ដើម្បីសម្រេចកម្មវត្ថុ កាត់បន្ថយឧស្ម័នផ្ទះកញ្ចក់ ឱ្យបានមួយភាគបួន នៅឆ្នាំ២០៣០ ជប៉ុននឹងងាកទៅរកប្រើថាមពលនុយក្លេអ៊ែរ ថាមពលដ៏អប្រជាប្រិយ និងដែលលែងប្រើតាំងពីមហន្តរាយនៅហ្វូគុស្ហ៊ីម៉ាមក សម្រាប់ផលិតអគ្គីសនីប្រើប្រាស់ ក្នុងទំហំប្រមាណពី ២០ទៅ២២%។ ជប៉ុនក៏នឹងបង្កើនការប្រើប្រាស់ថាមពលមិនចេះរីងស្ងួត ឱ្យបានឡើងទ្វេដង ពោលគឺឱ្យឡើងដល់២២ ទៅ ២៤% នៅឆ្នាំ២០៣០ ទល់នឹង១១%នៅឆ្នាំ២០១៤។ នេះជាអ្វីដែលគេមានសរសេរនៅក្នុងកិច្ចសន្យាដាក់ជូនទៅអង្គការសហប្រជាជាតិ នៅថ្ងៃសៅរ៍ទី ១៨កក្កដា២០១៥នេះ ក្នុងក្របខ័ណ្ឌនៃការប្រយុទ្ធប្រឆាំងនឹងការឡើងកម្តៅនៃភពផែនដី។
ប៉ុន្តែសម្រាប់អ្នកបរិស្ថាន កិច្ចសន្យារបស់ជប៉ុនមានលក្ខណៈខ្សោយខ្លាំងណាស់ បើប្រៀបធៀបទៅនឹងសន្ទុះសំដី របស់រដ្ឋាភិបាល និងបើប្រៀបទៅនឹងបណ្តាប្រទេសឧស្សាហកម្មផ្សេងទៀត។ ក្រុមអ្នកឯកទេស យល់ថាមិនគ្រប់គ្រាន់ ព្រោះ ជប៉ុនបានកំណត់កម្មវត្ថុដោយយកឆ្នាំ២០១៣ជាគោល ដូច្នេះប្រសិនបើគណនាឡើងវិញ នោះតម្លៃសន្យាបញ្ចុះឧស្ម័នផ្ទះកញ្ចក់២៦%របស់រដ្ឋាភិបាល នឹងធ្លាក់មកត្រឹមតែ១៨%ប៉ុណ្ណោះបើប្រៀបទៅនឹងឆ្នាំ១៩៩០។ សូមបញ្ជាក់ថា ក្រោយគ្រោះមហន្តរាយនុយក្លេអ៊ែរនៅហ្វូគូស្ហ៊ីម៉ាឆ្នាំ២០១១មក ជប៉ុនបានបញ្ឈប់សកម្មភាពនុយក្លេអ៊ែរ ហើយងាកទៅរកប្រើប្រាស់មជ្ឈមណ្ឌលធ្យូងថ្មវិញ។ ថាមពលធ្យូងថ្មដែលបំពុលបរិយាកាស និងបញ្ចេញឧស្ម័នផ្ទះកញ្ចក់ខ្លាំងបំផុត។
ដូច្នេះ២៦%ដែលរដ្ឋាភិបាលកំណត់ គឺមានន័យថារដ្ឋាភិបាលមិនបានធ្វើប្រឹងប្រែងបញ្ចេញសកម្មភាពឬចាត់វិធានការថ្មីអ្វី សក្តិសមជាមហាអំណាចឧស្សាហកម្មសោះ។ ព្រោះសូមកុំភ្លេចថា ក្នុងក្របខ័ណ្ឌនៃការប្រយុទ្ធប្រឆាំងនឹងការឡើងកំដៅនៃភពផែនដី គ្រប់អ្នកឯកទេសនាំគ្នាសំឡឹងសំលក់រង់ចាំសកម្មភាពខ្លាំងពីក្រុមប្រទេសដែលបញ្ចេញផ្សេងពុលខ្លាំងជាងគេ ដូចយ៉ាងចិន សហរដ្ឋអាមេរិក ក្នុងនោះក៏មានជប៉ុនមួយដែរ។
៤៧ប្រទេសបានកំណត់រួចកម្មវត្ថុនៃការកាត់បន្ថយឧស្ម័នផ្ទះកញ្ចក់
ពេលវេលា គឺកាន់តែខោចខ្លាំង! កិច្ចប្រជុំក្រៅផ្លូវការ ជាក្រុមតូច ក្រុមធំ ក្រុមអ្នកជំនាញ បានរៀបចំឡើងជាបន្តបន្ទាប់ ក្នុងកម្មវត្ថុដាស់តឿនឱ្យប្រទេសជាសមាជិករួសរាន់បញ្ចេញសកម្មភាព បង្ហាញផែនការរបស់ខ្លួនរៀងខ្លួនៗ។ ជាក់ស្តែង នៅថ្ងៃចន្ទនិងអង្គារខានស្អែក នេះ ក្រុមប្រទេសចំនួន៤៥ប្រទេសនឹងត្រូវជួបពិភាក្សាគ្នានៅទីក្រុងប៉ារីស ដើម្បីចាប់ផ្តើមចរចា ពីជំហរនិងចំណុច ផ្ទុយគ្នាពីប្រទេសទៅប្រទេសមួយ និងជាឱកាសដាស់តឿនឱ្យគ្រប់ប្រទេសបង្ហាញកិច្ចសន្យារបស់ខ្លួន។ ជាធម្មតា រដ្ឋជាសមាជិកអង្គការសហប្រជាជាតិទាំងអស់ ត្រូវប្រគល់កិច្ចសន្យារបស់ខ្លួនឱ្យបានយ៉ាងយូរត្រឹមថ្ងៃទី ៣១តុលា ២០១៥។
រហូតមកទល់នឹងដំណាក់កាលនេះ មានប្រទេសតែប្រមាណ៤៧ប៉ុណ្ណោះ ដែលបានបោះផ្សាយកម្មវត្ថុជាតិកាត់បន្ថយឧស្ម័នផ្ទះកញ្ចក់។ ជប៉ុនជាប្រទេសទី ១៩។ សហភាពអឺរ៉ុបទាំង២៨ប្រទេសជាអ្នកនាំមុខគេ សន្យាកាត់បន្ថយ៤០%។ ចិនទើបបានប្រកាសសន្យារួចហើយ កាលពីថ្ងៃទី ៣០ មិថុនា ថានឹងកាត់បន្ថយឧស្ម័នពុលចាប់ពីឆ្នាំ២០៣០ទៅ។ សហរដ្ឋអាមរិក ពី២៦% ទៅ ២៨%ដែរ។ ជាសរុប បើគេបូកបញ្ចូលកិច្ចសន្យាដែលបានទទួល នៅពេលនេះ ពិភពលោកអាចកាត់បន្ថយការបញ្ចេញផ្សេងពុលបាន៥៨% នៃផ្សែងពុលពិភពលោក ដែលបញ្ចេញខ្លាំងដោយចិន (២៣,២%) អាមេរិក (១២,៦%) រុស្ស៊ី (៤,៦%) ជប៉ុន (២,៦%) និងឥណ្ឌា (៦,៣%) តែមិនឃើញមានផ្តល់កិច្ចសន្យាអ្វីសោះ។
ប៉ុន្តែនៅមុនសន្និសីទអន្តរជាតិដូច្នេះ គេពិបាកនឹងធ្វើការប្រៀបធៀប ថាប្រទេសណាមានកម្មវត្ថុល្អជាងប្រទេសណាណាស់ ព្រោះថា រដ្ឋនីមួយៗបានលើកសំណើបង្ហាញកម្មវត្ថុរបស់ខ្លួន ដោយកំណត់ឆ្នាំគោលរៀងខ្លួន។ សហរដ្ឋអាមេរិកក៏ដូចជាកាណាដា បានសន្យាកាត់បន្ថយផ្សែងពុលមួយភាគបួន នៅឆ្នាំ២០២៥ បើប្រៀបទៅឆ្នាំ២០០៥។ តែតាមការពិតពីរវាងឆ្នាំ១៩៩០ទៅ ២០០៥ទេ ដែលមានការបញ្ចេញឧស្ម័នពុលខ្លាំង។ អឺរ៉ុប រុស្ស៊ី ស្វីស ឬន័រវេស យកឆ្នាំ១៩៩០ ឆ្នាំដែលបានចុះហត្ថលេខាលើពិធីសារក្យូតូ មកធ្វើជាគោល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ