ចូលឆ្នាំ២០១៦ ចិនធ្វើកាដូជូនប្រជាជន អាចមានកូនបានពីរ
ចុះផ្សាយនៅថ្ងៃ៖
ស្តាប់ - ០៦:៤០
នៅឆ្នាំ១៩៧៩ មហាសន្និបាទបក្សកុម្មុយនីស្តិចិន បានចេញច្បាប់ផែនការគ្រួសារ ដែលបានកំណត់ឲ្យប្រជាជនចិន មិនឲ្យមានកូនលើសពីម្នាក់ទេ។ ៣៦ឆ្នាំក្រោយមក គឺកាលពីខែតុលា កន្លងទៅនេះ សភាប្រជាមានិតចិន ទើបបានសម្រេចកែប្រែច្បាប់នេះ ដោយអនុញ្ញាតឲ្យប្រជាជនចិន អាចមានកូនចំនួន២នាក់។ ច្បាប់ថ្មីនេះ នឹងចូលជាធរមានចាប់ពីថ្ងៃទី ១ មករា ឆ្នាំ២០១៦នេះហើយ។ តើមានមូលហេតុអ្វីខ្លះ ទើបរដ្ឋាភិបាលចិនសម្រេចផ្លាស់ប្តូរនយោបាយផែនការគ្រួសាររបស់ខ្លួន? តើនយោបាយកូនទោស អស់រយៈពេល៣៦ឆ្នាំមកនេះ បានហុចផលអ្វីខ្លះ ដល់រដ្ឋាភិបាល និងប្រជាជនចិន?
ថ្ងៃទី ២៩ តុលា កន្លងទៅនេះ សភាមហាសន្និបាទកុម្មុនីស្តិចិន បានសម្រេចលប់ចោលច្បាប់តម្រូវឲ្យមានកូនតែមួយ។ ចាប់ពីដើមឆ្នាំ២០១៦នេះទៅ ប្រជាជនចិនដែលរៀបការពេញច្បាប់ អាចមានកូនបានពីរនាក់។ អ្នកខ្លះយល់ថា នេះជាអំណោយឆ្នាំថ្មី ដែលរដ្ឋាភិបាលកុម្មុយនីស្តចិន បានធ្វើជូនប្រជាពលរដ្ឋ។ តែសម្រាប់អ្នកខ្លះវិញយល់ថា លប់ពីកូនមួយ មកឲ្យមានកូនពីរ មានអ្វីខុសគ្នាទៅ គឺវានៅតែជាការហាមឃាត់ដដែល។ ច្បាប់ផែនការគ្រួសាររបស់រដ្ឋអំណាចចិន ធ្វើទៅលើគ្រួសារនិមួយៗ គឺមិនខុសពីរដ្ឋាភិបាល ចូលទៅដេកដល់លើគ្រែរបស់ប្តីប្រពន្ធចិនម្នាក់ៗនោះទេ។
នៅក្នុងសេចក្តីប្រកាស បង្ហាញពីឆន្ទៈរបស់រដ្ឋាភិបាល ក្នុងការសម្រេចផ្លាស់ប្តូគោនយោបាយនេះ គឺចិនបានបញ្ជាក់ថា មានមូលហេតុពីរ ទីមួយគឺដើម្បីឆ្លើយតបទៅនឹងវិបត្តិវ័យចំណាស់របស់ប្រជាជនចិន និងទីពីរគឺដើម្បីរៀបចំយុទ្ធសាស្ត្រថ្មី នៅក្នុងគោលនយោបាយសមាសភាពប្រជាជនចិន។ ជាការពិតការហាមឃាត់ប្រជាជនចិន មិនឲ្យមានកូនលើសពីម្នាក់ អស់រយៈពេល៣៦ឆ្នាំកន្លងមកនេះ គឺបានជះឥទ្ធិពលអាក្រក់ក្នុងពេលបច្ចុប្បន្ន រួមទាំងទៅថ្ងៃអនាគតផង។ អនុញ្ញាតឲ្យប្រជាជនអាចមានកូនបានពីរនាក់ វាមិនមែនជាការបន្ធូរបន្ថយ ដែលរដ្ឋាភិបាលចង់សម្រាលដល់ប្រជាពលរដ្ឋទេ តែតាមពិតវាគឺជាជម្រើស ដែលរដ្ឋាភិបាលចិន ត្រូវតែធ្វើព្រោះខ្លួនបានឃើញនឹងភ្នែកហើយ អំពីគុណវិបត្តិ នៃការដាក់កំហិតកន្លងមក។
មនុស្សចាស់កាន់តែច្រើន ដោយសារក្មេងកើតតិចពេក៖
គោលនយោបាយកូនទោល បានជះឥទ្ធិពលដោយផ្ទាល់ ទៅលើវ័យរបស់ប្រជាជនចិនទាំងស្រុង។ ការកំនត់មិនឲ្យមានកូនលើសពីរមួយ គឺមានន័យថា ចំនួនក្មេងដែលកើតពីមួយឆ្នាំទៅមួយឆ្នាំ គឺមានចំនួនតិចបំផុត។ ពេលវេលាកាន់តែខិតទៅមុខ នៅក្នុងសង្គមចិន មនុស្សចាស់មានសំបូរកាន់តែច្រើន ឯក្មេងមានកាន់តែតិចទៅៗ។ នៅតាមតំបន់ខ្លះ តាមភូមិតាមស្រុក ប្រជាជនស្ទើតែជាងពាក់កណ្តាល សុទ្ធសឹងតែមានអាយុជាង៦០ឆ្នាំ។
យោងតាមស្ថិតិចុងក្រោយ របស់ធនាគារពិភពលោក ស្ត្រីជនជាតិចិន មានកម្រិតបង្កើតកូនត្រឹមតែ ១,៧ តែប៉ុណ្ណោះ ខណៈដែល កម្រិតមធ្យមពិភពលោក ទូទៅគឺមានចំនួន ២,៥។ ស្ថិតិដដែលបង្ហាញថា ប្រជាជនចិនបច្ចុប្បន្នដែលមានអាយុក្រោម១៤ឆ្នាំ គឺមានតែ១៧ភាគរយប៉ុណ្ណោះ។ នេះហើយជាបញ្ហា ព្រោះមនុស្សចាស់ ធ្វើការលែងកើតមានកាន់តែច្រើន តើនណាជាអ្នកទទួលទំនុកបំរុង? អតុល្យភាពនេះហើយ ដែលកំពុងតែបង្ករជាវិបត្តិនៅក្នុងសង្គមចិន។ បើតាមស្ថិតិរបស់រដ្ឋាភិបាលចិន បានបង្អួតថា ដោយសារនយោបាយកូនទោលនេះហើយ ទើប៣៦ឆ្នាំមកនេះ ចិនអាចទប់ស្កាត់មិនឲ្យកូនក្មេងប្រមាណជា៤០០លាននាក់ មិនឲ្យកើតបាន។
គ្មានប្រាក់បង់ ត្រូវពន្លូតកូនទីពីរចោល ទោះជិតគ្រប់ខែក៏ដោយ៖
ក្រៅពីវិបត្តិចំនួនមនុស្សចាស់ច្រើនជាងក្មេងនេះ គោលនយោបាយកូនទោលរបស់ចិន បានបង្កើតជាបញ្ហារាប់ជំពូក។ ការបំបិទសិទ្ធិសេរីភាពរបស់បុគ្គលម្នាក់ៗ ក្នុងការកសាងក្រុមគ្រួសារ មានកូនតាមការចង់បានរបស់គេ គឺជាចំណុចសំខាន់ណាស់។ រដ្ឋាភិបាលមិនត្រូវមកលូកដៃ ចូលជ្រៀតជ្រែក ក្នុងគ្រួសារនិមួយៗទេ។ ចំណុចមួយទៀត គឺច្បាប់កូនទោលនេះ បានធ្វើបាបប្រជាជនជាខ្លាំង ជាពិសេសស្ត្រីជាម្តាយតែម្តង។ មានករណីអំពើពុករលួយ បានកើតឡើងឥតឈប់ឈរ ធ្វើឡើងដោយអាជ្ញាធរត្រួតពិនិត្យផែនការគ្រួសារ ដែលចាំតាមដានចាប់អ្នកណាដែលហ៊ានមានកូនពីរ។
រឿងអាស្រូវដ៏ធំមួយ បានផ្ទុះឡើងកាលពីចុងឆ្នាំ២០១២ ដែលបានធ្វើឲ្យសាធារណៈមតិចិន ជាពិសេសតាមបណ្តាញអ៊ិនធើនែត មានការខឹងសម្បារជាខ្លាំង។ នោះគឺករណីស្ត្រីម្នាក់ ដែលពរពោះជិតគ្រប់ខែទៅហើយ ត្រូវអាជ្ញាធរចិនចាប់បង្ខំឲ្យពន្លូតកូនចេញ ដោយសារតែគាត់ពុំមានប្រាក់បង់ថ្លៃពិន័យ្យ ចំនួន៦ពាន់ដុល្លារ។ សម្រាប់អ្នកដែលមានប្រាក់ អាចសូកបំបិតមាត់មន្ត្រីទាំងនេះបាន គឺគេអាចមានកូនលើសពីមួយ។ ករណីចាប់បង្ខំម្តាយ ឲ្យពន្លូតកូន ដែលមានអាយុជិតគ្រប់ខែ កើតមានជាញឹកញាប់ ហើយដែលវាជាគ្រោះថា្នក់ដ៍ធំ ទៅលើអាយុជីវិតស្ត្រីពពោះ។
ទារកកើត ដោយលាក់កំបាំង គ្មានអត្តសញ្ញណ និងការទទួលស្គាល់ពីរដ្ឋ៖
ផលអវិជ្ជមានមួយទៀត នៃការដាក់កំហិតកូនទោលនេះ គឺកន្លង៣៦ឆ្នាំមកនេះ មានក្មេងជាច្រើន ដែលបានកើតមកហើយ តែត្រូវគេលាក់ ដោយសារតែឪពុកម្តាយក្មេងនោះ មានកូនមួយរួចទៅហើយ។ ក្មេងទាំងនោះ ពុំមានឈ្មោះនៅក្នុងបញ្ជីរគ្រួសារ និងគ្មានលិខិតស្នាមសំគាល់ខ្លួនអ្វីទាំងអស់។ ចំណុចមួយទៀត គឺដោយសារតែម្នាក់ៗអាចមានកូនតែមួយ ប្តីប្រពន្ធចិនភាគច្រើន បានពន្លូតទារកចោល នៅពេលដែលដឹងថាជាកូនស្រី ព្រោះប្រពៃណីចិនចង់បានតែកូនប្រុស។ បញ្ហានេះ បានធ្វើឲ្យចំនួនមនុស្សស្រីនៅចិន កាន់តែថយចុះ។
កំណែទម្រង់ដែលរដ្ឋាភិបាលចិនត្រូវបង្ខំចិត្តធ្វើ៖
ចាប់ពីថ្ងៃទី ១មករា ២០១៦នេះទៅ ប្រជាជនចិន អាចមានកូនបានពីរនាក់។ ប៉ុន្តែអ្វីដែលនៅពីក្រោយ ការសម្រេចផ្លាស់ប្តូរនយោបាយនេះ វាអាចជាសារនយោបាយរបស់បក្សកុម្មុយនីស្តិចិនច្រើនជាង។ បក្សកុម្មុនីស្តិ ដែលដឹកនាំដោយបុរសខ្លាំងទីមួយ គឺលោកប្រធានាធិបតីស៊ី ជីនពីង បានបញ្ចេញសាច់ដុំសម្តែងមហិទ្ធិរិទ្ធិថាខ្លួន កំពុងតែធ្វើការដុតដៃដុតជើង ក្នុងការធ្វើកំណែទម្រង់ប្រទេសជាតិ។ ត្រូវធ្វើកំណែទម្រង់ ក៏ព្រោះថាមនុស្សសម័យឥឡូវ មនមែនគេមិនដឹងអី អត់ទ្រាំឲ្យរដ្ឋាភិបាលកុម្មុយនីស្តិសង្កត់ក ធ្វើបាបគ្រប់រឿងបាន ដូចមុនទៀតឡើយ។ លោក ស៊ី ជីនពីងធ្វើកំណែទម្រង់ ក៏ដើម្បីអាយុជីវិត របស់បក្សកុម្មុយនីស្តិចិនដែរ។
មួយវិញទៀតស្របពេលដែល សេដ្ឋកិច្ចចិនកំពុងតែជួបភាពរាំងស្ទះ នាពេលបច្ចុប្បន្ននេះ ប្រជាជនចិន កំពុងចាំឃ្លាំមើលរដ្ឋាភិបាល ថាតើមានសមត្ថភាព ធ្វើកំណែទម្រង់បានកំរិតណា ដើម្បីដោះស្រាយវិបត្តិសេដ្ឋកិច្ច និងវិបត្តិសង្គម។ ច្បាប់ថ្មីអនុញ្ញាតិឲ្យមានកូនបានពីរនេះ មិនត្រឹមតែអាចបង្ហាញប្រាប់ថា រដ្ឋាភិបាលមានឆន្ទៈធ្វើកំណែទម្រង់ហើយ ថែមទាំងអាចបន្លប់មតិសាធារណៈ ឲ្យភ្លេចពីវិបត្តិសេដ្ឋកិច្ចចិន បានមួយរយៈដែរ។
ចំណុចមួយទៀត ដែលគិតមិនដល់នោះ គឺការអនុញ្ញាតឲ្យមានកូនបានពីរនាក់ចាប់ពីឆ្នាំ២០១៦នេះទៅ គឺអាចជួយ ពន្លឿនសេដ្ឋកិច្ចចិន បានមួយចំណែកដែរ។ ចំនួនកំណើតក្មេងនឹងកើនឡើង ការចំណាយរបស់ឪពុកម្តាយ ដើម្បីចិញ្ចឹមទារក និងកើនឡើងទៅតាមនោះ។
ទោះច្បាប់អនុញ្ញាត តែអ្នកដែលចង់បានកូនពីរ មានមិនច្រើន៖
ក៏បន្តែអ្វីដែលចោទសួរ ថាតើមានប្តីប្រពន្ធប៉ុន្មាននាក់ ដែលចង់បានកូនទីពីរ? ជាមួយនឹងតម្លៃចាយវាយគ្រប់បែបយ៉ាងកាន់តែមានតម្លៃខ្ពស់ ប្រាក់ចំណាយដើម្បីទំនុកបម្រុងការសិក្សារបស់កូនៗពួកគេ ដែលកាន់តែច្រើនទៅៗ តើគេចង់បានកូនថែមមួយទៀតដែររឺទេ? ស្ថិតិមួយបានធ្វើឡើង បន្ទាប់ពីសភាអនុម័តច្បាប់ថ្មីនេះ បង្ហាញថា ប្តីប្រពន្ធចិនចំនួន៣២% ដែលចង់បានកូន២ ចំនែក ៣៨%គឺមិនចង់បានកូនថែមមួយទៀតទេ។ ការស្រាវជ្រាវមួយទៀត ធ្វើឡើងដោយសកលវិទ្យាល័យ ហ៊្វូតាន នៅក្រុងសៀងហៃបង្ហាញថា មានស្ត្រីអ្នកក្រុងសៀងហៃចំនួន១៥%ប៉ុណ្ណោះដែលចង់បានកូនពីរ។ ៥៨% បានឆ្លើយថា គេមិនចង់បានកូនពីរដោយសារកត្តាតែមួយគត់ គឺត្រូវចំណាយច្រើន។
ទោះបីជាយ៉ាងណា ឆ្លងកាត់៣៦ឆ្នាំនៃបទពិសោធន៍ ពេលនេះរដ្ឋាភិបាលកុម្មុនីស្តិចិន គួរណាតែផ្តល់ឱកាសឲ្យប្រជាជានអាចសម្រេចចិត្តដោយខ្លួនគេ ក្នុងការកំណត់ចំនួនកូន។ តែផ្ទុយទៅវិញរដ្ឋាភិបាលនៅតែបន្តដាក់កំហឹតដដែល ទាំងដឹងហើយថាវាជ្រៀតជ្រែកកិច្ចការគ្រួសាររបស់ប្រជាជនម្នាក់ៗ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ