ភូមាដោះលែងអ្នកទោសនយោបាយ ៦៣នាក់ ក្នុងឱកាសបុណ្យចូលឆ្នាំ
នាឱកាសបុណ្យចូលឆ្នាំថ្មីជាប្រពៃណីភូមា ប្រធានាធិបតីថ្មី លោក ទិន ចវ ប្រកាសដោះលែងអ្នកទោសនយោបាយ យ៉ាងហោចណាស់ ៦៣នាក់ នៅថ្ងៃអាទិត្យនេះ។ នេះគឺជាសេចក្តីសម្រេចនយោបាយដ៏សំខាន់ដំបូង របស់លោកប្រធានាធិបតី តាំងពីបានឡើងចូលកាន់តំណែង កាលពីចុងខែមីនាមក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
នៅក្នុងសេចក្តីថ្លែងការណ៍ ដែលមានបង្ហោះផ្សាយក្នុងទំព័រសង្គមហ្វេសប៊ូក ប្រធានាធិបតីបានប្រកាសថានឹងធ្វើការលើកលែងទោសដល់ទណ្ឌិតចំនួន ៨៣នាក់ ! វិធានការនេះមានកម្មវត្ថុតែមួយគឺដើម្បីសន្តិភាព និងភាពរីករាយ ព្រមទាំងដើម្បីផ្តល់សន្ទុះដល់ការផ្សះផ្សាជាតិ។
បើតាមឯកសារនោះ នៅក្នុងចំណោមអ្នកទោសដែលត្រូវដោះលែងទាំងអស់ មាន៦៣នាក់ ជាអ្នកទោសមនសិការ។ នេះបើតាមការបញ្ជាក់របស់សមាគមជំនួយអ្នកទោសនយោបាយ។
នៅក្នុងសុន្ទរកថាទៅកាន់ប្រជាជាតិនាឱកាសបុណ្យចូលឆ្នាំថ្មី លោក ទិន ចវ បានគូសបញ្ជាក់ ក្នុងនាមជាប្រធានាធិបតី ជាអ្នកធ្វើសេចក្តីសម្រេចចិត្ត ថារដ្ឋាភិបាលរបស់លោក នឹងធ្វើគ្រប់យ៉ាងដាច់ខាត ដោះលែងអ្នកទោសនយោបាយឱ្យអស់ពីពន្ធនាគារ រាប់ទាំងសកម្មជន និងនិស្សិតដែលកំពុងរង់ចាំការកាត់ទោសផង។
លោក ទិន ចវ គឺជាមិត្ត និងជាសហការីដ៏ជំនិតបំផុតរបស់លោកស្រី អ៊ុងសានស៊ូជី ដែលបានក្លាយជាប្រធានាធិបតីភូមា កាលពីចុងខែមីនា ត្រូវបានគេចាត់ទុកថាជារូបតំណាងលោកស្រីជ័យលាភីរង្វាន់ណូបែលសន្តិភាព ដែលដោយរនាំងរដ្ឋធម្មនុញ្ញាមិនអាចធ្វើប្រមុខដឹកនាំប្រទេសបាន។ ពេលនេះលោកស្រីមានថានៈត្រឹមតែជារដ្ឋមន្ត្រីការបរទេសនិងអប់រំ ព្រមទាំងមានតួនាទីសំខាន់មួយទៀតជាទីប្រឹក្សារដ្ឋពិសេស។
តាំងពីបក្សសម្ព័ន្ធជាតិដើម្បីលទ្ធិប្រជាធិបតេយ្យ របស់លោកស្រី អ៊ុងសានស៊ូជី បានក្លាយជាអ្នកដឹកនាំប្រទេសមក អាជ្ញាធរនេះបានដោះលែង និងលុបចោលបណ្តឹងប្រឆាំងនឹងអ្នកនយោបាយជាងពីររយនាក់ ក្នុងនោះនិស្សិតរាប់សិបនាក់ ចាប់ខ្លួនព្រោះបានធ្វើបាតុកម្មប្រឆាំងនឹងកំណែទម្រង់អប់រំរបស់រដ្ឋាភិបាលចាស់ ក៏ត្រូវបានទទួលសេរីភាពវិញ។
មានសកម្មជនបក្សសម្ព័ន្ធប្រជាធិបតេយ្យ ជាច្រើនរូបខ្លាំងណាស់ ធ្លាប់ជាប់ក្រោយរនាំងដែក ព្រោះបុព្វហេតុនយោបាយ។ លោកស្រី អ៊ុងសានស៊ូជីជាមេបក្សផ្ទាល់ផង ក៏ធ្លាប់ជាប់ឃុំឃាំងក្នុងគេហដ្ឋាន អស់ជាង១៥ឆ្នាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ