វិបត្តិរ៉ូហ៊ីងយ៉ា៖គណៈប្រតិភូនៃក្រុមប្រឹក្សាសន្តិសុខអង្គការសហប្រជាជាតិទៅបង់ក្លាដែស និងភូមា
បន្ទាប់ពីប្រទេសបង់ក្លាដែស គណៈប្រតិភូនៃក្រុមប្រឹក្សាសន្តិសុខអង្គការសហប្រជាជាតិបានបន្តដំណើរទស្សនកិច្ចរយៈពេល ២ថ្ងៃនៅក្នុងប្រទេសភូមា។ ដំណើរទស្សនកិច្ចនៅបង់ក្លាដែស និងភូមាបានធ្វើឡើងនៅក្នុងបរិបទនៃវិបត្តិរ៉ូហ៊ីងយ៉ាដែលជាជនជាតិភាគតិចកាន់សាសនាអ៊ីស្លាមរស់ក្នុងប្រទេសភូមា។ តែមានជនជាតិភាគតិចមួយនេះជិត ៧០០ ០០០នាក់បានរត់ភៀសខ្លួនទៅជ្រកកោនក្នុងទឹកដីប្រទេសបង់ក្លាដែសដើម្បីគេចពីការធ្វើទុក្ខបុកម្នេញរបស់ទ័ពរដ្ឋាភិបាលភូមា។ អង្គការសហប្រជាជាតិបានចាត់ទុកទង្វើរបស់ទ័ពរដ្ឋាភិបាលភូមាថា ជាការបោសសំអាតជាតិពិន្ធុ តែរដ្ឋាភិបាលក្រុងណៃពីដ៏តែងចេញមុខបដិសេធ។
ចុះផ្សាយនៅថ្ងៃ៖
ស្តាប់ - ០២:២៥
នៅក្នុងប្រទេសបង់ក្លាដែស គណៈប្រតិភូនៃក្រុមប្រឹក្សាសន្តិសុខអង្គការសហប្រជាជាតិដែលមានមន្រ្តីទូតចំនួន ២៦នាក់មកពី ១៥ប្រទេសបានទៅទស្សនាជំរំដែលពលរដ្ឋរ៉ូហ៊ីងយ៉ាកំពុងរស់នៅ ព្រមទាំងជួបសំណោះសំណាលជាមួយពួកគេជាច្រើននាក់។ បន្ទាប់មក គណៈប្រតិភូក៏បានទទួលជួបដោយលោកស្រីនាយករដ្ឋមន្រ្តីបង់ក្លាដែសឆែក ហាស៊ីណា។ ចំណែកនៅក្នុងប្រទេសភូមា គណៈប្រតិភូចូលជួបសន្ទនាជាមួយលោកស្រីអ៊ុង សានស៊ូជីដែលមានតួនាទីជាទីប្រឹក្សារដ្ឋ និងជារដ្ឋមន្រ្តីក្រសួងការបរទេស បន្ទាប់មក គណៈប្រតិភូត្រូវបានរដ្ឋអំណាចភូមាអនុញ្ញាតឲ្យជិះឧទ្ធម្ភាគចក្រហោះឆ្វែលមើលស្ថានភាពក្នុងរដ្ឋរ៉ាក់ឃីន។
ឯកអគ្គរាជទូតនៃប្រទេសកូវ៉ែតប្រចាំអង្គកាសហប្រជាជាតិដែលស្ថិតក្នុងចំណោមប្រតិភូទាំង ២៦នាក់បានថ្លែងថា បេសកកម្មរបស់ក្រុមប្រឹក្សាសន្តិសុខពេលនេះមិនមែនដើម្បីដាក់ការអៀនខ្មាស់លើភូមាទេ តែដើម្បីបង្ហាញពីឆន្ទៈចូលរួមដោះស្រាយវិបត្តិ ពិសេសជួយរៀបចំការវិលត្រឡប់ចូលភូមាវិញរបស់ពលរដ្ឋរ៉ូហ៊ីងយ៉ា។ អង្គការសហប្រជាជាតិបានយល់ឃើញថាខណៈនេះ លក្ខខណ្ឌនៃការធ្វើមាតុភូមិនិវត្តន៍របស់ពលរដ្ឋរ៉ូហ៊ីងយ៉ាពីបង់ក្លាដែសចូលភូមាវិញនូវមិនទាន់ពេញលេញនៅឡើយទេ។
លោក Kenneth Roth នាយកប្រតិបត្តិនៃអង្គការសិទ្ធិមនុស្ស Human Rights Watch បានយល់ឃើញថា ក្រុមប្រឹក្សាសន្តិសុខត្រូវតែជំរុញរដ្ឋាភិបាលភូមាឲ្យទទួលស្គាល់ពីទង្វើឧក្រិដ្ឋរបស់ទ័ពភូមាលើពលរដ្ឋរ៉ូហ៊ីងយ៉ា តាមលោក Roth ក្រុមប្រឹក្សាសន្តិសុខត្រូវទទួលស្គាល់ថា ពលរដ្ឋរ៉ូហ៊ីងយ៉ានឹងគ្មានអារម្មណ៍ទទួលបានសេចក្តីសុខទេ ដរាបណារដ្ឋាភិបាលភូមាបន្តបដិសេធពីបទឧក្រិដ្ឋរបស់ទ័ពភូមានោះ។ Human Rights Watch បានសម្គាល់ឃើញថាមកទល់ពេលនេះ សកម្មភាពរបស់ក្រុមប្រឹក្សាសន្តិសុខហាក់មិនទាន់គ្រប់គ្រាន់ ព្រោះនៅមិនទាន់សេចក្តីសម្រេចណាមួយសម្រាប់វិបត្តិរ៉ូហ៊ីងយ៉ានៅឡើយទេដោយបារម្ភខ្លាចចិនដែលជាសម្ព័ន្ធមិត្តរបស់ភូមាប្រើសិទ្ធិវ៉េតូប្រឆាំង។
លោក Roth បានចោទជាសំណួរថា បើមានសេចក្តីសម្រេចណាមួយរបស់ក្រុមប្រឹក្សាសន្តិសុខ តើចិនពិតជាប្រើសិទ្ធិវ៉េតូប្រឆាំងមែនឬ អត់?។ តាមលោក Roth គឺកង្វះសេចក្តីសម្រេចរបស់ក្រុមប្រឹក្សាសន្តិសុខនោះឯងដែលបានធ្វើឲ្យរដ្ឋាភិបាលភូមាកាន់តែឡើងចាងហ៊ានប្រព្រឹត្តទង្វើឧក្រិដ្ឋដោយសេរី និងគ្មានទោសពៃអ្វីទាំងអស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ