ការប្រយុទ្ធដ៏ហិង្សារវាងឧទ្ទាមជនជាតិភាគតិចនិងកងកម្លាំងសន្តិសុខភូមាបានសម្លាប់មនុស្ស៣០នាក់
មនុស្សស្លាប់យ៉ាងតិចចំនួន៣០នាក់នៅក្នុងការប្រយុទ្ធគ្នាដ៏ហិង្សាមួយកាលពីម្សិលមិញ រវាងក្រុមឧទ្ទាមជនជាតិភាគតិចនិងកងកម្លាំងសន្តិសុខភូមានៅតំបន់ Kokang ភាគខាងជើងភូមានិងជិតព្រំដែនជាមួយចិន-នេះបើយោងតាមប្រភពរដ្ឋាភិបាលភូមា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០០
យោងតាមសេចក្តីជូនដំណឹងនៅលើបណ្តាញសង្គម Facebook របស់ការិយាល័យប្រមុខដឹកនាំភូមាលោកស្រី អ៊ុងសាន ស៊ូជី “ក្រុមឧទ្ទាមប្រដាប់អាវុធយ៉ាងតិច ២០នាក់ ប៉ូលីស៥នាក់និងប្រជាជនស៊ីវីល៥នាក់ បានស្លាប់នៅក្នុងការប្រឈមអាវុធដ៏កាចសាហាវមួយនៅ Laukkai ដែលជាក្រុងដ៏សំខាន់នៅក្នុងរដ្ឋ Shan កាលពីម្សិលមិញ។
យោងតាមប្រភពដដែល ដោយមានទាំងបង្ហាញរូបថតជាច្រើន បង្ហាញ មនុស្សស្លាប់និងរងរបួសជាច្រើននាក់នោះ ភាគច្រើនគឺជាប្រជាជនស្លួតត្រង់ ក្នុងនោះក៏មានគ្រូបង្រៀនបឋមសិក្សាម្នាក់ដែលបានស្លាប់នៅក្នុងការប្រយុទ្ធគ្នារវាងក្រុមឧទ្ទាមប្រដាប់អាវុធហៅកាត់ថា MNDAA និងកងសន្តិសុខរដ្ឋាភិបាលភូមា។ ក្រុមឧទ្ទាមនេះ ដែលខ្លះៗ មានឯកសណ្ឋានប៉ូលីស បានបើកការវាយប្រហារតាំងពីព្រឹកព្រលឹមម្សិលមិញប្រឆាំងទៅលើប៉ុស្តិ៍ប៉ូលីសនិងកងទ័ពភូមានានា និងបន្ទាប់មក ទៅលើ ទីរមណីយដ្ឋាននានាក្នុងក្រុងដោយបានបាញ់កាំភ្លើងធំនិងអាវុធធុនស្រាល ពេញមួយថ្ងៃម្សិលមិញ។
ចំណែកប្រភពយោធាភូមាវិញដែលជូនដំណឹងដល់ទីភ្នាក់ងារព័តមានបារាំង AFP បានបញ្ជាក់ថា ការវាយប្រយុទ្ធគ្នានៅតែបន្តធ្វើទៀតនៅពេលយប់។ ហេតុការណ៍នេះ បានជម្រុញឲ្យប្រជាជនជាច្រើន នាំគ្នាភៀសខ្លួនចេញពីតំបន់ តែប្រភពផ្លូវការភូមា នៅពុំទាន់មានតួលេខជាផ្លូវការ ពីចំនួនពិតប្រាកដនៃប្រជាជនជនភៀសខ្លួននោះទេ។
សូមបញ្ជាក់ថា ក្រុម ឧទ្ទាមប្រដាប់អាវុធ MNDAA ស្ថិតនៅក្នុងចំណោមក្រុមឧទ្ទាមប្រដាប់អាវុធចំនួន៤ ដែលមានឈ្មោះរួមហៅថាសម្ព័ន្ធភាគខាងជើង។ សម្ព័ន្ធភាគខាងជើងនេះបានអះអាងថា យុទ្ធជនរបស់ខ្លួន បានធ្វើការវាយប្រយុទ្ធនៅតំបន់ Laukkai គឺដើម្បីការការពារខ្លួនប្រឈមមុខនឹងការវាយលុករបស់ពួកសត្រូវ។ គួររំលឹកថាការប្រឈមមុខរវាងកងទ័ពភូមានិងសម្ព័ន្ធភាគខាងជើង បានកើនចំនួនកាន់តែច្រើនឡើងៗនៅក្នុងរដ្ឋ Shan ចាប់តាំងពីចុងឆ្នាំ២០១៦ មក នឹងបណ្តាលឲ្យមនុស្សស្លាប់ជាង១៦០នៅតាមតំបន់ព្រំដែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ