ចិនច្រានចោលព័ត៌មានរបស់អាមេរិក រឿងស្កាត់យន្តហោះក្នុងសមុទ្ទចិនខាងត្បូង
វិបត្តិនៅសមុទ្ទចិនខាងត្បូងនៅតែជាដើមចមនៃភាពតានតឹងរវាងអាមេរិកនិងចិន ! នៅអាទិត្យនេះ ប៉េកាំងបានប្រកាសច្រានចោល ពាក្យអះអាងរបស់ក្រសួងការពារជាតិអាមេរិកដែលថាមានកើតឧប្បត្តិហេតុពីរនៅលើផ្ទៃអាកាស ៖ យន្តហោះល្បាតអាមេរិកត្រូវស្កាត់ ដោយយន្តហោះចម្បាំងពីរគ្រឿងរបស់ចិន លើផ្ទៃនៃដែនសមុទ្ទចិនខាងត្បូង។
ចុះផ្សាយនៅថ្ងៃ៖
ស្តាប់ - ០១:៤៤
កាលពីថ្ងៃសុក្រ អ្នកនាំពាក្យក្រសួងការពារជាតិអាមេរិក បានបង្ហើមឱ្យដឹងអំពីឧប្បត្តិហេតុ ពើបប្រទះស្កាត់គ្នាលើផ្ទៃអាកាស រវាងយន្តហោះល្បាតអាមេរិក P-3 Orion និងយន្តហោះចម្បាំងចិនJ-10 ពីរគ្រឿង។ ជាឧប្បត្តិហេតុទីពីរ ក្នុងរយៈពេលតែពីរសប្តាហ៍។
ឧប្បត្តិហេតុបែបនេះ បានកើតឡើងជាលើកទីមួយ នៅថ្ងៃទី ១៦ឧសភា ដោយយន្តហោះយោធាអាមេរិកត្រូវបានស្កាត់ ដោយយន្តហោះចិនពីរគ្រឿង ដោយគ្មានលក្ខណៈវិជ្ជាជីវៈសោះ។ លើកទីពីរ កាលពីថ្ងៃពុធ យន្តហោះល្បាតP-3 Orion អាមេរិកត្រូវបានស្កាត់ជាថ្មីដោយយន្តហោះចិនទៀត ប៉ុន្តែអាចបន្តបេសកកម្មល្បាតលើសមុទ្ទចិនខាងត្បូង ដោយគ្មានបញ្ហា។ នេះបើតាមការគូសបញ្ជាក់របស់មន្ទីរបញ្ចកោណ ដែលអះអាងថាបានផ្តល់បញ្ជូនដំណឹងទៅឱ្យប៉េកាំងហើយ។
ប៉ុន្តែនៅថ្ងៃអាទិត្យនេះ ក្រសួងការពារជាតិចិនបានច្រានចោលសេចក្តីប្រកាសព័ត៌មានរបស់វ៉ាស៊ីនតោននោះ ថាខុសពីការពិតជាក់ស្តែង។ យន្តហោះអាមេរិកបានធ្វើប្រតិបត្តិការស្ទាបស្ទង់ស្ថានការណ៍អាកាសក្នុងតំបន់អាគ្នេយ៍នៃកោះហុងកុងរបស់ចិន។ ឯយន្តហោះយោធាចិន បានធ្វើប្រតិបត្តិការណ៍សម្គាល់អត្តសញ្ញាណស្របតាមច្បាប់។ ជាប្រតិបត្តិការប្រកបដោយវិជ្ជាជីវៈនិងប្រាកដនិយម។ នេះជាពន្យល់លម្អិតរបស់ចិន។
សម្រាប់ចិន គឺអាមេរិកទេដែលជាអ្នករំលោភដែនទឹកចិន ដោយបានបញ្ជូននាវាយោធាទៅក្បែរតំបន់ប្រជុំកូនកោះMischief កោះសប្បនិម្មិត្តរបស់ប៉េកាំង។ សកម្មភាពបែបនេះ គឺជារំលោភបូរណភាព និងសន្តិសុខ ដោយអាចធ្វើភាគីទាំងសងខាងត្រូវរងអសន្តិសុខ។ ទង្វើរបស់អាមេរិក គឺជាមូលហេតុគ្រឹះនៃបញ្ហាសន្តិសុខយោធាផ្លូវអាកាសនិងផ្លូវទឹករវាងអាមេរិកនិងចិន។ នេះបើតាមសេចក្តីថ្លែងការណ៍របស់ក្រសួងការពារជាតិចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ