ម៉ាឡេស៊ីបិទសារព័ត៌មានThe Edge មិនឲ្យផ្សាយ៣ខែ ដោយសារតែចុះផ្សាយរឿងអាស្រូវរបស់នាយករដ្ឋមន្ត្រី
រដ្ឋាភិបាលម៉ាឡេស៊ី បានលេងធម៌ក្តៅ បន្ទាប់ពីសារព័ត៌មានរិះគន់ជាភាសាអង់គ្លេសមួយឈ្មោះ The Edge បានចុះផ្សាយផ្ទួនៗគ្នា ស្តីពីរឿងអាស្រួវរបស់ក្រុមហ៊ុនរដ្ឋមួយឈ្មោះ 1Malaysia Development Berhad ដែលជាប់ទាក់ទងនឹងនាយករដ្ឋមន្រ្តីរបស់ប្រទេសនេះ។ សារព័ត៌មាននេះ នឹងត្រូវបង្ខំឲ្យបិទ មិនឲ្យផ្សាយរយៈពេលបីខែ រាប់ចាប់ពីថ្ងៃចន្ទសប្តាហ៍ក្រោយទៅ ដោយអាជ្ញាធរម៉ាឡេស៊ី បានចោទថា សារព័ត៌មាននេះ បានចុះផ្សាយព័ត៌មាន ដែលអាចបង្កគ្រោះថ្នាក់ ដល់សណ្តាប់ធ្នាប់សង្គម។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០១
ជាទូទៅ ពាក្យថា បង្កគ្រោះថា្នក់ដល់សណ្តាប់ធ្នាប់សង្គម តែងតែត្រូវបានរដ្ឋាភិបាលផ្តាច់ការមួយចំនួន យកមកធ្វើជាលេស ដើម្បីខ្ទប់សម្លេងប្រឆាំងរិះគន់។ ជាក់ស្តែង សារព័ត៌មាន The Edge ដែលជាសារព័ត៌មានជាភាសាអង់គ្លេស នៅប្រទេសម៉ាឡេស៊ី ត្រូវបានអាជ្ញាធរម៉ាឡេស៊ី ចោទពីបទនេះ ហើយបានបញ្ជាឲ្យព្យួរការផ្សាយ រយៈពេល ៣ខែ គិតចាប់ពីថ្ងៃចន្ទ សប្តាហ៍ក្រោយទៅ។
សមាគមដើម្បីភាពឯករាជ្យនៃសារព័ត៌មានរបស់ម៉ាឡេស៊ី បានមានប្រតិកម្មភ្លាមៗថា ការបញ្ជារឲ្យផ្អាកការផ្សាយនេះ គឺជាការសម្រេចដែលមានលក្ខណៈផ្តាច់ការ ជ្រុលហួសហេតុ របស់រដ្ឋាភិបាលម៉ាឡេស៊ី។ ទង្វើបែបនេះ គឺវាជាការរំលោភបំពាន ដោយឥតប្រកែកបាន លើសេរីភាពសារព័ត៌មាន។ ដូចគ្នាដែរ លោក ហូ កៃតាត អគ្គនាយកក្រុមហ៊ុនសារព័ត៌មាននេះ បានអះអាងថា ការសម្រេចរបស់រដ្ឋាភិបាលម៉ាឡេស៊ី គឺជាការគម្រាមកំហែង នឹងចង់ធ្វើឲ្យក្រុមហ៊ុនសារព័ត៌មានលោក បិទទ្វារតែម្តង។
សូមបញ្ជាក់ថា សារព័ត៌មាន The Edge មានឈ្មោះល្បីនៅម៉ាឡេស៊ី ដោយសារតែសារព័ត៌មាននេះ បានចុះផ្សាយពីរឿងអាស្រូវហិរញ្ញវត្ថុជាច្រើន របស់អ្នកជំនួញ និងមន្រ្តីក្នុងជួររដ្ឋាភិបាលម៉ាឡេស៊ី ដែលមានទំនាក់ទំនង យ៉ាងជិតស្និតជាមួយឈ្មួញធំៗ។ រឿងអាស្រូវទាំងនោះមានដូចជា ការកេងប្រវញ្ចចំណូលពន្ធ និងថវិការដ្ឋ ភាពធ្វេសប្រហេស បិទភ្នែកបិទត្រចៀក របស់អាជ្ញាធរ និងការបង្វិលផ្ទេរប្រាក់ ដែលមានប្រភពមិនស្រប់ច្បាប់។
រឿងអាស្រូវចុងក្រោយគេ ដែលបានបែកធ្លាយដោយការចុះផ្សាយ របស់សារព័ត៌មាននេះ គឺទាក់ទងនឹងក្រុមហ៊ុនរដ្ឋមួយ ឈ្មោះ 1Malaysia Development Berhad ដែលមានទំនាក់ទំនងផ្ទាល់ ជាមួយនឹងលោកនាយករដ្ឋមន្ត្រីម៉ាឡេស៊ី Najib Razak។ បើតាមការចុះផ្សាយរបស់ សារព័ត៌មាន Wall Street Journal បានឲ្យដឹងថា មានទឹកប្រាក់ចំនួនប្រមាណជា ៧០០លានដុល្លារអាមេរិក ត្រូវបានគេផ្ទេរឆ្លងកាត់ តាមសាខាជាច្រើន របស់ក្រុមហ៊ុននេះ មុននឹងធ្លាក់ចូល ទៅក្នុងគណនីធនាគាផ្ទាល់ខ្លួន របស់លោក នាយករដ្ឋមន្ត្រី ម៉ាឡេស៊ី។
ជាការកត់សំគាល់ គ្រាន់តែរឿងអាស្រូវនេះបានផ្ទុះឡើងភ្លាម ហើយមុន នឹងមានការបញ្ជារ ឲ្យផ្អាកការផ្សាយ របស់ សារព័ត៌មាន The Edge អាជ្ញាធរម៉ាឡេស៊ី ក៏បានបញ្ជារឲ្យបិទគេហទំព័រអ៊ីនធឺនែត Sarawak Report កាលពីដើមសប្តាហ៍នេះ ក្នុងគោលបំណងបិទខ្ទប់ មិនឲ្យមានការសរសេរ ចុះផ្សាយ ពីរឿងអាស្រូវនេះ តទៅទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ