លោកមូន ចៃអ៊ីនបញ្ជារឲ្យស៊ើបអង្កេតលើការដំឡើងប្រព័ន្ធខែលមីស៊ីលថ្មីរបស់អាមេរិក
នៅក្នុងអាណត្តិដឹកនាំរបស់ប្រធានាធិបតីថ្មី កូរ៉េខាងត្បូងមិនមែនចេះតែយល់ស្របជាមួយសម្ព័ន្ធមិត្តអាមេរិក។ នៅថ្ងៃអង្គារទី ៣០ ឧសភា លោកប្រធានាធិបតីមូន ចៃអ៊ីនបានបញ្ជារឲ្យបើកការស៊ើបអង្កេតទៅលើការពង្រាយប្រព័ន្ធខែលមីស៊ីលរបស់អាមេរិក Thaad ដែលបើតាមវិមានប្រធានាធិបតី ត្រូវបានធ្វើឡើងដោយសម្ងាត់ ដោយភាគីអាមេរិក។
ចុះផ្សាយនៅថ្ងៃ៖
អ្នកនាំពាក្យរបស់ប្រធានាធិបតីកូរ៉េខាងត្បូង បាននិយាយថា លោកមូន ចៃអ៊ីនភ្ញាក់ផ្អើលមែនទែន នៅពេលទីប្រឹក្សាយោធាប្រាប់លោកថា ប្រព័ន្ធខែលមីស៊ីលចំនួន ៤គ្រឿង ត្រូវបានអាមេរិកនាំចូលរួចហើយ ក្នុងទឹកដីកូរ៉េខាងត្បូង។ លោកមូន ចៃអ៊ីនបានបញ្ជារឲ្យមានការស៊ើបអង្កេតទៅលើរឿងនេះ ព្រោះថា ប្រព័ន្ធខែលមីស៊ីលរបស់អាមេរិក Thaad ត្រូវបាននាំចូល កូរ៉េខាងត្បូង ដោយគ្មានបានសុំការអនុញ្ញាត ឬជូនដំណឹងជាមុន ដល់រដ្ឋបាល និងប្រជាជនកូរ៉េខាងត្បូង។
ប្រព័ន្ធខែលមីស៊ីល៤គ្រឿងត្រូវបាននាំចូលបន្ថែមពីលើប្រព័ន្ធខែលមីស៊ីលពីរគ្រឿង ដែលអាមេរិកបាននាំចូល ទៅដំឡើង នៅប៉ុន្មានថ្ងៃមុន លោកមូន ចៃអ៊ីនឈ្នះឆ្នោតប្រធានាធិបតី ថ្ងៃទី ១០ឧសភា។ ប្រព័ន្ធខែលមីស៊ីលរបស់អាមេរិក ត្រូវបានអតីតប្រធានាធិបតីកូរ៉េខាងត្បូង លោកស្រី ប៉ាក់ គុនហេ ចុះកិច្ចព្រមព្រៀងជាមួយអាមេរិក ក្នុងគោលដៅ យកទៅប្រើប្រាស់ដើម្បីទប់ទល់នឹងការបាញ់មីស៊ីលរបស់កូរ៉េខាងជើង។ ប៉ុន្តែ ទីក្រុងប៉េកាំង បានប្រឆាំងនឹងការពង្រាយខែលមីស៊ីលរបស់អាមេរិក ដែលចិនចាត់ទុកថា ជាឧបករណ៍ យកការណ៍ និងគំរាមកំហែងយុទ្ធសាស្រ្តយោធារបស់ចិន។
វត្តមានរបស់ប្រព័ន្ធខែលមីស៊ីលរបស់អាមេរិក នៅទឹកដីកូរ៉េខាងត្បូង គឺជាប្រធានបទសំខាន់នៅក្នុងយុទ្ធនាការឃោសនាបោះឆ្នោតប្រធានាធិបតីកូរ៉េខាងត្បូង ដោយសារមានការប្រឆាំងពីប្រជាជនកូរ៉េខាងត្បូងទៅលើការតាំងទីប្រព័ន្ធខែលមីស៊ីលThaad។ នៅក្នុងយុទ្ធនាការឃោសនាបោះឆ្នោត លោកមូន ចៃអ៊ីនធ្លាប់បានសន្យាថា លោកនឹងទាមទារឲ្យសភាធ្វើការពិនិត្យឡើងវិញ លើការពង្រាយប្រព័ន្ធខែលមីស៊ីលរបស់អាមេរិក។ លោកមូន ចៃអ៊ីន ដែលធ្លាប់សរសេរក្នុងសៀវភៅរបស់លោកថា កូរ៉េខាងត្បូងត្រូវតែចេះនិយាយទេ ជាមួយអាមេរិក ហាក់មិនសូវគាំទ្រនឹងគំនិតតាំងពង្រាយខែលមីស៊ីលរបស់អាមេរិកនោះទេ។ លោកមូន ចៃអ៊ីន មកពីក្រុមសេរីនិយម មានបំណងចង់ចរចាជាមួយកូរ៉េខាងជើង ដើម្បន្ធូរបន្ថយភាពតានតឹង ជាជាង ប្រឈមមុខនឹងរបបព្យុងយ៉ាង៕
មេបញ្ជាការទ័ពអាមេរិកប្រចាំកូរ៉េខាងត្បូង នៅ មិនទាន់បានអត្ថាធិប្បាយទៅលើរឿងនេះនៅឡើយទេ។ តាំងពីចប់សង្រ្គាមលោកលើកទី២ អាមេរិកមានកងទ័ពរបស់ខ្លួន ប្រមាណ ២៨៥០០នាក់ ប្រចាំការនៅកូរ៉េខាងត្បូង ទៅតាមកិច្ចព្រមព្រៀង រវាងទីក្រុងសេអ៊ូល និងវ៉ាស៊ីនតោន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ