អត្រាកំណើតនៅចិនកើនដល់កម្រិតខ្ពស់មិនធ្លាប់មាន គិតតាំងពីឆ្នាំ២០០០
ក្រោយចិនបានបន្ធូរនយោបាយគ្រួសារមួយ កូនមួយមក អត្រាកំណើតបានកើនឡើងក្នុងប្រទេស ក្នុងតួលេខខ្ពស់ មិនធ្លាប់មាន គិតតាំងពីឆ្នាំ២០០០មក។ គិតសម្រាប់រយៈពេល១ឆ្នាំ អត្រាកំណើតសម្រាប់ឆ្នាំ២០១៦ បានកើនឡើង៧,៩ភាគរយ។ នេះបើយោងតាមគណៈកម្មការជាតិផ្នែកសុខភាពនិងគ្រួសាររបស់ចិន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៥
យោងតាមគណៈកម្មការជាតិចិន ទទួលបន្ទុកផ្នែកសុខភាពនិងគ្រួសារ អត្រាកំណើតទារក នៅចិន គិតសម្រាប់ឆ្នាំ២០១៦កន្លងទៅ បានកើនដល់១៧លាន ៨សែន ៦ម៉ឺននាក់។ ជាអត្រាកំណើតដែលកើនឡើងក្នុងកម្រិតខ្ពស់ គឺត្រូវនឹង៧,៩ភាគរយ សម្រាប់រយៈពេល១ឆ្នាំ។ គិតឆ្នាំ២០១៥ ទារកដែលកើតនៅចិន មានទាបជាងនេះ គឺមាន១៦លាន៥សែន៥ម៉ឺននាក់។
សម្រាប់ឆ្នាំ២០១៦ គ្រួសារ ដែលមានកូនទី១រួចហើយ ហើយបានយកកូន ទី២ទៀត មានប្រមាណជា៤៥ភាគរយ ខុសពីឆ្នាំ២០១៥ ដែលតួលេខគ្រួសារបែបនេះ មាន៣០ភាគរយ។
អត្រាកំណើតកើនឡើង ជាលទ្ធផលនៃការបន្ធូរបន្ថយនយោបាយ គ្រួសារមួយកូនមួយរបស់ចិន។ នយោបាយគ្រួសារមួយកូនមួយ ត្រូវបានចិនដាក់ចេញឡើង នៅចុងទស្សវត្សឆ្នាំ១៩៧០។ ប៉ុន្តែ ប៉ុន្មានឆ្នាំចុងក្រោយនេះ ដោយសារឃើញថា ប្រជាជនចិនកាន់តែច្រើន ចាប់ផ្តើមចូលវ័យចាស់ រដ្ឋាភិបាលចិនបានសម្រេចបន្ធូរនយោបាយនេះទៅវិញ។
គិតពីឆ្នាំ២០១៣មក ក្នុងគ្រួសារមួយ បើប្តីរឺក៏ប្រពន្ធជាកូនទោល នោះគ្រួសារនោះអាចយកកូនទី២បាន។ ហើយខែមករា ដើមឆ្នាំ២០១៦ គណបក្សកុម្មុយនិស្តបានបន្ធូររហូតដល់អនុញ្ញាតអោយគ្រប់គ្រួសារអាចយកកូនទី២បាន។ ទោះយ៉ាងនេះក្តី ការស៊ើបអង្កេតមួយបង្ហាញថា ពលរដ្ឋចិនប្រមាណ៥៣គ្រួសារ ដែលមានកូនទី១រួចហើយ មិនចង់មានកូនទី២ទេ។ មូលហេតុដោយសារតែ ការស្នាក់នៅ ហូបចុក ការព្យាបាលសុខភាព សម្រាប់ការរស់នៅប្រចាំថ្ងៃ ត្រូវការចាយវាយថវិកាច្រើន។
ចិនជាប្រទេសមានប្រជាជនច្រើនជាងគេ ក្នុងពិភពលោក។ ឆ្នាំ២០១៥ ប្រជាជនចិនមាន១៣៧០លាននាក់។ រដ្ឋចិនគិតថា តួលេខនេះនឹងកើនដល់១៤២០លាននាក់ នៅឆ្នាំ២០២០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ