កាសែត៖ លុយ៧០០លានដុល្លារ ត្រូវបានផ្ទេរចូលគណនីផ្ទាល់ខ្លួនរបស់នាយករដ្ឋមន្រ្តីម៉ាឡេស៊ី
ក្រុមការងារស៊ើបអង្កេតពិសេសរបស់ម៉ាឡេស៊ី បានស៊ើបអង្កេតលើបទចោទប្រកាន់អំពើពុករលួយ ដែលមានជាប់ពាក់ព័ន្ធ នាយករដ្ឋមន្រ្តី ម៉ាឡេស៊ី លោកណាហ្ស៊ីប រ៉ាហ្សាក់។ ក្រុមការងារស៊ើបអង្កេតពិសេស ម៉ាឡេស៊ី បានសម្រុកស៊ើបអង្កេត លើគណនីធនាគាររបស់លោកនាយករដ្ឋមន្រ្តី បន្ទាប់ពីកាសែត អាមេរិក The Wall Street Journal បានចុះផ្សាយ ថា លុយប្រមាណ ៧០០លានដុល្លារ ត្រូវបានផ្ទេរចូលទៅគណនីផ្ទាល់ខ្លួន របស់លោកនាយករដ្ឋមន្រ្តីម៉ាឡេស៊ី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០០
នាល្ងាចថ្ងៃសៅរ៍ទី ៤ កក្កដា នៅក្នុងសេចក្តីថ្លែងការណ៍ ជាភាសាម៉ាឡេ រាជអាជ្ញា ម៉ាឡេស៊ី លោកអាប់ឌុល ហ្កានី ប៉ាតៃ បានអះអាងថា លោកបានទទួលឯកសារដែលមានជាប់ពាក់ព័ន្ធនឹងបទចោទប្រកាន់ដែលថា លុយត្រូវបានផ្ទេរចូលទៅក្នុងគណនីផ្ទាល់ខ្លួនរបស់លោកនាយករដ្ឋមន្រ្តី ណាហ្ស៊ីប រ៉ាហ្សាក់។
នៅក្នុងសេចក្តីថ្លែងការណ៍ដដែល រាជអាជ្ញាម៉ាឡេស៊ី បានអះអាងថា លោកបានបញ្ជារឲ្យក្រុមស៊ើបអង្កេតពិសេស បន្តការងារស៊ើបអង្កេតបន្ថែម និងនៅគ្រប់ទិដ្ឋភាពទាំងអស់។ ក្រុមការងារស៊ើបអង្កេត ជាក្រុមឯករាជ្យដែលមានសមាជិកមកពីគណៈកម្មការប្រយុទ្ធប្រឆាំង អំពើពុករលួយ ប៉ូលិស និងធនគារកណ្តាលរបស់ម៉ាឡេស៊ី។ ក្រុមនេះ ត្រូវបានបង្កើតឡើង ចាប់តាំងពីមានផ្ទុះរឿងអាស្រូវពុករលួយ នៅក្នុងក្រុមហ៊ុនរដ្ឋ មួយ (1Malaysia Development Berhad) ដែលមានលោកនាយករដ្ឋមន្រ្តីជាប្រធានក្រុមប្រឹក្សាភិបាល។
លោកនាយករដ្ឋមន្រ្តី ម៉ាឡេស៊ី ណាហ្ស៊ីប រ៉ាហ្សាក់ កាលពីយប់ថ្ងៃសុក្របានចេញសេចក្តីថ្លែងការណ៍មួយ រុញច្រានចោល ការចោទប្រកាន់ និងបានគំរាមដាក់ពាក្យប្តឹងកាសែត អាមេរិកាំង The Wall Street Journal ដែលជាប្រភពទម្លាយព័ត៌មានឲ្យដឹងពីការផ្ទេរលុយប្រមាណ ៧០០លានដុល្លារ ចូលក្នុងគណនីផ្ទាល់ខ្លួនរបស់លោកនាយករដ្ឋមន្រ្តីម៉ាឡេស៊ី។ តាមកាសែតអាមេរិកាំង លុយ ៧០០លានដុល្លារ ដែលគេមិនដឹងពីប្រភពអ្នកផ្ញើ ត្រូវបានបញ្ជូនចូលក្នុងគណនេយ្យរបស់ក្រុមហ៊ុនរដ្ឋ 1Malaysia Development Berhad មុននឹងផ្ទេរបន្ត ទៅក្នុងគណនេយ្យ មួយដែលគេជឿថា ជាគណនីរបស់លោកណាហ្ស៊ីប រ៉ាហ្សាក់។
ចាប់តាំងពីមានផ្ទុះរឿងអាស្រូវពុករលួយ ដែលរូបលោកត្រូវជាប់ពាក់ព័ន្ធ លោកណាហ្ស៊ីប រ៉ាហ្សាក់ បានចោទប្រកាន់អតីតនាយករដ្ឋមន្រ្តីម៉ាឡេស៊ី លោកម៉ាហាធៀរ ម៉ូហាមេដ ថា ជាអ្នកនៅពីក្រោយ និងចូលរួមជាមួយបរទេស ដើម្បី បង្កើតវិបត្តិនយោបាយ ផ្តួលរំលំអំណាចរដ្ឋាភិបាលរបស់លោក។ ឧបនាយករដ្ឋមន្រ្តីម៉ាឡេស៊ី វិញ ដែលជាមនុស្សខ្លាំងម្នាក់របស់គណបក្សកាន់អំណាចបានទាមទារឲ្យគេស៊ើបអង្កេតជាបន្ទាន់ទៅលើកាសែតអាមេរិកាំង ព្រោះថា បទចោទប្រកាន់ មានលក្ខណៈធ្ងន់ធ្ងរ ដែលអាចបំផ្លាញកិត្តិយស និងជំនឿទុកចិត្តទៅលើលោកនាយករដ្ឋមន្រ្តី និងថ្នាក់ដឹកនាំ រដ្ឋាភិបាលដទៃទៀត។
សូមបញ្ជាក់ថា ក្រុមហ៊ុនរដ្ឋ1Malaysia Development Berhad ត្រូវបានបង្កើតឡើងនៅឆ្នាំ ២០០៩ ដោយណាហ្ស៊ីប រ៉ាហ្សាក់ ក្នុងគោលដៅ អភិវឌ្ឍ ទាក់ទាញការវិនិយោគបរទេស ចូលក្នុងប្រទេសម៉ាឡេស៊ី។ ក្រុមហ៊ុននេះបានធ្លាក់ខ្លួន ជាប់បំណុល ១១ ពាន់លានដុល្លារ ដោយសារតែការគ្រប់គ្រងមិនល្អ និងភាពមិនច្បាស់លាស់ ក្នុងការផ្ទេរទុនវិនិយោគ ពីបរទេស។ លោកម៉ាហាធៀរ ម៉ូហាមេដ អតីតនាយករដ្ឋមន្រ្តីម៉ាឡេស៊ីធ្លាប់បានរិះគន់ និងបានទាមទារឲ្យមានការស៊ើបអង្កេតបទឧក្រិដ្ឋកម្ម ប៉ុន្តែ ទាំងនាយករដ្ឋមន្រ្តី និងក្រុមហ៊ុន1Malaysia Development Berhadបានបដិសេធការចោទប្រកាន់ និងអះអាង ថា ខ្លួនគ្មានធ្វើអ្វីខុស កាលពីអតីតកាល ហើយក្រុមហ៊ុននៅតែមានមូលដ្ឋានគ្រឹះរឹងមាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ