សង្រ្គាមពាក្យសម្តីកំពុងបន្តមានរវាងចិន និងអាមេរិកទាក់ទងនឹងដ្រូនមុជទឹករបស់អាមេរិក
ចុះផ្សាយនៅថ្ងៃ៖
ស្តាប់ - ០៦:២៥
នៅទីបំផុត ចិន តាមរយៈក្រសួងការបរទេសបានសុទ្ធចិត្តប្រគល់ដ្រូនមុជទឹកទៅឲ្យអាមេរិកវិញ។ គឺជាដ្រូនដែលចិនបានស្ទាក់ស្រង់យកនៅក្នុងសមុទ្រចិនខាងត្បូងមានចម្ងាយប្រមាណជា ១០០គីឡូម៉ែត្រពីឆ្នេរហ្វីលីពីន។ អាមេរិកថា ដ្រូនរបស់ខ្លួនកំពុងបំពេញបេសកកម្មក្នុងដែនទឹកអន្តរជាតិ តែចិនថា ជាដែនទឹករបស់ខ្លួន។ យ៉ាងណាក៏ដោយ រឿងរ៉ាវថ្មីមួយនេះនឹងធ្វើឲ្យទំនាក់ទំនងរវាងអាមេរិក និងចិនដែលកំពុងតានតឹងស្រាប់នឹងរឹតតែកើនឡើងមួយកម្រិតទៀត។ លោកប្រធានាធិបតីអាមេរិកជាប់ឆ្នោតថ្មីដូណាល់ ត្រាំថែមទាំងប្រើពាក្យថា អាមេរិកមិនត្រូវការដ្រូនដែលចិនបានលួចទេ។
ដ្រូនមុជទឹករបស់អាមេរិកត្រូវបានកងនាវាមុជទឹកចិនស្ទាក់ស្រង់យកពីទឹកសមុទ្រនៅក្នុងសមុទ្រចិនខាងត្បូងដែលមានចម្ងាយប្រមាណជា ១០០គីឡូម៉ែត្រពីឆ្នេរហ្វីលីពីននាយប់ថ្ងៃព្រហស្បតិ៍ ទី១៥ ធ្នូ។ ក្រោយព្រឹត្តិការណ៍នោះភ្លាម ក្រសួងការពារអាមេរិកបានបញ្ចេញប្រតិកម្មប្រឆាំង និងបានទាមទារឲ្យចិនព្រលែងដ្រូននោះនៅទីកន្លែងដើមវិញ តែចិនមិនព្រម ហើយបានស្រង់នាំទៅជាមួយផង។ រហូតមកដល់ពេលនេះ អាមេរិក និងចិនបានលើកយកហេតុផលទៅពន្យល់ដោយផ្អែកតាមការយល់ឃើញរបស់គេរៀងៗខ្លួន។
ក្រសួងការពារជាតិអាមេរិកបានអះអាងច្បាស់ៗថា ដ្រូនមុជទឹកនោះត្រូវបានប្រើដើម្បីវាស់កំហាប់អំបិល និងសីតុណ្ហភាពនៅក្នុងទឹកសមុទ្រដែលជាព័ត៌មានមានសារៈសំខាន់ខ្លាំងណាស់សម្រាប់កងនាវាមុជទឹក និងការធ្វើចរាចរណ៍របស់នាវាមុជទឹក។ ម្យ៉ាងទៀត វ៉ាស៊ីតោនក៏បានបញ្ជាក់ថានៅលើដ្រូននោះ មានសរសេរព័ត៌មានច្បាស់ៗថាជារបស់អាមេរិក និងជាដ្រូនមានតួនាទីស្រាវជ្រាវវិទ្យាសាស្រ្ត។ តែចិនមិនបានយល់ឃើញដូចអាមេរិកទេ។
ក្រសួងការពារជាតិចិនបានអះអាងថា ដ្រូនដែលចិនស្ទាក់ស្រង់យកនោះជាដ្រូនអនាមិកគ្មានអត្តសញ្ញាណច្បាស់លាស់ ហើយការដែលចិនស្រង់យកឡើងទៀតសោត ក៏ដើម្បីចៀសវាងកុំឲ្យដ្រូននោះទៅបង្កគ្រោះថ្នាក់ដល់ការធ្វើចរាចរណ៍ផ្លូវសមុទ្រ។ ក្រសួងការពារជាតិចិនដដែលបានបន្ថែមថា ចិនត្រូវការយកដ្រូននោះទៅធ្វើការសិក្សា វិភាគឲ្យបានល្អិតល្អន់ដើម្បីស្វែងរកម្ចាស់របស់វា។
ចិនចង់ធានាថា ដ្រូនអាមេរិកនោះមិនមែនជាដ្រូនស៊ើបការណ៍ទេ
ការស្ទាក់ស្រង់យកដ្រូនរបស់អាមេរិកពីចិនបានកើតមានឡើង ចំពេលដែលនាវារបស់អាមេរិកឈ្មោះ Bowditch ផ្នែកស្រាវជ្រាវវិទ្យាសាស្រ្តក្នុងសមុទ្រកំពុងស្រង់យកដ្រូនចំនួនពីរនៅក្នុងសមុទ្រចិនខាងត្បូង។ តែចៃដន្យនាពេលនោះ នាវាចិនដែលមានវត្តមាននៅទីនោះក៏បានស្ទាក់ស្រង់យកដ្រូនមួយក្នុងចំណោមដ្រូនទាំងពីរនោះ។ នេះមិនមែនជាលើកទី១ ទេដែលនាវា Bowditch របស់អាមេរិកបានបំពេញបេសកកម្មស្រាវជ្រាវវិទ្យាសាស្រ្តនៅក្នុងមហាសាគរនោះ។
ក្រៅពីស្រាវជ្រាវវាស់កម្រិតកំហាប់អំបិល និងសីតុណ្ហភាពក្នុងទឹកសមុទ្រ ដ្រូនដែលនាវា Bowditch បានប្រើក៏ដើម្បីស្ទង់មើល និងព្រមានទុកពីគ្រោះរញ្ជួយដីស៊ូណាមីដែលអាចកើតមានជាយថាហេតុ។ ចិនក៏ប្រហែលជាយល់ឃើញពីតួនាទីរបស់ដ្រូននោះ ហើយក៏ដឹងថា នេះក៏មិនមែនជាលើកទី១ ទេដែលដ្រូនប្រភេទនេះមានវត្តមាននៅទីនោះ។ តែគេមិនត្រូវភ្លេចនិយាយទេថា តំបន់សមុទ្រចិនខាងត្បូងជាតំបន់រសើបខ្លាំងណាស់រវាងចិន និងអាមេរិក ក៏ដូចរវាងចិន និងប្រទេសអាស៊ីមួយចំនួនក្នុងតំបន់។ ដូច្នេះគេអាចនិយាយបានថា ការដែលចិនបានស្ទាក់ស្រង់យកដ្រូនរបស់អាមេរិកទៅសិក្សា វិភាគក៏ដើម្បីធានាថា ដ្រូននោះមិនមែនជាដ្រូនដែលអាមេរិកបានបញ្ជូនទៅឲ្យស៊ើបការណ៍ទេ។
ភាពប្រយ័ត្នប្រយែងរបៀបនេះរបស់ចិនក៏ដោយសារថាកន្លងមក អាមេរិកធ្លាប់បានបញ្ជូននាវាចម្បាំង និងយន្តហោះចម្បាំងចូលក្បែរទីប្រជុំកោះកាន់កាប់ដោយចិនក្នុងសមុទ្រចិនខាងត្បូងដោយអាមេរិកបានលើកឡើងពីសេរីភាពចរាចរណ៍ក្នុងដែនសមុទ្រអន្តរជាតិ។
ចិនចង់បង្ហាញអាមេរិកពីលទ្ធភាព និងសមត្ថភាពរបស់ខ្លួន
អ្វីដែលភាគីទាំងពីរត្រូវបន្តធ្វើនោះគឺថា តើគេត្រូវដោះស្រាយដើម្បីបិទបញ្ចប់រឿងរ៉ាវថ្មីនេះតាមផ្លូវណា។ គួរជម្រាបជូនថានាប៉ុន្មានថ្ងៃក្រោយឧប្បត្តិហេតុនេះ អាមេរិក និងចិនបានបញ្ចេញប្រតិកម្មវាយបកដាក់គ្នាទៅវិញ ទៅមក។ ប៉េកាំងបានបរិហារវ៉ាស៊ីនតោនពីបទឃោសនាបំផ្លើសការពិតចំពោះរឿងនេះ ព្រមទាំងឆ្លៀតព្រមានអាមេរិកកុំឲ្យធ្វើរឿងនេះជាថ្មីម្តងទៀត។ ចំណែកវ៉ាស៊ីនតោនវិញក៏បានព្រមានប៉េកាំងកុំឲ្យបង្ករឿងនេះជាថ្មីឡើងវិញដែរ។
លោកប្រធានាធិបតីអាមេរិកអូបាម៉ាមិនទាន់បានបញ្ចេញប្រតិកម្មអ្វីទេ តែលោកប្រធានាធិបតីជាប់ឆ្នោតថ្មីដូណាល់ ត្រាំបានចោទចិនជាចោរ និងថា អាមេរិកមិនត្រូវការដ្រូនដែលចិនបានលួចវិញទេ។ ប្រតិកម្មរបស់លោកត្រាំរបៀបនេះអាចនឹងធ្វើឲ្យចិនក្តៅក្រហាយកាន់តែខ្លាំង ចំពេលដែលចិននៅមិនទាន់ស្ងប់ចិត្តនឹងលោកត្រាំដែលបានជ្រលក់មាត់រកប្រធានាធិបតីតៃវ៉ាន់ និងព្រមានមិនទទួលស្គាល់គោលការណ៍ចិនតែមួយ។
យ៉ាងណាក៏ដោយពេលនេះ ព័ត៌មានដែលថាចិននឹងប្រគល់ដ្រូននោះឲ្យអាមេរិកវិញត្រូវបានបញ្ជាក់រួមគ្នាដោយភាគីចិន និងអាមេរិក តែគេមិនដឹងថា តើចិននឹងប្រគល់ដ្រូននោះទៅឲ្យអាមេរិកវិញនៅពេលណា និងដោយរបៀបណាទេ។ តែក្រុមអ្នកវិភាគបានមើលឃើញថា ចិនជាអ្នកមានប្រៀបលើអាមេរិកនៅក្នុងរឿងរ៉ាវថ្មីនេះ ព្រោះការស្ទាក់ស្រង់យកដ្រូនអាមេរិកនៅក្នុងសមុទ្រចិនខាងត្បូងជាសក្ខីកម្មមួយដែលប៉េកាំងចង់ប្រាប់វ៉ាស៊ីតោនថា ចិនមានសមត្ថភាព និងលទ្ធភាពគ្រប់គ្រាន់ក្នុងការឆ្លើយតបនឹងអាមេរិកគ្រប់ពេល និងគ្រប់ទីកន្លែងទាំងអស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ