យន្តហោះMH១៧ ៖ ប៉ូលិសហូឡង់ចេញឆែកឆេរ នៅអាល្លឺម៉ង់និងស្វ៊ីស ក្រោយការអង្កេតឯកជន
សំណុំរឿងអង្កេតលើការធ្លាក់យន្តហោះម៉ាឡេស៊ីMH១៧ ធ្លាក់នៅប្រទេសអ៊ុយក្រែន កាលពីឆ្នាំ២០១៤ បានកម្រើកឡើងវិញបន្តិចនៅពេលនេះ។ នៅសប្តាហ៍នេះ ប៉ូលិសបានចេញឆែកឆេរ នៅតាមទីតាំងជាច្រើនកន្លែងក្នុងប្រទេសអាល្លឺម៉ង់ និងស្វ៊ីស ព្រមទាំងការរឹបអូសឯកសារបានមួយចំនួនធំទៀត។ ការឆែកឆែរនេះធ្វើឡើងបន្ទាប់ពីប៉ូលិសបានដឹងថាមានការស៊ើបអង្កេតឯកជនមួយនៅអាល្លឺម៉ង់។ នេះបើការគូសបញ្ជាក់របស់អាជ្ញាធរនិងសារព័ត៌មានហូឡង់ កាលពីម្សិលមិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៥
នៅក្នុងចំណោមវត្ថុតាងដែលរឹបអូសបាន កាលពីថ្ងៃពុធមុន នៅអាល្លឺម៉ង់ មានឯកសារខ្លះសំខាន់មែនទែន ដែលអាចជួយក្រុមអង្កេតឱ្យចូលជិតអ្នកបាញ់ទម្លាក់យន្តហោះម៉ាឡេស៊ីMH១៧។ នេះបើតាមសារព័ត៌មានហូឡង់ដ៏មានប្រជាប្រិយភាព De Telegraaf ដែលបានគូសបញ្ជាក់បន្ថែមទៀតថា ប៉ូលិសហូឡង់អាចចេញធ្វើប្រតិបត្តិការឆែកឆេរបានក៏ព្រោះតែការងាររបស់អ្នកស៊ើបអង្កេតឯកជនម្នាក់។
អ្នកស៊ើបអង្កេតឯកជន ឈ្មោះ Josef R. ដែលមិនដឹងសំងំលាក់ខ្លួននៅទីណានាពេលនេះ ត្រូវបានជួលដោយមហាសេដ្ឋីមិនស្គាល់មុខម្នាក់ ក្នុងតម្លៃ៣០លានអឺរ៉ូ ឱ្យទៅស៊ើបរកមូលហេតុនៃការធ្លាក់យន្តហោះ។ ធ្វើការបានពីរខែ អ្នកស៊ើបឯកជន បានទទួលប្រាក់១៧លាន។ ដោយហេតុតែប៉ូលិសហូឡង់ក៏កំពុងស្វែងរកមូលហេតុនៃការធ្លាក់យន្តហោះនោះដែរ ទើបតុលាការហូឡង់សម្រេចចុះទៅឆែកឆែរផ្ទះ ឈ្លបឯកជននោះ នៅអាល្លឺម៉ង់ និងរាលដល់ស្វ៊ីស ព្រោះមានហិបសំងាត់មួយលាក់នៅធនាគារក្រុងZurich ដែលតុលាការស្វ៊ីសត្រូវសម្រេចថាត្រូវបញ្ជូនមកឱ្យហូឡង់ឬអត់។
ក្រសួងយុត្តិធម៌ហូឡង់ បានបង្ហើបថា ជាព័ត៌មានដែលបញ្ជាក់ថាដៃគូអ្នកបាញ់យន្តហោះMH១៧ បានទាក់ទងមកការិយាល័យស៊ើបអង្កេតឯកជន ប្រាប់ថាមាន “ព័ត៌មានដែលឈ្លបចង់ដឹង”។
ក្រុមអង្កេតអន្តរជាតិដឹកនាំដោយហូឡង់ ធ្លាប់បានអះអាងយន្តហោះម៉ាឡេស៊ីMH១៧ ធ្លាក់ដោយសារមីស៊ីលប៊ូកផលិតនៅរុស្ស៊ី និងបានបាញ់ចេញពីតំបន់កាន់កាប់ដោយក្រុមផ្តាច់ទឹកដីអ៊ុយក្រែនស្និទ្ធនឹងរុស្ស៊ី។ លទ្ធផលបឋមនឹងត្រូវដឹងនៅរវាងបីបួនខែទៀត ដោយអ្នកឯកទេសកំពុងរង់ចាំព័ត៌មានមកពីខាងរុស្ស៊ី។ ការអង្កេតមានកម្មវត្ថុតាមរកអត្តសញ្ញាណជនដៃ និងប្រភពនៃទីតាំងបាញ់មីស៊ីល ប៉ុន្តែអ្នកជំនាញជាច្រើន សង្ស័យថាគ្មានថ្ងៃដែលជនដៃដល់នឹងត្រូវចាប់ខ្លួននិងផ្តន្ទាទោសនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ