ម៉ាឡេស៊ីធ្វើបាតុកម្មប្រឆាំងកិច្ចព្រមព្រៀងផ្តោះប្តូរសេរីអន្តរប៉ាស៊ីហ្វិក
បាតុកររាប់ពាន់នាក់ បានប្រមូលផ្តុំគ្នា នៅថ្ងៃសៅរ៍ទី ២៣មករា នៅទីក្រុងកូឡាឡាំពួរ ដើម្បីសម្តែងការពេញចិត្ត នឹងកិច្ចព្រមព្រៀងផ្តោះប្តូរពាណិជ្ជកម្មសេរីអន្តរប៉ាស៊ីហ្វិក Trans Pacific Partnership (TPP)។ ហ្វូងបាតុករ ចង់ស្នើសុំឱ្យរដ្ឋាភិបាលច្រានចោលគម្រោងនេះ ដែលសភាត្រូវផ្តើមជជែកពិចារណា ចាប់ពីដើមសប្តាហ៍ក្រោយទៅ។
ចុះផ្សាយនៅថ្ងៃ៖
កិច្ចព្រមព្រៀងអន្តរប៉ាស៊ីហ្វិកជាអ្វី ? ដៃគូជាប្រទេសនៅជាប់មហាសមុទ្ទប៉ាស៊ីហ្វិក ចង់បង្កើតតំបន់ផ្តោះប្តូរពាណិជ្ជកម្មសេរី ដ៏ធំជាងបង្អស់មួយ ដែលមានសមាជិកចូលរួមដល់ទៅ ១២ប្រទេស កាណាដា ព្រុយណេ ឈីលី ម៉ាឡេស៊ី ម៉ិចស៊ិក នូវែលហ្សេឡង់ ប៉េរ៉ូ សិង្ហបុរី វៀតនាម សហរដ្ឋអាមេរិក ជប៉ុន និងអូស្ត្រាលី។ សមាជិកទាំង១២ប្រទេស ដែលតំណាងឱ្យ៤០%នៃសេដ្ឋកិច្ចពិភពលោក បានព្រមព្រៀងគ្នាកាលពីតុលាលើកិច្ចព្រមព្រៀងអន្តរប៉ាស៊ីហ្វិកនេះ Trans Pacific Partnership (TPP) ក្រោមមោទនភាពដ៏ខ្លាំងក្លារបស់សហរដ្ឋអាមេរិក។
ផ្តួចផ្តើមឡើងដោយវ៉ាស៊ីនតោន គ្មានចិននិងដើម្បីប្រកួតប្រជែងជាមួយចិន កិច្ចព្រមព្រៀងនេះនឹងត្រូវចុះហត្ថលេខាជាផ្លូវការនៅថ្ងៃទី ៤កុម្ភៈ ខាងមុខនៅនូវែលហ្សេឡង់ បន្ទាប់មកប្រទេសជាសមាជិកទាំងអស់ មានពេលពីរឆ្នាំសម្រាប់ផ្តល់សច្ចាប័ន មុននឹងកិច្ចព្រមព្រៀងអាចមានសុពលភាពបាន។
សភាម៉ាឡេស៊ី ត្រូវផ្តល់សេចក្តីសម្រេចឱ្យរដ្ឋាភិបាល ក្នុងការចុះហត្ថលេខា លើកិច្ចព្រមព្រៀងនេះ នៅសប្តាហ៍ក្រោយ ប៉ុន្តែបក្សប្រឆាំងបានចោទប្រកាន់ថា កិច្ចព្រមព្រៀងនេះគំរាមកំហែងដល់សិទ្ធិពលករ និងបរិស្ថាន។
ក្រោមការអំពាវនាវរបស់បក្សនយោបាយ និងអង្គការក្រៅរដ្ឋាភិបាល បាតុករជាច្រើនពាន់នាក់ ក្នុងឯកសណ្ឋានអាវយឺត “ប្រឆាំងនឹងកិច្ចព្រមព្រៀងអន្តរប៉ាស៊ីហ្វិក” បានប្រមូលផ្តុំគ្នា ខ្លះនៅមុខទីលានឯករាជ្យកណ្តាលក្រុងកូឡាឡាំពួរ ក្រុមខ្លះទៀត មានគ្នាដល់ទៅជាងបីពាន់ នាក់ភាគច្រើនជាសកម្មជនបក្សប្រឆាំង អ៊ីស្លាមប៉ង់ម៉ាឡេស៊ី ផ្តុំគ្នាស្តាប់សុន្ទរកថារិះគន់កិច្ចព្រមព្រៀង។ តំណាងបក្សប្រឆាំងដ៏ល្បីល្បាញម្នាក់បានស្រែក ចាត់ទុកកិច្ចព្រមព្រៀង ថារំលោភអធិបតេយ្យភាពម៉ាឡេស៊ី នាំចំណេញតែដល់អ្នកមាន ដណ្តើមទីផ្សារការងារ ... សម្រាប់ក្រុមអ្នកប្រឆាំង នៅពេលចរចាមានលាក់រឿងសម្ងាត់ច្រើន និងមានការយល់ព្រមការពារផលប្រយោជន៍ក្រុមហ៊ុនបរទេសច្រើន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ