ជំហានដំបូងនៃការផ្ទេរអំណាច នៅភូមា
ថ្ងៃព្រហស្បតិ៍ទី ១៩ វិច្ឆិកា នេះ ជាថ្ងៃដែលលោកស្រី អ៊ុងសាន ស៊ូជី ប្រធានគណបក្សប្រឆាំងភូមា ដែលទើបតែបានទទួលជ័យជំនះ ដ៏ធំធេង នៅក្នុងពេលបោះឆ្នោតថ្មីៗនេះ បានទៅជួបនឹងលោក ស្វេ ម៉ាន់ ប្រធានសភាជាន់ទាបភូមា ដើម្បីពិភាក្សា ជាជំហានដំបូង ដើម្បីឈានទៅដល់ការផ្លាស់ប្តូរអំណាច និងបង្កើតរដ្ឋាភិបាលថ្មី។ ថ្វីត្បិតតែលោកប្រធានាធិបតីនៃរបបយោធាភូមា លោកធាន សេន បានទទួលស្គាល់ នូវបរាជ័យរបស់ក្រុមយោធា ហើយនឹងសុខចិត្ត ធ្វើការប្រគល់អំណាចដោយសន្តិវិធីក្តី ក៏ការផ្លាស់ប្តូរអំណាចនេះ នឹងត្រូវការពេលវេលាយូរទៅមុខ ហើយក៏មិនប្រាកដថា ក្រុមយោធាអស់ឥទ្ធិពលទាំងស្រុងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:៣៩
ជំនួបលើកដំបូង រវាងលោកស្រី អ៊ុងសាន ស៊ូជី និងលោក ស្វេ ម៉ាន់៖
នេះជាការជួបចរចាគ្នាលើកដំបូង រវាងលោកស្រី អ៊ុងសាន ស៊ូជី ជាមួយនឹងថ្នាក់ដឹកនាំខាងរបបយោធាដែលទើបតែចាញ់ឆ្នោត កាលពីថ្ងៃទី ៨ វិច្ឆិកា កន្លងទៅនេះ។ ជំនួបនេះ មានគោលដៅ ដើម្បីពិភាក្សាគ្នា ពីរបៀបវារៈ នៃការផ្ទេរអំណាច ពោលគឺអ្នកចាញ់ត្រូវចេញ ទុកកន្លែងឲ្យអ្នកឈ្នះម្តង។ ជំនួបត្រូវបានធ្វើឡើង នៅទីក្រុង ណៃភីដាវ រដ្ឋធានីថ្មីរបស់ភូមា ដែលបានកសាងឡើងថ្មីទាំងស្រុង ក៏ប៉ុន្តែស្ងាត់ជ្រងំ គ្មានមនុស្សរស់នៅទេ។ អ្នកនាំពាក្យគណបក្សសម្ព័ន្ធជាតិ ដើម្បីប្រជាធិបតេយ្យ របស់លោកស្រី អ៊ុងសាន ស៊ូជី បានថ្លែងឲ្យដឹងថា នេះជាការជួបនិយាយគ្នា លើសំណុំរឿងដ៏សំខាន់ ស្តីពីការផ្ទេរអំណាច។
នេះជំហានដំបូង ដែលលោកស្រី អ៊ុងសាន ស៊ូជី បានជួបជាមួយនឹងលោក ស្វេ ម៉ាន់ ប្រធានសភាជាន់ទាប នៃរបបសិកភូមា។ ជំហានបន្ទាប់ពីនេះ ហើយដែលសំខាន់ ជាងគេ គឺជំនួបរវាង លោកស្រី អ៊ុងសាន ស៊ូជី ជាមួយនឹងប្រធានាធិបតីភូមា លោក ធាន សេន និងជាមួយប្រមុខមេទ័ពធំ របស់ភូមា គឺលោក មិញ អ៊ុងលាំង។
គ្រាន់តែបានជោគជ័យ ក្រោយការបោះឆ្នោតភ្លាម លោកស្រី អ៊ុងសាន ស៊ូជី ក៏បានសរសេរលិខិត ៣ ទៅកាន់ មនុស្សសំខាន់ទាំងបីនាក់នេះ ដើម្បីជួបនិយាយគ្នា ក៏ប៉ុន្តែ រហូតមកដល់ពេលនេះ ទាំងខាង លោក ប្រធានាធិតី ទាំងខាងលោកមេទ័ពភូមា នៅមិនទាន់កំណត់ថ្ងៃថា នឹងត្រូវជួបនៅពេលណាទេ។ បើតាមសម្តីរបស់ អ្នកនាំពាក្យលោកប្រធានាធិបតីភូមា គឺថាលោក ធាន សេន នឹងទទួល លោកស្រី អ៊ុងសាន ស៊ូជី ឲ្យចូលជួប នៅពេលណាដែលនីតិវិធីបោះឆ្នោត ត្រូវបានបិទបញ្ចប់ជាស្ថាពរ ពោលគឺក្រោយពេលបោះផ្សាយលទ្ធផលជាផ្លូវការ។
ក្រុមយោធា រៀបជើងព្រួល ដើម្បីបង្ករឧបសគ្គ ដល់ការផ្ទេរអំណាច៖
បើយើងគ្រាន់តែមើលលើលទ្ធផលជ័យជំនះ របស់គណបក្សលោកស្រី អ៊ុងសាន ស៊ូជី គឺយើងនាំគ្នាសប្បាយចិត្ត ក៏ប៉ុន្តែបើយើងទៅមើល លើតថៈភាពជាក់ស្តែងវិញ គឺថា ការផ្ទេរអំណាច នឹងប្រព្រឹត្តិទៅដោយលំបាកណាស់ ដែលវាត្រូវការចំណាយពេលយូរទៅមុខទៀត។ រដ្ឋធម្មនុញ្ញ និងច្បាប់បោះឆ្នោត ដែលតាក់តែងឡើង ដោយរបបយោធាភូមា គឺគេបានរៀបចំជើងព្រួល រួចជាស្រេចទៅហើយ ដើម្បីធ្វើយ៉ាងណា ឲ្យការផ្លាស់ប្តូរអំណាច អាចធ្វើទៅដោយសន្សឹមៗ ហើយជាពិសេស ក្រុមយោធា នៅតែបន្តមានឥទ្ធិពល នៅក្នុងអំណាចនយោបាយថ្មីរបស់ភូមាជានិច្ច។
មិនបាច់និយាយអ្វីច្រើនទេ គឺគ្រាន់តែបោះឆ្នោតបានលទ្ធផលរួចរាល់មែន តែត្រូវ រងចាំ ដល់ខែ ២ ទៅ ខែ៣ ឆ្នំាក្រោយ ឯណោះ ទើបសភាភូមាថ្មី និងធ្វើការបោះឆ្នោតជ្រើសរើសប្រធានាធិបតីថ្មី។ ដូច្នេះ ក្នុងកំឡុងពេលនេះ គឺលោកប្រធានាធិបតីធាន សេន នឹងនៅតែបន្តកាន់អំណាចដដែល។ និយាយដល់តំណែងប្រធានាធិបតី យើងដឹងស្រាប់ហើយ លោកស្រី អ៊ុងសាន ស៊ូជី ត្រូវរដ្ឋធម្មនុញ្ញហាមមិនឲ្យកាន់តំណែងបានទេ ដោយសារតែកូនលោកស្រី មានសញ្ជាតិបរទេស។ ដូច្នេះ លោកស្រី ត្រូវបញ្ជូនឈ្មោះនរណាម្នាក់ ដើម្បីឲ្យអង្គសភា សម្រេចបោះឆ្នោត។
ចំណុចសំខាន់មួយទៀត ដែលជាឧបសគ្គ សម្រាប់គណបក្សលោកស្រី អ៊ុងសាន ស៊ូជី គឺថា ក្នុងចំណោមអាសនៈទាំង៤៤០ របស់សភាភូមា គឺមាន២០% គឺជាអាសនៈ របស់ពួកយោធាដោយស្វ័យប្រវត្តិ។ គណបក្សលោកស្រី អ៊ុងសាន ស៊ូជី បានទទួលចំនួន ២៥៥អាសនៈ ឯក្រុមយោធា បានទទួលតែ២៩អាសនៈពិតមែន ក៏ប៉ុន្តែ ក្រុមយោធាគេនៅមានអាសនៈស្វ័យប្រវត្តិប្រហែលជា ១១០ផ្សេងទៀត។ ក្រៅពីនៅតែរក្សា តំណាងរាស្ត្រជាក្រុមយោធា ក្នុងចំនួន មួយច្រើនគួរសម ក្រុមយោធាភូមា នៅមានសិទ្ធិតែងតាំង រដ្ឋមន្ត្រី ក្រសួងការពារជាតិ និង រដ្ឋមន្ត្រីក្រសួងមហាផ្ទៃ ដែលជាក្រសួងពីរដ៏សំខាន់បំផុត។
ប្រធានាធិបតីថ្មី ត្រូវតែជាមនុស្ស ដែលខាងពួកយោធាពេញចិត្ត៖
បើតាមការវិភាគ ក៏ដូចជាពាក្យចរចាមអារ៉ាមមួយចំនួន គឺថា ប្រហែលជាលោក ស្វេ ម៉ាន់ ប្រធានសភាជាន់ទាប ដែលលោកស្រី អ៊ុងសាន ស៊ូជី ជួបនៅថ្ងៃនេះឯង ដែលអាចនឹងត្រូវក្លាយជាប្រធានាធិបតីថ្មីភូមា។ យោងតាមរដ្ឋធម្មនុញ្ញ គឺថាសភាត្រូវសម្រេចបោះឆ្នោត រើសបេក្ខជនម្នាក់ ក្នុងចំណោមបីនាក់ ឲ្យធ្វើជាប្រធានាធិបតី។ ក្នុងនោះបេក្ខជនម្នាក់ គឺស្នើរដោយក្រុមយោធា។ ដូច្នេះវាមានន័យថា ខាងយោធា ក៏បានយ៉ាងហោចណាស តំណែងអនុប្រធានាធិបតីដែរ។
លោកស្រី អ៊ុងសាន ស៊ូជី ត្រូវបញ្ជូនបេក្ខជនទៅ តែត្រូវធ្វើយ៉ាងណា រកមនុស្ស ដែលខាងយោធាគេពេញចិត្តដែរ ព្រោះមិនអញ្ចឹងទេ គឺមិនបានសម្លេងគាំទ្រគ្រប់ទេ។ ដូច្នេះហើយ បានជាគេសម្លឹងឃើញលោក ស្វេ ម៉ាន់ នេះឯង ព្រោះថាកន្លងមក លោកម្នាក់នេះហើយ ដែលជាចលករមួយដ៏សំខាន់ ក្នុងការទាញក្រុមយោធា ឲ្យបន្ទន់អំណាច ងៀកមករកការបោះឆ្នោត ដោយប្រជាធិបតេយ្យ។ ក្នុងចំណោមថ្នាក់ដឹកនាំយោធាភូមា គឺមានតែលោក ស្វេ ម៉ាន់ ម្នាក់នេះទេ ដែលមានស្មារតីបើកទូលាយ ព្រមទទួលយកកំណែទម្រង់ និងការបើកទ្វារប្រទេសភូមាសាជាថ្មី។ មានន័យថា ប្រធានាធិបតីថ្មីភូមា នឹងអាចជាមនុស្ស របស់របបយោធាដដែល ក៏ប៉ុន្តែជាមនុស្ស ដែលស្តាប់ និងនិយាយគ្នាបាន ជាមួយនឹងលោកស្រី អ៊ុងសាន ស៊ូជី។
ការលំបាករបស់រដ្ឋាភិបាលថ្មីលោកស្រីអ៊ុងសាន ស៊ូជី ក្នុងការធ្វើកំណែទម្រង់ប្រទេស៖
ជាការពិតណាស់ ឧបសគ្គនៅមានច្រើន សម្រាប់រដ្ឋាភិបាលថ្មីរបស់លោកស្រី អ៊ុងសាន ស៊ូជី។ ថ្វីត្បិតតែលោកស្រីអះអាងថា នឹងនាំលទ្ធិប្រជាធិបតេយ្យ ជូនប្រជាជនភូមា ក៏ប៉ុន្តែសម្រាប់ពេលនេះ គឺនៅមិនទាន់អាចធ្វើបានទាំងស្រុងទេ។ ពោលគឺត្រូវការពេលវេលាវែងឆ្ងាយ។ ក្រុមយោធា បានរាយក្រឡា ដើម្បីធ្វើយ៉ាងណា ឲ្យគេ អាចបានដកដង្ហើមបានយូរជាទីបំផុត។ ហើយថាមិនត្រូវ គេអាចប្រើកំលាំង ដណ្តើមអំណាចទាំងស្រុងវិញក៏ថាបានដែរ។
ការលំបាក សម្រាប់គណបក្សលោកស្រី អ៊ុងសាន ស៊ូជី មានច្រើនណាស់។ ចង់ធ្វើកំណែទម្រង់វិសោធនកម្មរដ្ឋធម្មនុញ្ញ ក៍លំបាក ព្រោះត្រូវការសម្លេង៧៥%។ ហើយក្រុមយោធា អាចបោះឆ្នោតវេតូ បដិសេធ បានទាំងអស់។ ក្រសួងសំខាន់ៗទាំងពីរ ជារបស់ក្រុមយោធា ដូច្នេះ កំណែទម្រង់ធំៗ ទាក់ទងនឹងការគ្រប់គ្រងដែនដី ការបញ្ចប់ជម្លោះជាមួយនឹងជនជាតិភាគតិច គឺថាមិនអាចធ្វើបានទេបើ ខាងយោធាគេមិនព្រម។
ភូមាជាប្រទេស មានផ្ទៃដីធំ ហើយជារដ្ឋសហព័ន្ធ ដូច្នេះការគ្រប់គ្រងរដ្ឋបាល មានលក្ខណៈស្មុគស្មាញណាស់។ អំណាចកណ្តាលរបស់រដ្ឋាភិបាល លោកស្រី អ៊ុងសាន ស៊ូជី ពិតជាជួបការលំបាក ក្នុងការអនុវត្តការងារ បើសិនជាគ្មានការសហការ ពីអំណាចមូលដ្ឋាន តាមរដ្ឋសមាជិក ដែលស្ថិតក្នុងកណ្តាប់ដៃរបស់ក្រសួងមហាផ្ទៃ និងក្រសួងការពារជាតិ ពោលគឺក្រុមយោធាតែម្តង។ ថ្ងៃនេះ ពួកមេទ័ពធំៗ ទទួលស្គាល់លទ្ធផលបោះឆ្នោតមែន តែទៅថ្ងៃមុខ ក្រុមមេទ័ព ដែលនៅតែមានឥទ្ធិពល មានអំណាច មានកូនទាហានរាប់សែននាក់នេះ អាចនឹងត្រឡប់មកប្លន់អំណាចវិញ គ្រប់ពេលវេលា បើសិនជាគេទ័លច្រក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ