អូស្រា្តលីចង់ដកលិខិតឆ្លងដែនពីជនជាប់ទោសរំលោភកុមារ
គេធ្លាប់និយាយច្រើនអំពីនយោបាយដាច់ខាត គ្មានអាណិតអាសូររបស់អូស្ត្រាលីចំពោះជនអន្តោប្រវេសន៍ ថ្ងៃនេះអូស្ត្រាលីកំពុងត្រៀមខ្លួនក្លាយជាប្រទេសដំបូងគេបង្អស់នៅលើពិភពលោក ខាងប្រយុទ្ធប្រឆាំងនឹងអាណាចារលើកុមារ។ អូស្ត្រាលីបានប្រកាសនៅថ្ងៃអង្គារទី ៣០ឧសភា ចង់ដកលិខិតឆ្លងដែនពីជនណាដែលមានទោសរំលោភបំពានអាណាចារលើកុមារ ដើម្បីទប់ស្កាត់ជននោះមិនឱ្យដើរប្រព្រឹត្តអំពើខុសឆ្គងជាថ្មីទៀត នៅបរទេស។
ចុះផ្សាយនៅថ្ងៃ៖
ស្តាប់ - ០២:០៤
គ្មានប្រទេសណាចាត់វិធានការខ្លាំងដូចអូស្ត្រាលីទេ ! អំណើះតទៅ ជនជាប់ទោសប្រព្រឹត្តអំពើអានាចារលើកុមារ ទំនងជាមិនអាចចាកចេញពីទឹកដីអូស្រ្តាលីបានទៀតទេ ជាពិសេសមិនអាចធ្វើដំណើរទៅប្រទេសណាដែលខ្លួនធ្លាប់ប្រព្រឹត្តកំហុសចាប់រំលោភ បំពារបំពានលើកុមារ និងក្មេងមិនទាន់ពេញវ័យ ! ដើម្បីទប់ស្កាត់ជំងឺលាប់ អូស្ត្រាលីមិនខ្លាចនឹងប្រើវិធានការក្តៅ ដែលប៉ះពាល់ដល់សិទ្ធិជាពលរដ្ឋទេ។
ប៉ុន្តែបើតាមតំណាងរាស្ត្រអូស្ត្រាលីម្នាក់ ដែលជាតំណាងប្រយុទ្ធប្រឆាំងនឹងអំពើអានាចារលើកុមារ អូស្ត្រាលីមិនខ្វល់នឹងសិទ្ធិនោះឡើយ ព្រោះបើអ្នករំលោភកុមារ អ្នកត្រូវតែបាត់បង់សិទ្ធិជាពលរដ្ឋខ្លះអញ្ចឹងហើយ។
វិធានការប្រឆាំងនឹងជនរំលោភបំពានផ្លូវភេទកុមារ ដែលអូស្ត្រាលីគ្រោងនឹងអនុវត្តមុនគេនៅលើពិភពលោក ត្រូវបញ្ជូនទៅសភាអូស្ត្រាលីពិនិត្យអនុម័តក្នុងពេលឆាប់ៗខាងមុខ។ ច្បាប់ថ្មី នឹងហាមជនជាប់ទោសអានាចារលើកុមារ មិនឱ្យដើរហើរសេរីទៅបរទេស ឬមានលិខិតឆ្លងដែនអូស្ត្រាលីកាន់នៅក្នុងដៃឡើយ។ នេះបើតាមប្រសាសន៍របស់រដ្ឋមន្ត្រីក្រសួងការបរទេសអូស្ត្រាលី លោកស្រី Julie Bishop។
គ្រាន់តែនៅឆ្នាំ២០១៦កន្លងទៅមួយឆ្នាំគត់សោះ មានជនពាលស្រលាញ់កុមារប្រមាណជិត ៨០០នាក់ បានចាកចេញពីអូស្ត្រាលី។ ពួកគេ ភាគច្រើន នាំគ្នាធ្វើដំណើរទៅប្រទេសនៅតំបន់អាស៊ី ដោយរំលោភបម្រាម មិនមកជូនដំណឹងភ្នាក់ងារមានសមត្ថកិច្ចជាមុនទេ និងក្នុងនោះមានពាក់កណ្តាលអាចនឹងប្រព្រឹត្តអំពើរំលោភអានាចារលើកុមារជាថ្មី។ អំពើអានាចារនៅបរទេសដែលបំពុលរូបភាពប្រទេសអូស្ត្រាលីខ្លាំងណាស់ ជាក់ស្តែងករណីកាត់ទោសជនRobert Andrew Fiddes Ellis អាយុ៧០ នៅក្រុងបាលីប្រទេសឥណ្ឌូណេស៊ី ឱ្យជាប់ពន្ធនាគារ១៥ឆ្នាំ ពីបទរំលោភកុមារី និងក្មេងជំទង់១១នាក់។
ប្រសិនបើច្បាប់ប្រឆាំងនឹងជនរំលោភកុមារចូលជាធរមានមែន នោះអូស្ត្រាលីនឹងអាចរឹបអូស ដកលិខិតឆ្លងដែនប្រមាណ២ម៉ឺនក្បាល ពីជនជាប់ទោសដែលអនុវត្តទោសរួចហើយ តែស្ថិតនៅក្រោមការតាមដានរបស់តុលាការនៅឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ