អាហ្វហ្កានីស្ថានបន្តរងការវាយប្រហារយ៉ាងបង្ហូរឈាមពីតាលីបង់ និងអង្គការរដ្ឋអ៊ីស្លាម
នៅក្នុងប្រទេសអាហ្វហ្កានីស្ថាន មានមនុស្សស្លាប់យ៉ាងតិច ២៥នាក់នាថ្ងៃពុធ ទី១៥សីហានៅក្នុងអំពើភេរវកម្មអត្តឃាតបំផ្ទុះគ្រាប់បែកក្នុងមជ្ឈមណ្ឌលអប់រំមួយស្ថិតក្នុងសង្កាត់និកាយឈីអ៊ីតប៉ែកខាងលិចទីក្រុងកាប៊ូល។ ភេរវកម្មអត្តឃាតថ្មីនេះនៅមិនទាន់មានក្រុម ឬចលនាណាសារភាពជាស្នាដៃរបស់ខ្លួននៅឡើយទេ។ ក្រៅពីពួកជីហាតអង្គការរដ្ឋអ៊ីស្លាម អំពើហិង្សាបង្ហូរឈាមក៏បានបង្កដោយពួកឧទ្ទាមតាលីបង់ដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៦
ភេរវកម្មអត្តឃាតថ្មីនេះត្រូវបានបង្កឡើងដោយភេរវជនអត្តឃាតម្នាក់ដែលបានបណ្តាលឲ្យមានមនុស្សស្លាប់យ៉ាងតិច ២៥នាក់ និងរបួសធ្ងន់ស្រាលយ៉ាងតិច ៣៥នាក់ផ្សេងទៀត នេះបើតាមការបញ្ជាក់រួមគ្នារបស់ក្រសួងមហាផ្ទៃ និងក្រសួងសុខាភិបាល។ អំពើភេរវកម្មថ្មីនេះនៅមិនទាន់មានក្រុម ឬចលនាណាមួយចេញមុខប្រកាសជាស្នាដៃរបស់ខ្លួននៅឡើយទេ តែអង្គការរដ្ឋអ៊ីស្លាមធ្លាប់បានសារភាពនៅក្នុងអំពើភេរវកម្មបង្ហូរឈាមជាច្រើននៅក្នុងទីក្រុងកាប៊ូល និងនៅប៉ែកខាងកើតប្រទេសនារយៈពេលប៉ុន្មានខែកន្លងទៅ។
ក្រៅពីអំពើហិង្សាបង្ហូរឈាមបង្កដោយពួកជីហាតអង្គការរដ្ឋអ៊ីស្លាម អាហ្វហ្កានីស្ថានក៏កំពុងបន្តរងគ្រោះដោយការវាយប្រហារពីពួកឧទ្ទាមតាលីបង់ដែរ។ នៅយប់ថ្ងៃអង្គារឆ្លងចូលថ្ងៃពុធ ទី១៥ សីហា កម្លាំងប្រដាប់អាវុធតាលីបង់បានបើកការវាយប្រហារលើប៉ុស្តិ៍ទាហាន និងនគរបាលក្នុងស្រុក Baghlan ស្ថិតប៉ែកខាងជើងប្រទេសដោយសម្លាប់បាននគរបាល ៩នាក់ និងទាហាន ៣៥នាក់ នេះជាតួលេខផ្តល់ដោយក្រសួងការពារជាតិ តែបើយោងតាមពួកតាលីបង់វិញ គឺមានស្លាប់ ៧០នាក់រួមទាំងរឹបអូសបានរថយន្តពាសដែក និងគ្រាប់រំសេវជាច្រើន។
កាលពីថ្ងៃចន្ទ ទី១៣ សីហា ពួកតាលីបង់បានវាយប្រហារលើមូលដ្ឋានយោធារដ្ឋាភិបាលស្ថិតក្នុងខេត្ត Faryab ស្ថិតប៉ែកខាងជើងប្រទេសដោយបានសម្លាប់ទាហានរដ្ឋាភិបាលប្រមាណជា ១០នាក់។ ដោយឡែកនៅទីក្រុង Ghazni ស្ថិតប៉ែកកណ្តាលប្រទេស ស្ថានការណ៍បានស្ងប់ស្ងាត់នៅថ្ងៃពុធ ទី១៥ សីហា បន្ទាប់ពីមានការប្រយុទ្ធគ្នាយ៉ាងខ្លាំងក្លារវាងពួកតាលីបង់ និងទាហានរដ្ឋាភិបាលអស់រយៈពេល ៥ថ្ងៃ។ ដោយមានជំនួយពីកម្លាំងពិសេស និងទ័ពអាកាសអាមេរិក កម្លាំងរដ្ឋាភិបាលអាហ្វហ្កានីស្ថានបានវាយប្រហាររុញច្រានពួកតាលីបង់ចេញពីទីក្រុង Ghazni។
ការប្រយុទ្ធគ្នានៅ Ghazni បានបណ្តាលឲ្យមានមនុស្សស្លាប់រាប់រយនាក់ និងរបួសជាច្រើននាក់ រួមទាំងបង្កឲ្យមានការបំផ្លាញហេដ្ឋារចនាសម្ព័ន្ធផងដែរ។ បេសកកម្មរបស់អង្គការសហប្រជាជាតិប្រចាំអាហ្វហ្កានីស្ថានបានផ្តល់តួលេខជនស៊ីវិលស្លាប់ចំនួន ១៥០នាក់ និងថា ទីក្រុងមួយនេះអាចនឹងខ្វះទឹកស្អាតប្រើប្រាស់ និងគ្មានភ្លើងអគ្គិសនីជាច្រើនថ្ងៃ។ សូមជម្រាបជូនថា តាំងពីប៉ុន្មានខែមកហើយដែលចលនាឧទ្ទាមតាលីបង់បានរងសម្ពាធឲ្យយល់ព្រមចូលតុចរចាសន្តិភាពជាមួយរដ្ឋាភិបាលក្រុងកាប៊ូល ហើយក្រុមអ្នកវិភាគយល់ឃើញថា ការដែលពួកតាលីបង់បានបង្កើនការវាយប្រហារពេលនេះ គឺដើម្បីចង់មានទឹកមាត់ប្រៃ និងមានប្រៀបនៅពេលមានកិច្ចចរចា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ