ចិនស្ថាបនាផ្លូវសូត្រថ្មីភ្ជាប់មកដល់មាត់ទ្វារអឺរ៉ុបតាមរយៈប៉ូឡូញ
ចុះផ្សាយនៅថ្ងៃ៖
ស្តាប់ - ០៤:២៣
ប្រធានាធិបតីចិន លោក ស៊ី ជីនពីង បានបិទបញ្ចប់ទស្សនកិច្ចមួយជុំ បីថ្ងៃនៅប្រទេសប៉ូឡូញហើយ បន្ទាប់ពីបានជួបពិភាក្សាជាមួយថ្នាក់ដឹកនាំកំពូលៗនិងសំខាន់ៗរបស់ប៉ូឡូញ។ ជាដំណើរទស្សនកិច្ចដែលផ្តោតខ្លាំងទៅលើវិស័យសេដ្ឋកិច្ចពាណិជ្ជកម្ម តែប្រកបដោយនិម្មិត្តរូបបំផុតសម្រាប់វិស័យកិច្ចសហប្រតិបត្តិទ្វេភាគី នាពេលអនាគត។ សម្រាប់ចិន ប៉ូឡូញ ជាដៃគូសេដ្ឋកិច្ចប្រកបដោយយុទ្ធសាស្ត្រដ៏សំខាន់ ក្នុងការសម្រេចបំណងស្ថាបនាផ្លូវសូត្រថ្មី ភ្ជាប់ពីអាស៊ីមកដល់បេះដូងអឺរ៉ុប។
ផ្លូវពាណិជ្ជកម្មពីចិនមកខាងទិសអឺរ៉ុប ត្រូវបានបង្កើតឡើងតាំងពីយូរលង់ណាស់មកហើយ ដោយភ្ជាប់ចេញពីភាគខាងលិចប្រទេសចិន ដល់ប្រទេសតួកគីបច្ចុប្បន្ន ក្នុងជំនួញសូត្រ ទើបត្រូវបានជាប់ឈ្មោះថា ផ្លូវសូត្រ រហូតមក។ ប៉ុន្តែពេលនេះចិនចង់ផ្តល់សន្ទុះនិងពង្រីកផ្លូវពាណិជ្ជកម្ម ឱ្យបានកាន់តែវែង កាន់ឆ្ងាយ ភ្ជាប់មកដល់អឺរ៉ុប និងដល់ទ្វីបអាហ្វ្រិក ក្នុងក្របខ័ណ្ឌនៃផែនការភូមិសាស្ត្រយុទ្ធសាស្ត្រ ដែលចិនប្រសិទ្ធិនាមថា “ខ្សែក្រវ៉ាត់ និងផ្លូវ”។
ហើយគឺប៉ូឡូញ ដែលនឹងត្រូវមកដើរតួប្រកបដោយយុទ្ធសាស្ត្រនេះ។ សម្រាប់លោក ស៊ីជីនពីង ប៉ូឡូញ មានទីតាំងភូមិសាស្ត្រល្អ នៅចំចំណុចប្រសព្វនៃ ផ្លូវសូត្រ មានចាស់ និងខ្សែផ្លូវនាំទៅកាន់សមុទ្ទបាល់កង់ និងសមុទ្ទមេឌីទែរ៉ាណេ។ ពោលគឺប៉ូឡូញ ជាទ្រព្យសកម្មសំខាន់បំផុតសម្រាង់ស្ថាបនាឬផ្សារភ្ជាប់ទំនាក់ទំនងរវាងអាស៊ីនិងអឺរ៉ុប។ ប៉ូឡូញខ្លួនឯងក៏មើលឃើញអំពីសារៈសំខាន់ និងចង់ប្រែក្លាយប្រទេស ឱ្យទៅច្រកទ្វារដែលចិនត្រូវឆ្លងកាត់ដើម្បីចេញចូលអឺរ៉ុបដែរ។
ដោយយល់អំពីតម្លៃនេះហើយ ទើបចិនចង់បានប៉ូឡូញយកមកធ្វើជាប្រទេសដៃគូសេដ្ឋកិច្ច ដោយនៅទីបំផុត ប្រមុខរដ្ឋទាំងពីរប្រទេសបានចុះហត្ថលេខាលើសេចក្តីថ្លែងការណ៍រួម ពង្រឹងភាពជាដៃគូយុទ្ធសាស្ត្រនឹងគ្នាលើគ្រប់វិស័យទាំងអស់។ លោកស៊ីជីនពីង បានអំពាវនាវឱ្យ ប៉ូឡូញ ទាញចំណេញមួយទំហឹងពីធនាគារវិនិយោគសម្រាប់ហេដ្ឋារចនាសម្ព័ន្ធ AIIB ក្នុងនាមជាប្រទេសសមាជិក។ ធនាគារវិនិយោគហេដ្ឋារចនាសម្ព័ន្ធផ្តួចផ្តើមបង្កើតឡើងដោយចិន -ចូលរួមដោយប្រទេសនៅអឺរ៉ុបមួយចំនួនធំ លើកលែងតែជប៉ុននិងអាមេរិក- ដែលនឹងត្រូវចាប់ដំណើរការនៅដើមឆ្នាំ ជាស្ថាប័នប្រកួតប្រជែងនឹងធនាគារពិភពលោក ឬមូលនិធិរូបិយវត្ថុអន្តរជាតិ។ ធនាគារនេះនឹងមានមូលនិធិសម្បើមជាងគេនៅលើពិភពលោក ដែលប៉ូឡូញអាចពិភាក្សារកទុនវិនិយោគទាំងផ្ទាំងទាំងផែនតែម្តង ជាមួយប៉េកាំង ក្នុងទំហំរាប់សិបពាន់លាន ទៅថ្ងៃមុខ ក្នុងផ្នែកហេដ្ឋារចនាសម្ព័ន្ធ។
ថ្វីបើតាំងពីឆ្នាំ២០១៣មក មានរថភ្លើងដឹកទំនិញរត់ទៅមកពីចិនមក-ទៅប៉ូឡូញមែន តែកាលពីថ្ងៃចន្ទ ទី ២០ មិថុនា ថ្ងៃផ្តើមទស្សនកិច្ចផ្លូវការរបស់លោកស៊ី ជីនពីង នៅក្រុងវ៉ាសូវី រថភ្លើងថ្មីស្រឡាង ប្រថាប់ត្រា China Railway Express បានចូលចតជាលើកទីមួយក្នុងចំណតអយស្ម័យយានក្រុងវ៉ាសូវី ដោយមានប្រធានាធិបតីទាំងពីររង់ចាំទទួលស្វាគមន៍។ ផ្លូវរថភ្លើង នឹងក្លាយជាមធ្យោបាយដឹកជញ្ជូនតភ្ជាប់ប្រទេសទាំងពីរក្នុងអស់រយៈពេលតែ១១ថ្ងៃ ទល់នឹងជាង៤០ថ្ងៃ តាមផ្លូវទឹកពីមុន។ នេះមិនចាត់ទុកថាជានិម្មត្តរូបដ៏សំខាន់នៃកិច្ចសហប្រតិបត្តិការទ្វេភាគីចិន-ប៉ូឡូញទេឬ?!
ការអភិវឌ្ឍទំនាក់ទំនងជាមួយចិន ក៏ឆ្លើយតបបានទៅនឹងសេចក្តីត្រូវការរបស់ប៉ូឡូញវិញដែរ។ ប៉ូឡូញ ចង់មានសេរីភាពនិងដើរបានឆ្ងាយឆ្លងព្រំដែនអឺរ៉ុប ដើម្បីស្វែងរកទុនផង និងដើម្បីស្វែងរកទីផ្សារថ្មី បញ្ចេញលក់ផលិតផលផង។
ក្នុងពេលបំពេញទស្សនកិច្ចបី ដែលអមដំណើរដោយប្រធានក្រុមហ៊ុននិងសហគ្រាសគ្រាក់ៗ កិច្ចសន្យាជាច្រើនត្រូវចុះហត្ថលេខា។ កិច្ចសហប្រតិបត្តិការលើផ្នែកបទដ្ឋានសុវត្ថិភាពចំណីអាហារ ការដាក់ទណ្ឌកម្មលើទំនិញផ្លែឈើ ក៏នឹងត្រូវលើកចេញ។ ប៉ូឡូញបានត្រៀមខ្លួនជាស្រេចនឹងធ្វើខ្លួនជាកន្ត្រកចាំទទួលទុនវិនិយោគចិន ដោយចង់បង្កើតតំបន់ផ្តោះប្តូរសេដ្ឋកិច្ចពិសេសជាមួយចិន។
មានសេដ្ឋកិច្ចរឹងមាំខ្លាំងជាងគេ ប្រចាំតំបន់ ប៉ូឡូញ មានងារជាចិនរបស់អឺរ៉ុបខាងកើត។ តាំងពី២៥មកហើយ ដែលប៉ូឡូញ បានស្គាល់កំណើនសេដ្ឋកិច្ចកើនឡើង ស្ទើរគ្មានដាច់សោះ។ កំណើតសេដ្ឋកិច្ចឆ្នាំនេះ និងឆ្នាំក្រោយអាចមានដល់ទៅ ៣,៧%។ ហេតុដូច្នេះហើយបានប៉ូឡូញសង្ឃឹមថាប៉េកាំងនឹងធ្វើវិនិយោគខ្លាំងនិងច្រើនជាងមុន ក្នុងរយៈពេលយូរ នៅពេលខាងមុខ មិនដូចអ្វីធ្លាប់មានកន្លងមក ដែលមានត្រឹមការសន្យា ឬជាការវិនិយោគរបស់ក្រុមហ៊ុនតូចៗឡើយ។ ប៉ូឡូញ ចង់ធ្វើជាច្រកទ្វារសម្រាប់ចិនចេញចូលអឺរ៉ុប ក្នុងអត្ថន័យជានិម្មត្តរូបទេ តែក្នុងតម្លៃពេញលេញដោយផ្អែកលើកម្លាំងសេដ្ឋកិច្ចរបស់ប្រទេសតែម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ