អាមេរិកដាក់ទណ្ឌកម្មថ្មីៗទៀត ប្រឆាំងកូរ៉េខាងជើង
នៅថ្ងៃសុក្រម្សិលមិញ ក្រសួងហិរញ្ញវត្ថុអាមេរិកបានដាក់ទណ្ឌកម្មប្រឆាំងអ្នកទទួលខុសត្រូវ១១រូប មកពីសហគ្រាសនិងក្រុមហ៊ុនកូរ៉េខាងជើង។ ទណ្ឌកម្មថ្មីរបស់អាមេរិកមានទិសដៅអោយកូរ៉េខាងជើង ដែលមានមហិច្ឆតានុយក្លេអ៊ែរឥតស្រាកស្រាន្តនោះ កាន់តែឯកាក្នុងពិភពលោក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៤
ទណ្ឌកម្មរបស់ក្រសួងហិរញ្ញវត្ថុអាមេរិក ប្រឆាំងអ្នកទទួលខុសត្រូវ១១រូប នៃបណ្តាសហគ្រាសនិងក្រុមហ៊ុនកូរ៉េខាងជើង ជាទណ្ឌកម្មហាមប្រាមការធ្វើពាណិជ្ជកម្មជាមួយបុគ្គលទាំង១១រូបនេះ ហើយក៏ជាទណ្ឌកម្មហាមប្រាមការធ្វើពាណិជ្ជកម្មជាមួយក្រុមហ៊ុនរបស់ពួកគេទាំងនេះដែរ។ បុគ្គលិកក្រុមហ៊ុននិងសហគ្រាសកូរ៉េខាងជើងដែលរងទណ្ឌកម្មអាមេរិក ភាគច្រើនមានមូលដ្ឋាននៅចិននិងរុស្ស៊ី។ ពួកគេធ្វើការអោយបណ្តាសហគ្រាសក្រុមហ៊ុនដែលទទួលជាវសម្ភារ រឺបច្ចេកវិទ្យាផ្សេងៗ សម្រាប់ឧស្សាហកម្មការពារជាតិកូរ៉េខាងជើង។
ក្រុមហ៊ុនកូរ៉េខាងជើងដែលរងទណ្ឌកម្មមានឈ្មោះថា Paeksol Trading Corporation ជាក្រុមហ៊ុននាំចេញធ្យូងថ្ម និងរ៉ែដែក ពីកូរ៉េខាងជើង។ អាមេរិកបានសហការជាមួយចិន ហាមមិនអោយក្រុមហ៊ុនមួយនេះនាំចេញធ្យូងថ្ម ពីកូរ៉េខាងជើងទៀត។ ប៉ុន្តែ ក្រុមហ៊ុន Paeksol បានបង្វែរសកម្មភាពខ្លួន ដោយបានប្រើក្រុមហ៊ុនអន្តរការី នៅក្រុងDalian ភាគខាងជើងប្រទេសចិន ក្នុងការបន្តការនាំចេញធ្យូងថ្មវិញ។
ប្រឈមនឹងទណ្ឌកម្មអង្គការសហប្រជាជាតិ ប្រឆាំងមហិច្ឆតានុយក្លេអ៊ែរកូរ៉េខាងជើង កន្លងមក កូរ៉េខាងជើងបានបង្វែវិធីរកចំណូលថវិកាក្នុងស្រុក ដោយប្រើក្រុមហ៊ុនអន្តរការីទាំងនេះ អោយធ្វើពាណិជ្ជកម្មជាមួយម៉ាឡេស៊ី និងចិន។ ទណ្ឌកម្មថ្មីៗរបស់អាមេរិកប្រឆាំងក្រុងព្យុងយ៉ាងពេលនេះ មានទិសដៅបង្កភាពរាំងស្ទះមិនអោយកូរ៉េខាងជើង អាចប្រើវិធីក្រុមហ៊ុនអន្តរការីទាំងនេះបានទៀត។ ពោលគឺមិនអោយក្រុងព្យុងយ៉ាងអាចរកចំណូល ដើម្បីអភិវឌ្ឍន៍កម្មវិធីនុយក្លេអ៊ែរ គំរាមសន្តិសុខតំបន់តែម្តង។
សម្រាប់ក្រសួងហិរញ្ញវត្ថុអាមេរិក ទណ្ឌកម្មទាំងនេះដើរស្របតាមការសន្យារបស់អាមេរិក ក្នុងការការពារសម្ព័ន្ធមិត្តនៅអាស៊ី។ អាមេរិកបានអំពាវនាវអោយបណ្តាប្រទេសសម្ព័ន្ធមិត្តរបស់ខ្លួន ចាត់វិធានការដូចគ្នានេះ ប្រឆាំងកូរ៉េខាងជើងផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ