ចិនចោទប្រកាន់ជនជាតិកាដាណាម្នាក់ពីបទចារកិច្ច
អាជ្ញាធរចិនបានចោទប្រកាន់ជាផ្លូវការនៅថ្ងៃនេះ ជនជាតិកាណាដាម្នាក់ រស់នៅជាប់ព្រំដែនកូរ៉េខាងជើង ជាមួយភរិយា ពីបទចារកិច្ច និងលួចការណ៍សម្ងាត់រដ្ឋ។ នេះបើតាមសេចក្តីប្រកាសរបស់រដ្ឋាភិបាលក្រុងប៉េកាំង នៅថ្ងៃសុក្រទី ២៩មករា ២០១៦។ ការចោទប្រកាន់ពីបទលួចការណ៍សម្ងាត់រដ្ឋ មានអត្ថន័យទូលំទូលាយណាស់ នៅប្រទេសចិន និងបើនៅកូរ៉េខាងជើង ទណ្ឌកម្មមានកាន់តែធ្ងន់ធ្ងរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥២
គេវីន ហ្ការ៉ាត់ Kevin Garratt ដែលអាជ្ញាធរចិនបានចាប់ខ្លួន កាលពីឆ្នាំ២០១៤ ក្នុងពេលជាមួយនឹងភរិយា តែនាងបានទទួលសេរីភាពវិញភ្លាម ក្រោយពីបានបង់ប្រាក់លួស ត្រូវជាប់ចោទជាផ្លូវការនៅថ្ងៃសុក្រនេះ ពីបទចារកិច្ចនិងលួចការណ៍សម្ងាត់រដ្ឋ។ បើតាមការអង្កេតរបស់អាជ្ញាធរ ជនជាតិកាណាដារូបនេះមានផ្សំគំនិតក្នុងការលួចប្រមូលព័ត៌មានទៅឱ្យភ្នាក់ងារចារកិច្ចកាណាដា។ នេះបើតាមគូសបញ្ជាក់របស់អ្នកនាំពាក្យក្រសួងការបរទេសចិន ក្នុងសន្និសីទកាសែតប្រចាំថ្ងៃ ដែលបានបដិសេធដាច់ខាតថា ការចាប់ខ្លួននិងចោទប្រកាន់ពលរដ្ឋកាណាដានេះ គ្មានពាក់ព័ន្ធនឹងសកម្មភាពសាសនារបស់ជនជាប់ចោទឡើយ។
សូមបញ្ជាក់ថា គេវីន ហ្ការ៉ាត់ បានមករស់នៅក្នុងខេត្តដង់ដុង ជាប់ព្រំដែនកូរ៉េខាងជើង ជាមួយភរិយា តាំងពីឆ្នាំ១៩៨៤មក និងរកស៊ីបើកហាងកាហ្វេ។ ជឿស៊ុបក្នុងគ្រិស្តសាសនា ប្តីប្រពន្ធពីរនាក់នេះ មានសកម្មភាពមនុស្សធម៌យ៉ាងប្រញឹក ខាងដឹកនាំជញ្ជូនជំនួយទៅឱ្យកូរ៉េខាងជើង។ ការចាប់ខ្លួន គេវីន ហ្ការ៉ាត់ ប្រព្រឹត្តទៅតែមួយ សប្តាហ៍ក្រោយពី កាណាដាបានចោទចិនក្នុងសំណុំរឿងចោរលួចតាមប្រព័ន្ធព័ត៌មានវិទ្យា។ ដូច្នេះសម្រាប់កាណាដា ការចាប់គេវីន គឺល្បែងឆ្ពិនភ្នែករបស់ប៉េកាំងដើម្បីសងសឹកកាណាដាតែប៉ុណ្ណោះ។
ខេត្តដង់ដុង ជាតំបន់យោធាយ៉ាងរសើបបំផុត ! ជាច្រកផ្លូវដ៏សំខាន់ មានស្ពានមិត្តភាព ភ្ជាប់ទំនាក់ទំនងរវាងប៉េកាំងនិងព្យុងយ៉ាង។ ហេតុដូច្នេះហើយបានជាប៉េកាំងប្រុងប្រយ័ត្នខ្លាំង ជាពិសេសចំពោះអង្គការ សាសនាផ្សេងៗ ខ្លាចប៉ះពាល់ដល់អំណាចបក្សកុម្មុយនិស្ត។ ក្រោមផ្លាកសន្តិសុខជាតិ មានជនបរទេសជាច្រើននាក់ហើយ ដែលចិនបានចាប់ខ្លួន។ ចុងក្រោយជនជាតិអាមេរិកដើមកំណើតចិនម្នាក់ ជាប់ទោសលួចការសម្ងាត់រដ្ឋ ត្រូវបានថ្កោលទោសជាប់ពន្ធនាគារ៧ឆ្នាំ។ គ្រាន់តែផុតទោសកាលពីឆ្នាំ២០១៥ភ្លាម ត្រូវបណ្តេញចេញទឹកដីចិនភ្លែត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ