អូស្រា្តលី និងអាមេរិកបើកកិច្ចប្រជុំប្រចាំឆ្នាំថ្នាក់រដ្ឋមន្រ្តីការបរទេស និងការពារជាតិ
នៅថ្ងៃចន្ទ ទី៥ មិថុនានេះ រដ្ឋមន្រ្តីការបរទេស និងរដ្ឋមន្រ្តីការពារជាតិនៃប្រទេសអូស្រ្តាលី និងសហរដ្ឋអាមេរិកបានបើកកិច្ចប្រជុំប្រចាំឆ្នាំក្នុងទីក្រុងស៊ីដនី។ មានសំណុំរឿងជាច្រើនដែលភាគីទាំងពីរបានលើកយកទៅជជែក ក្នុងនោះ ការទទួលខុសត្រូវរបស់ចិននៅលើឆាកអន្តរជាតិ បញ្ហានុយក្លេអែរកូរ៉េខាងជើង និងភេរវនិយមបានក្លាយជាប្រធានបទអាទិភាព។ លោករដ្ឋមន្រ្តីការបរទេសអាមេរិក Tillerson បានថ្លែងដោយមិនលាក់លៀមថា ចិនមិនអាចគេចផុតពីការទទួលខុសត្រូវអន្តរជាតិរបស់ខ្លួននៅក្នុងបញ្ហាសមុទ្រចិន ឬមួយក៏បញ្ហានុយក្លេអ៊ែរកូរ៉េខាងជើងបានទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០២
ជាថ្មីម្តងទៀត អាមេរិកបានបន្តប្រើធម៌ក្តៅផង និងធម៌ត្រជាក់ផងដាក់ចិន។ ទន្ទឹមនឹងការចង់បានទំនាក់ទំនងពោរពេញដោយក្តីស្ថាបនាជាមួយចិន លោករដ្ឋមន្រ្តីការបរទេសអាមេរិក Rex Tillerson បានបញ្ជាក់ច្បាស់ៗថា គេពិតជាមិនអាចទុកបណ្តោយឲ្យចិនប្រើសិទ្ធិអំណាចសេដ្ឋកិច្ចរបស់ខ្លួនដើម្បីវាតទីក្រសោបយកប្រយោជន៍តែម្នាក់ឯង ហើយគេចយករួចខ្លួនពីបញ្ហាប្រឈមផ្សេងទៀតទេ។ នៅក្នុងន័យនេះ លោក Tillerson បាននិយាយត្រង់ៗលើមហិច្ឆតាយោធារបស់ចិននៅក្នុងសមុទ្រចិន និងការដែលចិនមិនបានដាក់គំនាបគ្រប់គ្រាន់លើកូរ៉េខាងជើងក្នុងបញ្ហានុយក្លេអ៊ែរ។
តាមលោក Tillerson អាមេរិក និងអូស្រ្តាលីបានបញ្ជាក់ជាថ្មីម្តងទៀតពីការសន្យារបស់ខ្លួនស្តីពីសេរីភាពធ្វើចរាចរណ៍ផ្លូវសមុទ្រ និងផ្លូវអាកាសតាមគ្រប់មធ្យោបាយដោយស្របច្បាប់នៅសមុទ្រចិនខាងត្បូង ឬមួយនៅកន្លែងផ្សេងដែលជាដែនទឹកអន្តរជាតិ។ ទន្ទឹមគ្នានេះ លោកប្រមុខការទូតអាមេរិកដដែលក៏បានព្រមានប្រឆាំងជាថ្មីលើកោះសិប្បនិម្មិត និងមូលដ្ឋានយោធាដែលចិនបានសាងសង់នៅក្នុងសមុទ្រចិនខាងត្បូង។ ទាក់ទងនឹងបញ្ហានុយក្លេអ៊ែរកូរ៉េខាងជើង អាមេរិក និងអូស្រ្តាលីបាននិយាយសម្លេងតែមួយដូចគ្នាដោយអំពាវនាវឲ្យក្រុងព្យុងយ៉ាងបោះបង់ចោលកម្មវិធីនុយក្លេអ៊ែរ និងគ្រាប់មីស៊ីលខុសច្បាប់របស់ខ្លួន។
ដោយឡែក លោករដ្ឋមន្រ្តីការពារជាតិអាមេរិក James Mattis និងសមភាគីអូស្រ្តាលីលោកស្រី Marise Payne បានផ្តោតលើយុទ្ធនាការប្រយុទ្ធប្រឆាំងនឹងអង្គការរដ្ឋអ៊ីស្លាម។ ក្តីបារម្ភជាងគេក្នុងបញ្ហានេះ គឺការវិលត្រឡប់ចូលស្រុកវិញពីបរទេសរបស់ពួកជីហាតដែលបានចេញទៅចូលរួមរៀនសូត្រជាមួយអង្គការរដ្ឋអ៊ីស្លាមនៅស៊ីរី ឬអ៊ីរ៉ាក់។ គឺពួកនេះហើយដែលជាដង្កូវចេញពីសាច់ឯងដើរបង្កភេរវកម្មក្នុងស្រុក។ បើតាមរដ្ឋាភិបាលអូស្រ្តាលី គិតតាំងពីឆ្នាំ ២០១៤ មក ប៉ូលិសបានបង្រ្កាបទាន់ពេលលើគម្រោងធ្វើភេរវកម្មចំនួន ១២លើក និងបានចាប់ជនសង្ស័យឃុំទុកជាង ៦០នាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ