ចិនសន្យាកាត់បន្ថយអត្រាកំណើននៃការបញ្ចេញឧស្ម័នកាបូនិច នៅរង្វង់ឆ្នាំ ២០៣០
នៅថ្ងៃអង្គារ ទី ៣០មិថុនា នាយករដ្ឋមន្រ្តីចិន លោកលី ខឺឈាំង ដែលកំពុងធ្វើទស្សនកិច្ចក្នុងទីក្រុងប៉ារីស ប្រទេសបារាំង បានប្រកាសជាផ្លូវការ ការចូលរួមរបស់ចិន នៅក្នុងការកាត់បន្ថយ ការបញ្ចេញឧស្ម័នកាបូនិច ដែលជាចំណែកធ្វើឲ្យភពផែនដីឡើងកំដៅ។ ជាការប្រកាសប្រកបដោយអត្ថន័យជ្រាលជ្រៅ ព្រោះវាធ្វើឡើងនៅ ទីក្រុងប៉ារីស ដែលនឹងធ្វើជាម្ចាស់រៀបចំសន្និសីទរបស់អង្គការសហប្រជាជាតិ ស្តីពីអាកាសធាតុ នៅចុងឆ្នាំ ២០១៥។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១០
នៅក្រោយជំនួប រវាងលោកនាយករដ្ឋមន្រ្តីចិន លី ខឺឈាំងនិង លោកប្រធានាធិបតីបារាំង ហ្វ្រង់ស័រ ហូឡង់ ក្នុងទីក្រុងប៉ារីស រដ្ឋាភិបាលចិនបានចេញសេចក្តីថ្លែងការណ៍ មួយ ដែលបានបញ្ជាក់ពីការចូលរួមរបស់ចិន នៅក្នុងការកាត់បន្ថយអត្រាកំណើននៃការបញ្ចេញឧស្ម័នកាបូនិចនៅរង្វង់ ឆ្នាំ ២០៣០ ឬមុននេះទៅទៀត។ ជាមួយនឹងទិសដៅឆ្នាំ ២០៣០ ទីក្រុងប៉េកាំងចង់ព្យាយាមកាត់បន្ថយកុំឲ្យការបញ្ចេញឧស្ម័នកើនឡើង ខ្លាំង ទៅតាមកំណើនសេដ្ឋកិច្ច។ អាចនិយាយបានថា ចាប់តាំងពីឆ្នាំ ២០៣០ ការបញ្ចេញឧស្ម័នកាបូនិចរបស់ចិន នឹងនៅថេរ ទោះបីចិនមានកំណើនសេដ្ឋកិច្ចខ្លាំងក៏ដោយ។
តាមសេចក្តីថ្លែងការណ៍របស់រដ្ឋាភិបាលចិន គេនឹងបង្កើនការប្រើប្រាស់ថាមពលមិនចេះរីងស្ងួត ឲ្យបាន២០ភាគរយ ដើម្បីជំនួសថាមពល ដែលបានមកពីធ្យូងថ្ម និងប្រេងកាត ដែលជាប្រភពបង្កើតឲ្យមានឧស្ម័នផ្ទះកញ្ចក់។ លើសពីនោះ ទីក្រុងប៉េកាំងចង់បង្កើនបរិមាណព្រៃ ដើម្បី ស្រូបឧស្ម័នកាបូនិច ឲ្យបាន៤ពាន់ ៥០០រយលានម៉ែត្រគូប បើប្រៀបធៀបនឹងឆ្នាំ ២០០៥។
ទើបមានសេដ្ឋកិច្ចរីកលូតលាស់ថ្មី ចិន ជាប្រទេសដែលបញ្ចេញឧស្ម័នផ្ទះកញ្ចក់ច្រើនជាងគេនៅក្នុងពិភពលោក ប្រមាណ ២៥ភាគរយ ដោយនាំមុខសហរដ្ឋអាមេរិក។ កាលពីចុងឆ្នាំ ២០១៤ នៅក្នុងអំឡុងទស្សនកិច្ចរបស់លោកប្រធានាធិបតីអាមេរិក ទៅទីក្រុងប៉េកាំង អាមេរិក និងចិនធ្លាប់បានសន្យាចូលរួមកាត់បន្ថយអត្រាកំណើននៃការបញ្ចេញឧស្ម័នកាបូនិច ដែលនាំឲ្យផែនដីឡើងកំដៅ នៅអំឡុងឆ្នាំ ២០៣០។
ការចូលរួមរបស់ចិន ដែលគេទន្ទឹងរង់ចាំជាយូរមកហើយ នឹងអាចគេយកទៅធ្វើជាអំណះអំណាងដាក់សម្ពាធលើប្រទេសឥណ្ឌា ដែលបញ្ចេញឧស្ម័នកាបូនិច ច្រើន មិនចាញ់ប្រទេសចិន។ តាមវិមានអេលីសេ លោកប្រធានាធិបតី បារាំង បានថ្លែងអំណគុណលោកនាយករដ្ឋមន្រ្តី ចិន ដែលបានជ្រើសរើសទីក្រុងប៉ារីស ធ្វើជាកន្លែង ប្រកាស ការចូលរួមរបស់ចិន ដើម្បីប្រយុទ្ធប្រឆាំងនឹងការឡើងកំដៅនៃភពផែនដី។ ប៉ារីសដែលត្រូវធ្វើជាម្ចាស់ផ្ទះ រៀបចំសន្និសីទអង្គការសហប្រជាជាតិ ស្តីពីអាកាសធាតុ នៅចុងឆ្នាំ ២០១៥ បានសម្រុកធ្វើសកម្មភាពការទូតដើម្បីអូសទាញទាំងប្រទេសឧស្សាហកម្ម និងប្រទេសទើបរីកលូតលាស់ថ្មីដូចចិន ឲ្យចូលរួម ជាក់ស្តែង ដើម្បី កាត់បន្ថយឧស្ម័នដែលធ្វើផែនដីឡើងកំដៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ