HRW បរិហារថា HCH សមគំនិតក្នុងរឿងបណ្តេញជនភៀសខ្លួនពីប៉ាគីស្ថាន
អង្គការការពារសិទ្ធមនុស្សHuman Rights Watch (HRW) បរិហារអំពីការសមគំនិតរបស់ អ.ស.ប.ទទួលបន្ទុកជនភៀសខ្លួន (HCR) ប្រឈមមុខនឹងការបណ្តេញជនភៀសខ្លួនអាហ្វហ្កានីស្ថានដ៏សន្ធឹកសន្ធាប់ពីសំណាក់អាជ្ញាធរប៉ាគីស្ថាន-នេះបើយោងតាមរបាយការណ៍មួយរបស់អង្គការ Human Rights Watch ចេញផ្សាយនៅថ្ងៃចន្ទ១៣កុម្ភៈនៅកាប៊ូល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
ជនភៀសខ្លួនអាហ្វហ្កានីស្ថានជាង៥សែននាក់ដែលបានតាំងទីលំនៅក្នុងប្រទេសប៉ាគីស្ថានជួនកាលខ្លះចាប់តាំងពីច្រើនសតវត្សរ៍មកហើយ ត្រូវបានអាជ្ញាធរប៉ាគីស្ថានធ្វើការបណ្តេញពីប្រទេសនៅអំឡុងឆមាសទីពីរក្នុងឆ្នាំ២០១៦។ ការបណ្តេញជនភៀសខ្លួន ជាញឹកញាប់ត្រូវបានធ្វើឡើងក្រោមសម្ពាធប៉ូលីសនិងអាជ្ញាធរប៉ាគីស្ថាន។
ទង្វើអមនុស្សធម៌នេះ ត្រូវបានអង្គការHuman Rights Watch ចាត់ទុកថាជាការរំលោភលើសិទ្ធិរបស់ជនភៀសខ្លួន-នេះបើយោងតាមរបាយការណ៍មួយរបស់អង្គការ Human Rights Watchចេញផ្សាយនៅថ្ងៃចន្ទ១៣កុម្ភៈនៅទីក្រុងកាប៊ូល។
ស្របនេះដែរ Human Rights Watch បានគូសបញ្ជាក់ដែរថា ការដែលស្នងការជាន់ខ្ពស់របស់អសបទទួលបន្ទុកជនភៀសខ្លួន HCR ធ្វើការតម្លើងប្រាក់ឧត្ថម្ភឲ្យដល់ជនភៀសខ្លួនក្នុងម្នាក់ៗពី ២០០ ដុល្លារ ដល់៤០០ដុល្លារ សម្រាប់ការធ្វើមាតុភូមិនិវត្តន៍ពីប៉ាគីស្ថានកាលពីខែមិថុនាឆ្នាំ២០១៦ សបញ្ជាក់ថា អង្គការ HCR បានជួយចូកជួយចែវដល់អាជ្ញាធរប៉ាគីស្ថាននៅក្នុងការចាប់បញ្ជូនជនភៀសខ្លួនអាហ្វហ្កានីស្ថាន ចេញពីប្រទេស។ ទង្វើបែបនេះត្រូវបាន Human Rights Watch អះអាង ពិតជាសមគំនិតនៅក្នុងការរំលោភសិទ្ធិជនភៀសខ្លួននៅចំពោះមុខច្បាប់អន្តរជាតិ។
ដោយហេតុថា ក្នុងពេលដែលអាជ្ញាធរប៉ាគីស្ថាន បានធ្វើសកម្មភាពបង្ក្រាបយ៉ាងបំពានទៅលើជនភៀសខ្លួនក្នុងទ្រង់ទ្រាយធំ ដើម្បីធ្វើការបណ្តេញចេញពីប្រទេសនោះ អង្គការ HCR នៅស្ងាត់ស្ងៀមពុំបញ្ចេញប្រតិកម្មនិងក៏ពុំបានធ្វើការបរិហារពីទង្វើរបស់អាជ្ញាធរប៉ាគីស្ថាន ទៅលើជនភៀសខ្លួននៅក្នុងការបណ្តេញចេញពីប្រទេសខ្លួន។
ម្យ៉ាងទៀត នៅក្នុងចំណោមជនភៀសខ្លួនអាហ្វហ្កានីស្ថានដែលធ្វើមាតុភូមិនិវត្តន៍នោះ មានជនអាហ្វហ្កានីស្ថានចំនួន៣សែន៦ម៉ឺន៥ពាន់នាក់ ដែលបានចុះឈ្មោះក្នុងបញ្ជីរបស់អង្គការ HCR ក្នុងនាមជាជនភៀសខ្លួន។ ចំពោះអង្គការការពារសិទ្ធមនុស្ស Human Rights Watch ការធ្វើមាតុភូមិនិវត្តន៍នៃជនភៀសខ្លួនអាហ្វហ្កានីស្ថានទាំងនោះ គឺជាការធ្វើដោយបង្ខំ។
នៅពេលចូលក្នុងប្រទេសកំណើតរបស់ខ្លួនវិញ ជនភៀសខ្លួនទាំងនោះនឹងត្រូវប្រឈមមុខនឹងអំពើហិង្សា អសន្តិសុខ ភាពក្រីក្រនៅក្នុងប្រទេសខ្លួនដែលកំពុងតែនៅឆាបឆេះដោយសារសង្គ្រាម-នេះជាការបញ្ជាក់របស់អង្គការ Human Rights Watch ដែលមានទីស្នាក់ការនៅញូវយ៉ក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ