ប៉េកាំងរឹតនិងនយោបាយប្រយុទ្ធប្រឆាំងនឹងភេរវនិយម
ចុះផ្សាយនៅថ្ងៃ៖
ស្តាប់ - ០៥:១៧
សាងសង់ជញ្ជាំងប្រឆាំងនឹងអន្តោប្រវេសន៍ ! នេះជាគំនិតរបស់លោកដូណាល់ ត្រាំ ប្រធានាធិបតីអាមេរិក ! ឯនៅចិនវិញ គំនិតសាងសង់ជញ្ជាំងដែក ការពារព្រំដែន ទប់ស្កាត់មិនឱ្យពួកអ៊ីស្លាមជ្រុលនិយមច្រៀតចូលបាន កំពុងលេចជារូបរាងអនុវត្តនៅក្នុងតំបន់ស្វ័យតស៊ីនជាំង តំបន់ភាគពាយ័ព្យបំផុតរបស់ប្រទេសចិនហើយ។ តំបន់ដែលមានប្រជាជនរស់នៅជាង១០លាននាក់ ជាជនជាតិអ៊ុយហ្គួរ កាន់សាសនាអ៊ីស្លាម និងមានដើមកំណើតប្រពៃណីទំនៀមទម្លាប់ដូចតួកគី។ ជនជាតិភាគតិចចិនមួយក្រុមនេះរងការបង្ក្រាបយ៉ាងធ្ងន់ធ្ងរ ក្រោមលេសនយោបាយប្រយុទ្ធប្រឆាំងនឹងភេរវនិយម។
ផ្តាច់ទឹកដីនិយម ជនជ្រុលនិយម និងភេរវនិយម ជាពាក្យបីម៉ាត់ដ៏អាក្រក់បំផុត ដែលប៉េកាំង ចង់លុបបំបាត់ឱ្យបាន។ ក្នុងន័យនេះ រដ្ឋមន្ត្រីក្រសួងការពារជាតិចិន មិនខ្លាចនឹងលើកវិធានការដ៏អស្ចារ្យ រក្សាសន្តិសុខ តាមព្រំដែនប្រវែង ៥៧០០គីឡូម៉ែត្រ ដែលខណ្ឌចែកតំបន់ស៊ីនជាំង របស់ចិន ពីប្រទេសប៉ាគីស្ថាន អាហ្វហ្កានីស្ថាន និងកាហ្សាក់ស្ថានទេ។
រដ្ឋមន្ត្រីក្រសួងការពារជាតិចិន លោក ចង់ វងហ្ក័ង ចង់សាងសង់ “ជញ្ជាំងដែកថែប” តែម្តង ! ព្រោះសម្រាប់ក្រសែភ្នែកអាជ្ញាធរប៉េកាំង វាគឺជាមធ្យោបាយការពារកុំឱ្យពួកយុទ្ធជនអ៊ីស្លាមជ្រុលនិយម អាចឆ្លងព្រំដែនជ្រៀតចូលមកក្នុងទឹកដីបាន។ ខុសពីជញ្ជាំងទប់ស្កាត់អន្តោប្រវេសន៍របស់អាមេរិក “ជញ្ជាំងដែកថែប” របស់ចិននេះរួមមាន ការល្បាតកាន់តែច្រើន ការបង្វឹកបង្ហាត់ទាហានសម្រាប់ប្រយុទ្ធ បង្កើនបរិមាណរថពាសដែក និងបង្កើនទាហានប្រដាប់អាវុធ។
រយៈពេលប៉ុន្មានខែចុងក្រោយនេះ ចិនបានពង្រឹងវិធានការបន្ថែមយ៉ាងតឹងរឹងរួចស្រេចទៅហើយ ក្នុងកម្មវត្ថុទប់ស្កាត់ចាប់ពួកជីហាតត្រលប់មកពីស៊ីរី។ ចិនបានថែមទាំងចាប់ផ្តើមចរចាជាមួយអាហ្វហ្កានីស្ថាន ដើម្បីឈានទៅសាងសង់មូលដា្ឋនយោធានៅក្នុងទឹកដី និងលើភ្នំអាហ្វហ្កានីស្ថាន ដោយអាហ្វហ្កានីស្ថាន តាមរយៈជំនួយទាំងស្រុង ជាថវិកា ជាការបំពាក់អាវុធ និងហ្វឹកហ្វឺន ពីចិន ជាថ្នូរនឹងការរក្សាសិ្ថរភាពសន្តិសុខតំបន់ព្រំដែន និងធ្វើជារនាំងទប់ស្កាត់សកម្មភាពរបស់ជនជាតិភាគតិចអ៊ុយហ្គួរនិរទេសខ្លួនផង និងសកម្មជាននៃចលនាអ៊ីស្លាមតួគីស្ថានខាងកើតផង ឬពួកអង្គការរដ្ឋអ៊ីស្លាមដែលរត់ខ្ចាត់ខ្ចាយពីអ៊ីរ៉ាក់និងស៊ីរីផង កុំឱ្យជ្រៀតចូលមកតំបន់ស៊ីនជាំងតាមច្រករបៀងនេះបាន។
ម្យ៉ាងទៀត ចិនបានជ្រើសរើសនាយប៉ូលិសជារាប់ពាន់នាក់បន្ថែមទៀត នៅស៊ីនជាំង។ ចំណាត់ការបែបនេះ ស្ថិតក្នុងក្របខ័ណ្ឌនៃនយោបាយប្រយុទ្ធប្រឆាំងនឹងពួកភេរវនិយម ដែលក៏ជាការដៅទៅលើ និងជាពិសេសទៅលើជនជាតិភាគតិចអ៊ុយហ្គួរ រស់នៅក្នុងខេត្តស៊ីនជាំងនេះដែរ។ តំបន់ដែលមានផ្ទុះអំពើហិង្សាយ៉ាងខ្លាំង កាលពីឆ្នាំ២០១៣-២០១៣ ពីរឆ្នាំដំបូងដែលលោកស៊ី ជីនពីង ទើបបានឡើងកាន់អំណាច។ ហេតុដូច្នេះហើយបានជាប៉េកាំង មួលបន្តឹងតំបន់នេះដោយគ្មានសំចៃយ៉ាងដូច្នេះ។
តាមការពិតទៅ ស៊ីនជាំងបានក្លាយជាមន្ទីរពិសោធន៍នៃការត្រួតពិនិត្យ ដ៏ទំនើបចុងក្រោយបំផុត។ ជាតំបន់ដែលមានសុវត្ថិភាពជ្រុល ! នៅតាមគ្រប់ស្ថានីយ៍រថភ្លើង មានទាហាន កាន់កាំភ្លើងស្វ័យប្រវត្តិ បំពាក់ដោយអាវុធដ៏សម្បើម ឈរយាមត្រៀបត្រា លើរថពាសដែក នៅច្រកចូល។ គ្រប់អ្នកដំណើរត្រូវឆ្លងកាត់ទ្វារសុវត្ថិភាព សំពាយអីវ៉ាន់ត្រូវឆ្លងកាត់ម៉ាស៊ីនត្រួតពិនិត្យកាំរស្មីX បីដងទម្រាំបានឡើងជិះរថភ្លើងបាន ! ផ្ទៀងផ្ទាត់ឈ្មោះ ម្តងហើយម្តងទៀត ទាំងចេញទាំងចូល ! ភ្នាក់ងារ Bloomberg បានលើកឡើងអំពីការស្ថានភាពនៃការសាកល្បងតាមដានដោយប្រើបច្ចេកវិទ្យាទាន់សម័យ ថតមុខមនុស្ស អាចរកអត្តសញ្ញាណបានភ្លាម ! ម៉ាស៊ីននេះថតគ្រប់សកម្មភាព ហើយបញ្ជូនព័ត៌មានចេញសញ្ញាអាសន្ន ទៅឱ្យស្នងការប៉ូលិសភ្លាម ប្រសិនបើជនសង្ស័យ ហ៊ានដើរឃ្លាតចេញពីផ្ទះ ឬពីកន្លែងធ្វើការ លើសពីបីរយម៉ែត្រ។
គ្រប់រថយន្តសុទ្ធតែមានបំពាក់ប្រព័ន្ធGPS ដែលអាចតានដានដឹងរាល់គ្រប់ចលនា របស់អ្នកបើកបរ។ ហើយប្រជាពលរដ្ឋគ្រប់រូប ដែលចូលក្នុងផ្សារ ត្រូវថតស្កានទាំងអស់។ ស៊ីនជាំង ជារដ្ឋប៉ូលិស high-tech ហាយតិច ដែលមានតំបន់ណាអាចប្រៀបប្រដូចបានឡើយ។ គឺជាគុក ឥតជញ្ជាំង គ្របមេឃ ! នេះបើតាមការបរិហាររបស់សមាគមជនជាតិអ៊ុយហ្គួរនិរទេសខ្លួននៅបរទេស។
ចំណែកអង្គការក្រៅរដ្ឋាភិបាលការពារសិទ្ធិមនុស្ស Human Rights Watch វិញលើកឡើងថា មានការរំលោភជីវិតឯកជនរបស់ជនគ្រប់រូបនៅស៊ីនជាំង។ បើអង្គការនេះដដែល អាជ្ញាធរចិនកំពុងតែដើរប្រមូលគំរូ DNA របស់ប្រជាជន ក្រោមរូបភាពផ្តល់ការពិនិត្យសុខភាពដោយឥតគិតថ្លៃ។
អង្គការ Human Rights Watch ក៏បានទាញសញ្ញាអាសន្នផងដែរ ស្តីអំពីស្ថានភាពនៅក្នុងមជ្ឈមណ្ឌលអប់រំ (ពន្ធនាគារ)។ មជ្ឈមណ្ឌលដែលអាជ្ញាធរប៉េកាំង ចាត់ទុកជា មជ្ឈមណ្ឌលហ្វឹកហ្វឺននយោបាយ។ ជនជាតិអ៊ុយហ្គួរជាប់សង្ស័យគ្រប់រូប សុទ្ធតែប្រឈមនឹងហានិភ័យជាប់ខ្លួននៅក្នុងមជ្ឈមណ្ឌលនោះរាប់សិបខែ ដោយគ្មានឆ្លងកាត់ការតុលាការនិងការកាត់ក្តីអ្វីទាំងអស់។
គ្រាន់តែធ្វើធម្មយាត្រា ទៅកាន់វិហារ La Mecque ឬក៏មានទំនាក់ទំនងជាមួយមនុស្សរស់នៅបរទេស ជាការគ្រប់គ្រាន់ល្មមនឹងធ្វើឱ្យជនអ៊ុយហ្គួររូបនោះ រងទណ្ឌកម្មបញ្ជូនចូលទៅកាន់មជ្ឈមណ្ឌលអប់រំជាច្រើនវគ្គ ដើម្បីរៀនសូត្រទន្ទេញច្បាប់ចិន និងមើលឯកសារ និងភាពយន្តឃោសនានយោបាយកុម្មុយនិស្ត។
តើមានជនជាតិអ៊ុយហ្គួរប៉ុន្មាននាក់ដែលកំពុងជាប់ក្នុងមជ្ឈមណ្ឌលអប់រំនយោបាយនោះ ? គ្មានទេតួលេខពិតប្រាកដ ! វិទ្យុអាស៊ីសេរី បានប៉ាន់ស្មានតាមរយៈប្រភពមន្ត្រីផ្លូវការម្នាក់ថា គ្រាន់តែនៅក្នុង នៅក្នុងខេត្តKeshgar តែប៉ុណ្ណោះ គេរាប់ឃើញមានចំនួនជនជាប់ក្នុងមជ្ឈមណ្ឌលអប់រំ ដល់ទៅប្រមាណ១២ម៉ឺននាក់។ ជនជាប់ឃុំទាំងនោះ គ្មានប្រព្រឹត្តបទឧក្រិដ្ឋអ្វីទាំងអស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ