ទោសដ៏ស្រាលមិនធ្លាប់មាន សម្រាប់បទល្មើស មើលងាយព្រះចេស្តាមហាក្សត្រថៃ
តុលាការថៃ ទើបបាន ចេញសាលក្រម ដោយបានសម្រេចឲ្យព្យួរទោសជនល្មើសម្នាក់ ពីបទមើលងាយព្រះចេស្តារបស់មហាក្សត្រថៃ ដែលនេះ គឺជាទោសដ៏ស្រាល យ៉ាងចំលែក សម្រាប់ប្រទេសនេះ ដែលកន្លងមក តែងតែធ្វើការផ្តន្ទាទោសយ៉ាងចាស់ដៃ ទៅដល់អ្នកណា ដែលហ៊ាននិយាយ រឺសរសេរពីក្រុមគ្រួសារព្រះញាតិវង្សថៃ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៤
កាលពីថ្ងៃទី ៣ ខែកុម្ភៈ ជនឈ្មោះនីរ៉ាន់ យ៉ៅវ៉ាផា អាយុ៥០ឆ្នាំ ជាអ្នកទទួលបន្ទុក ការផ្សាយរបស់គេហទំព័រព័ត៌មាន តាមអ៊ីនធើណិតមួយ ដែលត្រូវបានគេស្គាល់ថាជាគេហទំព័រ មានទំនោរគាំទ្រព្រះមហាក្សត្រ ហើយដែលជាការបង្កើតឡើង ដោយក្រុមអាវលឿង បានធ្វើការបង្ហោះផ្សាយឯកសារពេទ្យ ស្តីពីស្ថានភាពសុខភាព របស់មហាក្សត្រថៃ ប៉ុន្តែបន្តិចក្រោយមក ក៏បានដកចេញទៅវិញ ដោយសារឯកសារនោះ ជាឯកសារក្លែងក្លាយ។ ប៉ុន្តែយ៉ាងណា ក៏ដោយ អាជ្ញាធរថៃ បានធ្វើការចាប់ខ្លួនជននោះភ្លាមដែរ។
យោងតាមការរាយការណ៍របស់លោក សុវ៉ាត់ អាផៃផាខឌី មេធាវីការពារជនជាប់ចោទ បានអះអាងថា កូនក្តីលោក ត្រូវបានតុលាការសម្រេចកាត់ទោស៥ឆ្នាំ ប៉ុន្តែជាប្រភេទទោសព្យួរ។ តុលាការបានសម្រាលទោសដោយបន្ថយពី១០ឆ្នាំ មកត្រឹម៥ឆ្នាំ ហើយជាទោសព្យួរទៀត ក៏ដោយសារកូនក្តីលោក បានបង្ហាញពីភាពស្មោះត្រង់ ហើយបានដកឯកសារនោះចេញវិញភ្លាមៗ ប្រមាណជា១០នាទីក្រោយមក បន្ទាប់ពីដឹងថា ជាឯកសារក្លែងក្លាយ។
យ៉ាងណាក៏ដោយ នេះជាការផ្តន្ទាទោសដ៏ស្រាលបំផុតមិនធ្លាប់មាន សម្រាប់ប្រទេសថៃ ប្រទេសដែលគេធ្លាប់ស្គាល់ថា បានប្រើប្រព័ន្ធតុលាការបំបិតមាត់អ្នកណា ដែលហ៊ានសរសេរ រឺនិយាយអ្វីប៉ះពាល់ដល់ព្រះមហាក្សត្រ រឺក្រុមគ្រួសារព្រះញាតិវង្ស ជាពិសេសមួយរយៈចុងក្រោយនេះ បន្ទាប់ពីការឡើងកាន់អំណាច របស់ក្រុមយោធា ដែលស្រលាញ់ការពារស្ថាប័នព្រះមហាក្សត្រយ៉ាងងុបងុល។
តាមធម្មតា របបសិកថៃ ចាប់មនុស្សដាក់ទោសធ្ងន់ៗបំផុត រហូតដល់ជាង១០ឆ្នាំ ក៏មានដែរ។ បើតាមការសន្និដ្ឋានរបស់មន្ត្រីអង្គការក្រៅរដ្ឋាភិបាលមួយ ឈ្មោះ iLaw ប្រចាំការនៅប្រទេសថៃ បានបញ្ជាក់ថា នេះក៏ដោយសារតែជនល្មើស គឺជាបក្សពួករបស់ក្រុមអាវលឿង ទើបបានជាទោសស្រាលដូច្នេះ។ អង្គការនេះក៏បានចោទសួរផងដែរថា មិនដឹងជាជោគវាសនារបស់អ្នកជាប់ទោស ដែលជាក្រុមអាវក្រហម និងមានសំណាងដូចករណីជននេះដែររឺទេ? នៅថ្ងៃ១៩ តុលាខាងមុខនេះ នឹងមានសាវនាការជំនំជំរះ លើជនជាប់ចោទ ខាងក្រុមអាវក្រហមម្នាក់ ពីបទផ្សព្វផ្សាយឯកសារក្លែងក្លាយស្តីពីសុខភាពរបស់ព្រះមហាក្សត្រ ដូចគ្នានឹងករណីនេះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ