នៅប៉ាគីស្ថាន ស្ត្រីដែលបង្ខូចកិត្តិយសគ្រួសារអាចនឹងរងទោសដល់ស្លាប់
ការបង្ខូចកិត្តិយសគ្រួសារ នៅតែជាទោសដ៏ធំ និងមានច្រើនករណីនៅឡើយ សម្រាប់សង្គមប៉ាគីស្ថាន។ ក្នុងមួយឆ្នាំ២០១៥កន្លងទៅនេះ ស្ត្រីជាង១០០០នាក់ បានបាត់បង់ជីវិត ដោយហេតុតែបានធ្វើឱ្យគ្រួសារខូចកិត្តិយស ហ៊ានស្រលាញ់ប្រុសចិត្តឯង ឬល្មើសនឹងប្រុសក្នុងផ្ទះ។ ថ្វីបើបញ្ហាកិត្តិយសនៅបន្តអនុវត្តក្នុងសង្គមប៉ាគីស្ថានរហូតមកទល់នឹងពេលនេះមែន តែហេតុការណ៍បែបនេះ លែងប្រព្រឹត្តទៅស្ងប់ស្ងាត់ដូចមុនទៀតហើយ សារព័ត៌មានផ្តើមបំផុសនិងផ្សព្វផ្សាយដំណឹងតាមប្រព័ន្ធឃោសនា។
ចុះផ្សាយនៅថ្ងៃ៖
ស្តាប់ - ០២:១៤
គណៈកម្មការសិទ្ធិមនុស្សដែលជាស្ថាប័នឯករាជ្យមួយរបស់ប៉ាគីស្ថាន បានចេញផ្សាយតួលេខក៏គួរឱ្យរន្ធត់ ! ក្នុងមួយឆ្នាំ២០១៥កន្លងទៅនេះ មានស្ត្រីជិត១១០០នាក់ បានក្រុមគ្រួសារសម្លាប់ ព្រោះស្ត្រីទាំងនោះហ៊ានល្មើលបង្គាប់ឪពុក ឬបងប្រុស ទៅស្រលាញ់ប្រុសដោយចិត្តឯង ឬទៅរាប់អានសង្គមខាងក្រៅដោយគ្មានការអនុញ្ញាតពីអ្នកទទួលខុសត្រូវភេទប្រុសក្នុងផ្ទះ។ ទង្វើបែបនេះគឺជាការបង្ខូចកិត្តិយសគ្រួសារ។
ក្រៅនេះ នៅមានស្ត្រីជាច្រើនផ្សេងទៀតត្រូវរងអំពើហិង្សា និងការវាយប្រហារទឹកអាស៊ីត ក្នុងហេតុផលតែមួយគឺបង្អាប់កិត្តិយសគ្រួសារ។ តួលេខនេះកាន់តែគួរព្រួយបារម្ភទៀត ព្រោះមានគ្រួសារជាច្រើនទៀតមិនបានទៅរាយការណ៍ និងលាក់មិនចេញឈ្មោះទេ។
កាលពីខែកុម្ភៈ២០១៦ ប៉ាគីសា្ថនបានបោះឆ្នោតច្បាប់ថ្កោលទោស យ៉ាងច្បាស់លាស់អំពើហិង្សាក្នុងគ្រួសារ នៅខេត្ត Penjab ក្រោមផ្លាកបង្ខូចកិត្តិយសគ្រួសារ ដែលជាប្រពៃណីចាស់គំរិតរបស់ប៉ាគីស្ថាន។ ប៉ុន្តែសម្ព័ន្ធបក្សសាសនាបានធ្វើគ្រប់យ៉ាង ដើម្បីលុបច្បាប់នេះចោលវិញ ដោយសំអាងដើម្បីការពារអ៊ីស្លាម និងសិទ្ធិរបស់បុរសក្នុងសហគមន៍នេះ។
ភាពយន្តឯកសារខ្លីមួយចងក្រងឡើងដោយស្ត្រីប៉ាគីស្ថាន ស្តីពីឧក្រិដ្ឋកម្មកិត្តិយសគ្រួសារ ដែលបានទទួលរង្វាន់អូស្កា ទំនងជាប្រភពផ្តល់សេចក្តីក្លាហានដល់ស្ត្រីឱ្យហ៊ានចេញមុខបរិហារទង្វើហិង្សាលើបង្ក្រាបស្ត្រីឱ្យរណបបុរសនេះ។ កាលពីថ្ងៃអង្គារមុន ជាលើកទីមួយមានការដាក់ទោស បុរសម្នាក់ដែលដោយអាងសិទ្ធិជាបងមិនពេញនឹងអាពាហ៍ពិពាហ៍ បានសម្លាប់ប្អូនស្រី ត្រូវទទួលទោសប្រហារជីវិត។ មិនតែប៉ុណ្ណោះសារព័ត៌មាន ក៏ផ្តើមចុះផ្សាយខ្លះៗអំពីបណ្តឹងរបស់ស្ត្រីប្រឆាំងនឹងប្តី។ មានសមាគមជាច្រើនត្រូវបានបង្កើតឡើងនិង បានចេញមុខជួយការពារនិងលាក់ស្ត្រី ដែលស្ម័គ្រចិត្តចេញធ្វើសក្ខីកម្មប្រឆាំងនឹងគ្រួសារឯងនៅចំពោះមុខតុលាការ។
ប៉ុន្តែទម្ងន់ទម្លាប់ប្រពៃណីនេះមានសម្ពាធធ្ងន់ធ្ងរខ្លាំងណាស់នៅប៉ាគីស្ថាន ព្រោះការបះបោររបស់ស្ត្រីប្រឆាំងនឹងបុរសច្រើនតែដោះស្រាយនៅក្នុងផ្ទះច្រើនជាងនៅតុលាការ។ ច្បាប់អ៊ីស្លាម Charia អាចនឹងត្រូវអនុវត្តភ្លាមដោយគ្មានបង្អង់ នៅក្នុងរង្វង់គ្រួសារ និងថ្នាក់ភូមិឋានផ្ទាល់តែម្តង សម្លាប់ស្ត្រីដែលហ៊ានល្មើសនឹងបុរស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ