ចិនគាំទ្រគំនិតលោកត្រាំចង់ជួបគីមជុងអ៊ុន តែទាមទារអាមេរិកឱ្យដកខែលមីស៊ីលចេញពីកូរ៉េខាងត្បូង
ជាមួយនឹងការអបអរនៅពេលបានឮលោកដូណាល់ ត្រាំ ចង់ជួបប្រមុខកូរ៉េខាងជើង ចិនបានរំអុកឱ្យសហរដ្ឋអាមេរិកបញ្ឈប់ការបំពាក់ប្រព័ន្ធខែលមីស៊ីលប្រឆាំងមីស៊ីលនៅកូរ៉េខាងត្បូង។ ប្រព័ន្ធខែលមីស៊ីល ដែលដំឡើងរួចសព្វគ្រប់និងអាចចាប់ធ្វើប្រតិបត្តិការកម្ចាត់មីស៊ីលបានចាប់ពីព្រឹកថ្ងៃអង្គារម្សិលមិញមក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៣
ជាច្រើនខែមកហើយ និងតាំងពីបានឮអាមេរិកប្រកាសភា្លម ចិនបានបរិហារការបំពាក់ប្រព័ន្ធខែលមីស៊ីលនៅកូរ៉េខាងត្បូង ដើម្បីទប់ទល់នឹងកម្មវិធីនុយក្លេអ៊ែរនិងមីស៊ីលកូរ៉េខាងជើង។ សម្រាប់ប៉េកាំងប្រព័ន្ធខែលមីស៊ីលដែលអាចការពារគ្របដល់ទឹកដីចិន បានធ្វើឱ្យប៉ះពាល់ដល់ផលប្រយោជន៍យោធាចិន។ បន្ទាប់ពីបានចាត់វិធានការប្រឆាំងនឹងកូរ៉េខាងត្បូងដែលព្រមឱ្យអាមេរិកបំពាក់ខែលមីស៊ីល នៅថ្ងៃអង្គារនេះ ប៉េកាំងស្រែកបង្ខំដោយចំៗតែម្តងឱ្យអាមេរិកបញ្ឈប់ប្រតិបត្តិការខែលមីស៊ីលនៅកូរ៉េខាងត្បូង។
ការទាមទារនេះធ្វើឡើងតែប៉ុន្មានម៉ោងក្រោយសេចក្តីប្រកាសរបស់វ៉ាស៊ីនតោន ដាក់ឱ្យដំណើរការប្រព័ន្ធខែលមីស៊ីល និងអាចធ្វើប្រតិបត្តិការបាន ក្នុងកំរិតសមត្ថភាពអាចចាប់មីស៊ីលកូរ៉េខាងជើងបានហើយ។ ជាមួយនឹងប្រតិកម្មនេះ អ្នកនាំពាក្យចិនក៏បានសម្តែងការលើកទឹកចិត្តចំពោះសេចក្តីប្រកាសរបស់លោកដូណាល់ ត្រាំ ដែលចង់ជួបលោកគីម ជុងអ៊ុន។ ចិនបានកត់ត្រាទុកពាក្យរបស់ប្រធានាធិបតីអាមេរិក និងយល់ថាជាសញ្ញាដ៏វិជ្ជមានគួរផ្សព្វផ្សាយ។
សម្រាប់ប៉េកាំង អាទិភាពបន្ទាន់ដែលត្រូវចាត់វិធានការភ្លាម គឺការបន្ធូរសម្ពាធក្នុងឧបទ្វីប ទើបមានប្រសិទ្ធិភាពនិងអាចឈានដល់ការចរចាស្វែងរកសន្តិភាពជាមួយកូរ៉េខាងជើងបាន។
ចិនក៏ដូចអាមេរិកបានបរិហារកម្មវិធីនុយក្លេអ៊ែរនិងមីស៊ីលរបស់ព្យុងយ៉ាង ប៉ុន្តែគឺចិនដែលរងសម្ពាធខ្លាំង។ វ៉ាស៊ីនតោនទម្លាក់ភារកិច្ចលើប៉េកាំងឱ្យទៅគាបកូរ៉េខាងជើង។ ចិនបានស្នើឱ្យព្យុងយ៉ាងឈប់ផ្គើន និងស្នើឱ្យអាមេរិកឈប់ធ្វើសមយុទ្ធជាមួយសេអ៊ូល ប៉ុន្តែគ្មានភាគីណាយកត្រចៀកស្តាប់ទេ ព្រោះអាមេរិកនៅមានចំណុចខ្លាំងមួយ ចង់បង្ខំឱ្យប៉េកាំងដាក់ទណ្ឌកម្មត្រឹមត្រូវស្របតាមសេចក្តីសម្រេចចិត្តរបស់ក្រុមប្រឹក្សាសន្តិសុខអង្គការសហប្រជាជាតិលើរបបព្យុងយ៉ាង។
ម្យ៉ាងវិញទៀត បើតាមអ្នកជំនាញ ប្រព័ន្ធខែលមីស៊ីលអាមេរិកមួយគ្រឿងនេះ មិនអាចការពារកូរ៉េខាងត្បូងបានសព្វពេញមួយប្រទេសឡើយ តែវាបានប្តូរលំនឹងយុទ្ធសាស្រ្តក្នុងតំបន់រវាងកូរ៉េខាងជើងនិងខាងត្បូង និងជួយកូរ៉េខាងត្បូងមិនរងការបំផ្លិចបំផ្លាញខ្លាំងពេកប៉ុណ្ណោះ ក្នុងករណីព្យុងយ៉ាងបញ្ចេះសង្គ្រាមឡើងមែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ