ចិនចង់បានគំរូទំនាក់ទំនងថ្មីជាមួយអាមេរិក និងចង់ឱ្យអង្គការក្រៅរដ្ឋាភិបាលបរទេសគោរពច្បាប់
ប្រធានាធិបតីចិន លោកស៊ីជីនពីង កំពុងផ្តើមទស្សនកិច្ចនៅសហរដ្ឋអាមេរិក។ ពីនៅក្រុងSeattle និងនៅចំពោះមុខប្រធានក្រុមហ៊ុនធំៗអាមេរិកជាច្រើននាក់ លោកស៊ីជីនពីង បានអំពាវនាវឱ្យអង្គការក្រៅរដ្ឋាភិបាលបរទេសទាំងអស់ គោរពច្បាប់ចិន។ ក្នុងពេលជាមួយគ្នានោះដែរ លោកស៊ីជីនពីង ក៏បានទាមទារចង់ឱ្យមានគំរូទំនាក់ទំនងថ្មីជាមួយសហរដ្ឋអាមេរិក ៖ មិនសូវសង្ស័យគ្នា និងយល់គ្នាជាងមុន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
ចិនមិនដែលស្វែងរកជម្លោះទេ បើទោះបីជាចិននិងអាមេរិកមានភាពតានតឹងនឹងគ្នាលើវិស័យខ្លះក៏ដោយ។ មហាអំណាចសេដ្ឋកិច្ចពិភពលោកកំពូលទាំងពីរ គួរឱ្យតែស្វែងយល់អំពីយុទ្ធសាស្ត្ររបស់គ្នាទៅវិញទៅមក ដើម្បីកាត់បន្ថយភាពមិនទុកគ្នា និងបង្កើនការយោគយល់ ! ព្រោះភាពប្រឈមរវាងអាមេរិកនិងចិន បានត្រឹមតែបង្កមហន្តរាយដល់ប្រទេសទាំងពីរនិងពិភលោកតែប៉ុណ្ណោះ។
នេះជាសុន្ទរកថាដំបូងបង្អស់របស់លោកប្រធានាធិបតីចិន ដែលមានន័យស្វែងរកការយល់ចិត្តគ្នា មុននឹងឈានដល់ការពិភាក្សា ជាមួយលោកប្រធានាធិបតី អូបាម៉ា នៅទីក្រុងវ៉ាស៊ីនតោន លើប្រធានបទក្តៅនិងតានតឹង នាថ្ងៃសុក្រខាងមុខនេះ។
ក្រៅអំពីមានប្រសាសន៍ធានាអះអាងកុំឱ្យក្រុមហ៊ុនអាមេរិកព្រួយបារម្ភនឹងសុខភាពសេដ្ឋកិច្ចរបស់ចិន លោកស៊ីជីនពីង ក៏បានឆ្លៀតបង្ហើសារជាបណ្តើរៗរំលឹកវ៉ាស៊ីនតោនថាចិនជាបង្អែកដ៏រឹងម៉ាំនៃក្រុមហ៊ុនអាមេរិក ហើយចិនគឺជាដៃគូប្រកបដោយទំនួលខុសត្រូវ មិនថាដើម្បីដោះស្រាយវិបត្តិសង្គម នុយក្លេអ៊ែរឬ ហិរញ្ញវត្ថុឬសេដ្ឋកិច្ចពិភពលោកទេ។ ដូច្នេះអាមេរិកគួរតែសហការជាមួយចិនឱ្យច្រើនជាងនេះក្នុងការនយោបាយប្រយុទ្ធប្រឆាំងអំពើពុករលួយ។
ប្រធានបទសិទ្ធិមនុស្ស ជាពិសេសគម្រោងច្បាប់គ្រប់គ្រងអង្គការបរទេស ដ៏ចម្រូងចម្រាស ដែលជាចំណុចខ្ទាស់សំខាន់មួយនៃទស្សនកិច្ចនេះ ក៏ត្រូវបាន លោក ស៊ីជីនពីង បង្ហើបឡើងនៅក្នុងសុន្ទរកថាល្ងាចមិញដែរ ថាចិនស្វាគមន៍និងការពារអង្គការក្រៅរដ្ឋាភិបាលបរទេសទាំងអស់ ដើម្បីប្រយោជន៍ពលរដ្ឋចិន តែគ្រប់អង្គការត្រូវតែគោរពច្បាប់ចិន។
សូមបញ្ជាក់ថាច្បាប់គ្រប់គ្រងអង្គការដែលនឹងត្រូវអនុម័តនៅឆ្នាំនេះ តម្រូវឱ្យគ្រប់អង្គការក្រៅរដ្ឋាភិបាលបរទេស ភ្ជាប់ខ្លួនទៅនឹងស្ថាប័នរដ្ឋាភិបាលណាមួយ។ ហើយរាល់កម្មវិធី និងគម្រោងសកម្មភាពអង្គការត្រូវឆ្លងកាត់ការសម្រេចចិត្តពីប៉ូលិស។ អង្គការក្រៅរដ្ឋាភិបាលអាមេរិកពាក់ព័ន្ធ បានសម្តែងការព្រួយបារម្ភចំពោះការរឹតបណ្តឹងសេរីភាពនេះយ៉ាងខ្លាំង ដល់សេតវិមាននៅថ្ងៃម្សិលមិញដែរ។
ចិនក្រោមការដឹកនាំរបស់លោកស៊ីជីនពីង បានពង្រឹងការត្រួតពិនិត្យសំឡេងអ្នកប្រឆាំងកាន់តែខ្លាំង ! ការចាប់ខ្លួនសកម្មជនរបស់អង្គការក្រៅរដ្ឋាភិបាលក៏មានច្រើន។ សារព័ត៌មានផ្លូវការចិនតែងចោទប្រកាន់នារយៈពេលប៉ុន្មានខែចុងក្រោយនេះ ថាវត្តមានអង្គការក្រៅរដ្ឋាភិបាលបរទេស ប៉ះពាល់ដល់សន្តិសុខជាតិ និងកំពុងសាកល្បងបំផុសឱ្យមានចលនាបដិវត្តមានពណ៌ ប្រឆាំងនឹងបក្សកុម្មុយនិស្តកំពុងកាន់អំណាច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ