រដ្ឋាភិបាលភូមាថ្មីដោះលែងអ្នកទោសនយោបាយ តាមពាក្យរបស់លោកស្រីអ៊ុងសានស៊ូជី
និស្សិតភូមាជិត៧០នាក់ ដែលអាជ្ញាធរចាស់ បានចាប់ដាក់ពន្ធនាគារ ព្រោះបាននាំគ្នាធ្វើបាតុកម្មអហិង្សា កាលពីខែមីនា ឆ្នាំ២០១៥ ត្រូវបានដោះលែងឱ្យមានសេរីភាពវិញហើយ នៅថ្ងៃសុក្រទី ៨ មេសា ២០១៦។ ការផ្តល់សេរីភាពដល់អ្នកទោសនយោបាយ គឺជាឆន្ទៈរបស់លោកស្រី អ៊ុង សានស៊ូជី និងជាអាទិភាពមួយរបស់រដ្ឋាភិបាលស៊ីវិលថ្មី ប្រសូតចេញពីការបោះឆ្នោត។
ចុះផ្សាយនៅថ្ងៃ៖
ស្តាប់ - ០២:២០
ក្រោយពីរង់ចាំអស់ជាច្រើនម៉ោង នៅមុខពន្ធនាគារ នៅទីបំផុតក្រុមគ្រួសាររបស់អ្នកទោស អាចផ្ទុះក្តីរីករាយ និងធូរស្បើយក្នុងចិត្តបាន ពេលឮសេចក្តីប្រកាសរបស់ចៅក្រមតុលាការថារ៉ាវ៉ឌី ដោះលែងនិស្សិតចំនួន ៦៩នាក់។ ប៉ុន្តែនិស្សិតខ្លះទៀត ក្នុងនោះមានម្នាក់ជាមេដឹកនាំក្រុមផង ត្រូវបន្តជាប់ក្នុងពន្ធនាគារដដែលព្រោះពួកគេមានជាប់រឿងក្តីក្តាំផ្សេងទៀតក្នុងតុលាការ។
និស្សិតដែលបានរួចខ្លួនមួយចំនួនធំ បាននាំគ្នាទៅទីលានកប់ខ្មោចភ្លាម ដើម្បីគោរពដល់វិញ្ញាណក្ខន្ធនិស្សិតផ្សេងទៀតដែលបានបាត់បង់ជីវិត ក្រោមកម្លាំងបង្ក្រាបរបស់អាជ្ញាធរយោធា។ សូមបញ្ជាក់ថា ថ្វីបើភូមាបានប្រកាសតាំងខ្លួនជារដ្ឋាភិបាលស៊ីវិល តាំងពីឆ្នាំ២០១១មកមែន និងធ្វើការដោះលែងអ្នកទោសនយោបាយខ្លះៗមែន ប៉ុន្តែរដ្ឋាភិបាលពាក់កណ្តាលស៊ីវិលនេះ បានចាត់វិធានការរឹតបន្តឹង បង្ក្រាបក្រុមអ្នកប្រឆាំងខ្លាំង នៅពេលមុនពេលបោះឆ្នោតសភាខែវិច្ឆិកា២០១៥ ពីបទធ្វើបាតុកម្មបះបោរ ដែលអាចនឹងត្រូវជាប់ទោសដល់ជាង១០ឆ្នាំ។
បើតាមអង្គការជំនួយអ្នកទោសនយោបាយ ដោយរាប់ទាំងនិស្សិត៦៩នាក់នេះផង ភូមាមានឃុំឃាំងអ្នកទោសមនសិការដល់ទៅ ១២១នាក់ និង៤០៨នាក់ កំពុងប្រឈមនឹងការកាត់ទោសពាក់ព័ន្ធនឹងសកម្មភាពនយោបាយ។ គ្រប់គ្នារំពឹងយ៉ាងខ្លាំងលើរដ្ឋាភិបាលថ្មី និងពិសេសលើលោកស្រី ស៊ូជី ដែលធ្លាប់ជាប់ជាអ្នកទោសនយោបាយអស់រយៈពេល១៥ឆ្នាំ ក្នុងការស្វែងរកសេរីភាពដល់អ្នកទោសនយោបាយ និងធានារ៉ាប់រងថា ភូមាគ្មានឃុំឃាំងអ្នកទោសមនសិការណាក្រោយចំរ៉ឹងដែកទៀតទេ។
មិនអាចក្លាយជាប្រធានាធិបតី ព្រោះរនាំងរដ្ឋធម្មនុញ្ញ លោកស្រី អ៊ុងសានស៊ូជី មិនអាចសម្រេចធ្វើការដោះលែងអ្នកទោសដោយផ្ទាល់ទេ ប៉ុន្តែជាមួយនឹងតួនាទីជាទីប្រឹក្សារដ្ឋពិសេស លោកស្រីអាចចង្អុលបង្ហាញទិសដល់រដ្ឋាភិបាលបាន។ ការដោះលែងអ្នកទោសនៅថ្ងៃនេះ គឺជាប្រសិទ្ធិភាពជាក់ស្តែង នៃតួនាទីរបស់លោកស្រី អ៊ុង សានស៊ូជី ដែលកាលពីថ្ងៃព្រហស្បតិ៍ បានបង្ហើបអំពីលទ្ធភាពនៃការដោះលែងអ្នកទោសនយោបាយ សកម្មជននយោបាយ ជាទ្រង់ទ្រាយធំ ក្នុងពេលឆាប់ៗ ហើយមួយថ្ងៃក្រោយមក ស្រាប់តែមានការដោះលែងមែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ