ក្រុមឧទ្ទាមរ៉ូហ៊ីងយ៉ាត្រៀមចូលរួម កាត់បន្ថយ ភាពតានតឹងនៅរដ្ឋរ៉ាឃីន
នៅថ្ងៃសៅរ៍ គឺនៅតែពីរថ្ងៃមុន ឧសានវាទនៃបទឈប់បាញ់ នៅរដ្ឋរ៉ាឃីន ក្រុមឧទ្ទាមទ័ពព្រៃ ដើម្បីរ៉ូហ៊ីងយ៉ាបានបង្ហាញជំហរចង់ចូលរួមដោះស្រាយ ដើម្បីភាពធូស្រាលឡើងវិញ នៅរដ្ឋរ៉ាឃីន។ កាលពីមួយខែមុន ពួកឧទ្ទាមទ័ពព្រៃ ឈ្មោះថា កម្លាំង រំដោះរ៉ូហ៊ីងយ៉ា នៅអារ៉ាខាន បានប្រកាសជាឯតោភាគី បទឈប់បាញ់ រយៈពេលមួយខែ ដើម្បីសម្រួលដល់ការផ្តល់ជំនួយ មនុស្សធម៌ ដល់ជនជាតិភាគតិចរ៉ូហ៊ីងយ៉ា ដែលបានរត់គេចចេញពីអំពើហិង្សា នៅរដ្ឋរ៉ាឃីន របស់ប្រទេសភូមា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៣
បទឈប់បាញ់ ប្រកាស ជាឯកតោភាគី ដោយពួកឧទ្ទាម រំដោះរ៉ូហ៊ីងយ៉ា ហៅកាត់ថា ARSA នឹងត្រូវចប់ នៅយប់ថ្ងៃចន្ទ ខានស្អែក។ ប៉ុន្តែ នៅក្នុងសេចក្តីប្រកាសរបស់ខ្លួន នៅថ្ងៃសៅរ៍នេះ ក្រុមឧទ្ទាមរ៉ូហ៊ីងយ៉ា ដែលប្រយុទ្ធតទល់នឹងកងទ័ពភូមា តាំងពីខែសីហា បានបង្ហាញថា ក្រុមខ្លួន ត្រៀមខ្លួន ដើម្បី ចូលរួម បន្ធូរបន្ថយភាពតានតឹង នៅរដ្ឋរ៉ាឃីន ទៅតាមវិធានការរបស់រដ្ឋាភិបាលភូមា។ ប៉ុន្តែ ក្រុមឧទ្ទាមរ៉ូហ៊ីងយ៉ាបានបញ្ជាក់ដែរថា ក្រុមខ្លួននឹងនៅតែប្តេជ្ញាធ្វើសកម្មភាព ដើម្បីបញ្ឈប់រាល់ការបង្ក្រាប និងនយោបាយសង្កត់សង្កិនទៅលើជនជាតិរ៉ូហ៊ីងយ៉ា។
អាជ្ញាធរភូមា នៅមិនទាន់ធ្វើអត្ថាធិប្បាយអ្វីទៅនឹងការប្រកាសរបស់ក្រុមឧទ្ទាមនៅថ្ងៃសៅរ៍នេះទេ។ ប៉ុន្តែ កាលពីមួយខែមុន នៅក្រោយការប្រកាសបទឈប់បាញ់ ជាឯកតោភាគី ដោយឯកឯងរបស់ក្រុមឧទ្ទាម ARSA អ្នកនាំពាក្យរបស់រដ្ឋាភិបាលភូមាបានលើកឡើងហើយថា រដ្ឋាភិបាលគ្មាននយោបាយចរចាជាមួយ ពួកភេរវជននោះទេ។
កងទ័ពភូមាបានចាត់ទុកពួកឧទ្ទាមរ៉ូហ៊ីងយ៉ា ថា ជាក្រុមភេរវជន ដែលបានបើកការវាយប្រហារទៅលើប៉ុស្តិ៍ប៉ូលិសភូមា ជាច្រើនកន្លែង នៅរដ្ឋរ៉ាឃីន នៅថ្ងៃទី ២៥សីហាកន្លងទៅ។ តាំងពីពេលនោះមក កងទ័ពភូមាបានបើកការបង្រ្កាបតបវិញ រហូតធ្វើឲ្យកើតផ្ទុះជាអំពើហិង្សា ដែលជាដើមហេតុនៃការរត់ភៀសខ្លួនរបស់ប្រជាជនរ៉ូហ៊ីងយ៉ារាប់ម៉ឺននាក់ពីរដ្ឋរ៉ាឃីន ទៅប្រទេសបង់ក្លាដែស ដែលមានព្រំដែនជាប់ភូមា។
រហូតមកដល់ថ្ងៃនេះ គេនៅមិនទាន់ដឹងច្បាស់ពីសមាសភាព ចំនួនសមាជិករបស់ក្រុមឧទ្ទាមរ៉ូហ៊ីងយ៉ានោះទេ។ នៅក្នុងបទសម្ភាសន៍ជាមួយអ្នកកាសែតរបស់ទីភ្នាក់ងារព័ត៌មានអង់គ្លេស Reuters នៅខែមីនាដើមឆ្នាំនេះ ប្រធានរបស់ចលនាដើម្បីរំដោះជនជាតិរ៉ូហ៊ីងយ៉ា ARSA បានអះអាងថា ចលនានេះ ត្រូវបានបង្កើតឡើង ដើម្បីការពារសិទ្ធិរបស់អ្នកកាន់សាសនាអ៊ីស្លាម និងគ្មានចំណងទាក់ទាញជាមួយក្រុមអង្គការអ៊ីស្លាមបរទេសនោះទេ។
ចលនារំដោះជនជាតិរ៉ូហ៊ីងយ៉ា កើតឡើង នៅឆ្នាំ ២០១៦ នៅក្រោយជម្លោះសាសនាដ៏ហិង្សា រវាងអ្នកកាន់សាសនាព្រះពុទ្ធ និងអ្នកកាន់សាសនាអ៊ីស្លាម នៅ ភូមា នៅឆ្នាំ ២០១២ ដែលបានសម្លាប់មនុស្សជិត ២០០នាក់ និងធ្វើឲ្យជនជាតិរ៉ូហ៊ីងយ៉ា រត់ភៀសខ្លួន ជាង ១សែននាក់។ តាមអ្នកតាមដានមួយចំនួន ក្រុមឧទ្ទាមគ្មានកម្លាំង ដើម្បីប្រយុទ្ធទប់ទល់នឹងកងទ័ពភូមាបានទេ នៅក្នុងមួយរយៈពេលចុងក្រោយនេះ។ គេបានចោទសួរថា តើពួកឧទ្ទាមរ៉ូហ៊ីងយ៉ានឹងអាចប្រមូលផ្តុំកម្លាំង រើសបញ្ចូលសមាជិករបស់ខ្លួនបានយ៉ាងម៉េច បើកងទ័ពភូមា បានវាយបណ្តេញ ប្រជាជនរ៉ូហ៊ីងយ៉ា និងបានកាត់ផ្តាច់ផ្លូវផ្តល់ស្បៀង ហិរញ្ញវត្ថុ និងការយកការណ៍សម្ងាត់ អស់ខ្ទេចខ្ទីរ គ្មានសល់យ៉ាងដូច្នេះនោះ?
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ