កូរ៉េខាងជើងនៅតែផ្ចាញ់ផ្ចាលអាមេរិក ដោយបាញ់គ្រាប់មីស៊ីលម្តងទៀត នៅថ្ងៃសៅរ៍នេះ
កូរ៉េខាងជើងបានបាញ់សាកល្បងមីស៊ីលបាលីស្ទីក សាជាថ្មីម្តងទៀត នៅព្រឹកថ្ងៃសៅរ៍នេះ។ ប៉ុន្តែ បើតាម ក្រសួងការពារជាតិកូរ៉េខាងត្បូង ការធ្វើតេស្តសាកល្បង របស់ទីក្រុងព្យុងយ៉ាងបានបរាជ័យ។ កូរ៉េខាងជើងបាញ់សាកល្បងមីស៊ីលបាលីស្ទីក តែប៉ុន្មានម៉ោងក្រោយកិច្ចប្រជុំរដ្ឋមន្រ្តីការបរទេស នៅក្រុមប្រឹក្សាសន្តិសុខ ដែលនៅក្នុងនោះ អាមេរិកបានទាមទារឲ្យមានការដាក់ទណ្ឌកម្មបន្ថែមទៀត ទៅលើកូរ៉េខាងជើង។
ចុះផ្សាយនៅថ្ងៃ៖
ដោយបាញ់សាកល្បងមីស៊ីលបាលីស្ទីក កូរ៉េខាងជើងទំនងជាចង់ប្រឆាំងតបនឹងការអំពាវនាវរបស់អាមេរិកដែលចង់ឲ្យសហគមន៍អន្តរជាតិដាក់សម្ពាធ ដាក់ទណ្ឌកម្មថ្មីៗ បន្ថែមទៅលើកូរ៉េខាងជើង។ ប៉ុន្តែ ការបាញ់សាកល្បងមីស៊ីលរបស់កូរ៉េខាងជើងមិនបានសម្រេចជោគជ័យនោះទេ។ បញ្ជាការដ្ឋានរបស់កងទ័ពជើងទឹកអាមេរិកប្រចាំប៉ាស៊ីហ្វិកបានបញ្ជាក់ថា មីស៊ីលបាលីស្ទីករបស់កូរ៉េខាងជើងហោះបានទៅលើមេឃបានត្រឹមតែ ៧១គីឡូម៉ែត្រ មុននឹងផ្ទុះធ្លាក់មកក្នុងទឹកដីកូរ៉េខាងជើងវិញ។
នៅក្រោយកូរ៉េខាងជើងបាញ់សាកល្បងមីស៊ីល ប្រធានាធិបតីអាមេរិកាំង លោកដូណាល់ ត្រាំវិញ បានប្រតិកម្ម ចោទប្រកាន់កូរ៉េខាងជើងថា គ្មានបានគោរពអ្វីសោះ ប្រទេសចិន ដែលជាសម្ព័ន្ធមិត្តសំខាន់របស់កូរ៉េខាងជើង។
ប្រទេសចិនត្រូវបានអាមេរិកទាមទារជាថ្មីម្តងទៀត ឲ្យចាត់វិធានការធ្វើយ៉ាងណាឲ្យកូរ៉េខាងជើង នៅឯកោរទាំងផ្នែកសេដ្ឋកិច្ច និងការទូត។ នៅក្នុងកិច្ចប្រជុំថ្នាក់រដ្ឋមន្រ្តីការបរទេស ដែលផ្តោតសំខាន់ទៅលើសំណុំរឿងនុយក្លេអ៊ែររបស់កូរ៉េខាងជើង ប្រមុខការបរទេសអាមេរិក លោករេច ធីល័រសុន បានមានប្រសាសន៍ថា ការគំរាមកំហែងវាយប្រហារអាវុធនុយក្លេអ៊ែរទៅលើកូរ៉េខាងត្បូង និងជប៉ុន ដែលជាសម្ព័ន្ធមិត្តរបស់អាមេរិក ពិតជាមានប្រាកដមែន។ សម្រាប់រដ្ឋមន្រ្តីការបរទេសអាមេរិក បើគេមិនទប់ស្កាត់ នៅពេលនេះ កូរ៉េខាងជើងដែលអភិវឌ្ឍមិនឈប់ កម្មវិធីនុយក្លេអ៊ែរយោធា នឹងមានសមត្ថភាពវាយប្រហារ នៅថ្ងៃណាមួយ សហរដ្ឋអាមេរិក។
នៅក្នុងកិច្ចប្រជុំក្រុមប្រឹក្សាសន្តិសុខ នៅថ្ងៃម្សិលមិញ រដ្ឋមន្រ្តីការបរទេសចិន លោកវ៉ាងយី បានឆ្លើយតបទៅវិញថា វិបត្តិនុយក្លេអ៊ែររបស់កូរ៉េខាងជើងមិនមែនជាបន្ទុករបស់ចិនតែម្នាក់ឯងនោះទេ។ ប្រមុខការបរទេសចិនបានសំណូមពរម្តងទៀត ឲ្យគេធ្វើតាមសំណើរបស់ចិន ដែលនៅក្នុងនោះ ដើម្បីជាថ្នូរនឹងការទាមទារឲ្យកូរ៉េខាងជើងលះបង់ចោលកម្មវិធីផលិតអាវុធនុយក្លេអ៊ែរ អាមេរិក និងកូរ៉េខាងត្បូងត្រូវឈប់ធ្វើសមយុទ្ធយោធា នៅឧបទ្វីបកូរ៉េ។
សំណើរបស់ចិនត្រូវបានអាមេរិកបដិសេធមិនទទួលយករហូតមក។ នៅថ្ងៃសុក្រ ប្រមុខការបរទេសអាមេរិកបញ្ជាក់ម្តងទៀតជំហររបស់អាមេរិកដែលចង់ឲ្យមានការចរចាការទូតដើម្បីបញ្ចុះបញ្ចូលឲ្យកូរ៉េខាងជើងលះបង់ចោលមហិច្ឆតានុយក្លេអ៊ែរ ប៉ុន្តែ ជាមួយគ្នានោះ អាមេរិកមិនចោលទេ ជម្រើសវាយប្រហារយោធា ដើម្បីទប់ទល់នឹងការវាយប្រហាររបស់កូរ៉េខាងជើង។ ប្រមុខការប្រទេសអាមេរិកបានសន្យាធានាដល់ភាគីចិន ថា អាមេរិកគ្មានបំណងចង់ឲ្យគេប្តូររបបកូរ៉េខាងជើង ហើយអាមេរិកក៏គ្មានគម្រោងដើម្បីធ្វើឲ្យប្រទេសកូរ៉េទាំងពីរបង្រួបបង្រួមចូលគ្នានោះដែរ។ ការង្រួបបង្រួមកូរ៉េតែមួយ គឺជាកង្វល់ដ៏ធំមួយរបស់ទីក្រុងប៉េកាំង ដែលយល់ថា កូរ៉េខាងជើងដួលរលំ នឹងធ្លាក់ ទៅស្ថិតនៅក្រោមការគ្រប់គ្រងរបស់កូរ៉េខាងត្បូងដែលជារណបរបស់អាមេរិក នៅអាស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ