ចិននឹងហាមឃាត់ការជួញដូរភ្លុកទាំងស្រុងចាប់ពីថ្ងៃអាទិត្យទី៣១ធ្នូទៅ
ចិនដែលជាប្រទេសទី១ខាងនាំភ្លុកដំរីចូល នឹងហាមឃាត់ទាំងស្រុងរាល់ការជួញដូរភ្លុកចាប់ពីថ្ងៃអាទិត្យទី៣១ធ្នូទៅ។ វិធានការថ្មីរបស់ចិននេះ ត្រូវបានអង្គការនានាខាងផ្នែកការពារធម្មជាតិនិងប្រភេទសត្វងាយរងគ្រោះ សម្តែងការអបអរសាទរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៩
រហូតមកទល់ពេលនេះ ប៉េកាំង បានអនុញ្ញាតឲ្យលក់ដូរតែរបស់របរធ្វើពីភ្លុកដំរីណាដែលទិញបាននៅមុនការអនុម័តអនុសញ្ញាឆ្នាំ១៩៧៥ ស្តីពីពាណិជ្ចកម្មអន្តរជាតិលើប្រភេទសត្វនិងរុក្ខជាតិព្រៃដែលត្រូវគំរាមផុតពូជ និងក៏ដរាបណាវត្ថុទាំងនោះមានវិញានប័នប័ត្រស្របច្បាប់។ ក៏ប៉ុន្តែអង្គការ ការពារបរិស្ថាននានា នៅតែយល់ឃើញថា” ការបើកចំហរទីផ្សារចិននិងហុងកុង គឺជាការលើកទឹកចិត្តមួយដល់ការជួញដូរខុសច្បាប់។
ម្យ៉ាងទៀត ការប្រម៉ាញ់សត្វព្រៃខុសច្បាប់ ក៏ជាកត្តាដ៏ចម្បងដែលជំរុញឲ្យចំនួនដំរីព្រៃ មានការធ្លាក់ថយចុះជាគំហុកនៅទ្វីបអាហ្រិ្វក ។ អង្គការក្រៅរដ្ឋាភិបាលទាំងនោះក៏ បានជូនដំណឹងដែរថា ដំរីចំនួនជាង៣ម៉ឺនក្បាល ត្រូវបានគេសម្លាប់ជារៀងរាល់ឆ្នាំ។
យោងអង្គការក្រៅរដ្ឋាភិបាលផ្នែកការពារបរិស្ថាន WWF វិញ “ នៅចុងឆ្នាំ ២០១៦ ដំរីព្រៃនៅលើទ្វីបអាហ្វ្រិក នៅសល់ចំនួនប្រមាណជា ៤១ម៉ឺន៥០០០ក្បាលតែប៉ុណ្ណោះ ដែលផ្ទុយពីជំនាន់ដើមសតវត្សរ៍ទី២០ ចំនួនដំរីព្រៃ មាន ពី៣ លាន ទៅដល់ ៥លានក្បាល។
ចាប់ពីអំណេះតទៅ ដំរីព្រៃ ត្រូវបានគេចាត់ទុកជាប្រភេទសត្វមួយដែលងាយនឹងរងគ្រោះថ្នាក់បំផុត។ យ៉ាងណាមិញ ទស្សនៈវិស័យលើការហាមជួញដូរភ្លុកទាំងស្រុងនៅក្នុងប្រទេសចិនដែលត្រូវបានជូនដំណឹងតាំងពីចុងឆ្នាំមុន ក៏បានជួយជំរុញអោយការរិបអូសភ្លុកដំរីខុសច្បាប់ ធ្លាក់ចុះ ៨០% និង តម្លៃ ភ្លុកដំរី ធ្លាក់ចុះ៦៥% ដែរ បើប្រៀបធៀបទៅនឹងឆ្នាំ២០១៤-នេះជាការលើកឡើងរបស់អង្គការការពារបរិស្ថាន WildAid។
ម្យ៉ាងទៀត នៅក្រោមសេចក្តីសម្រេចចិត្តរបស់អាជ្ញាធរចិននេះ រោងចក្រនិងហាងលក់ទំនិញនានា ដែលពាក់ព័ន្ធនឹងពាណិជ្ជកម្មភ្លុកដំរី ចំនួន១៧២ កន្លែងនឹងត្រូវបិទទ្វារ។ នៅលើបញ្ហានេះ លោក Peter Knights នាយកនៃអង្គការការពារបរិស្ថាន WildAid បានសំដែងការអបអរសាទរយ៉ាងក្រៃលែង និង អះអាងថា គឺជាវិធានការឯកតោភាគីដ៏សំខាន់បំផុតមួយរបស់ប្រទេសចិននៅក្នុងការប្រយុទ្ធប្រឆាំងទល់នឹងការប្រម៉ាញ់សត្វដំរីព្រៃ។
ទន្ទឹមនេះ អង្គការក្រៅរដ្ឋាភិបាលផ្សេងៗទៀត ក៏បានសំដែងការសោកស្តាយដែរ ដោយហេតុថា ការហាមឃាត់ខាងលើនេះ នៅពុំទាន់អនុវត្ត នៅហុងកុងនៅឡើយទេ ពីព្រោះ ហុងកុង ក៏ជាទីផ្សារ ដ៏ធំទីមួយដែរ នៅលើការលក់រាយ របស់របរធ្វើពីភ្លុកដំរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ