អង្គការសហប្រជាជាតិ៖ ការកាត់ផ្តាច់អ៊ីនធ័រនែតធ្វើឡើង ដើម្បីបិទបាំងការរំលោភសិទ្ធិមនុស្សនៅភូមា
អ្នករាយការណ៍ពិសេសរបស់អង្គការសហប្រជាជាតិ ទទួលបន្ទុកសំណុំរឿងសិទ្ធិមនុស្សនៅភូមា នៅថ្ងៃអង្គារទី ២៥ មិថុនា ២០១៩ បានសំដែងក្តីបារម្ភពីការរំលោភសិទ្ធិមនុស្ស នៅក្រោយអាជ្ញាធរភូមា បញ្ជាឲ្យ បិទប្រព័ន្ធអ៊ីនធ័រនែត នៅរដ្ឋរ៉ាឃីន។ សម្រាប់អ្នករាយការណ៍ពិសេសរបស់អង្គការសហប្រជាជាតិ ការកាត់ផ្តាច់បណ្តាញអ៊ីនធ័រនែត នឹងអាចជួយបិទបាំងករណីរំលោភសិទ្ធិមនុស្សធ្ងន់ធ្ងរ នៅរដ្ឋរ៉ាឃីន ជាទី ដែលធ្លាប់កើតមានអំពើហិង្សា រហូតធ្វើឲ្យប្រជាជន ភាគតិច រ៉ូហ៊ីងយ៉ាង រាប់សែននាក់ រត់ភៀសខ្លួន ទៅក្នុងទឹកដី បង់ក្លាដែស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៨
រហូតមកដល់ថ្ងៃអង្គារនេះ អ៊ីនធ័រនែតត្រូវបានកាត់ផ្តាច់ទាំងស្រុង នៅទីក្រុងប្រជុំជនមួយចំនួន ក្នុងរដ្ឋរ៉ាឃីន ហើយនិងរដ្ឋឈីន ប៉ែកខាងលិចប្រទេសភូមា។ កាលពីថ្ងៃសុក្រ ក្រសួងទូរគមនាគមន៍ភូមាបានបញ្ជាឲ្យគ្រប់ក្រុមហ៊ុនទូរស័ព្ទ បិទបណ្តាញអ៊ីនធ័រនែត នៅរដ្ឋរ៉ាឃីន ដោយគ្មានថ្ងៃកំណត់។ អាជ្ញាធរភូមាបានលើកយក បញ្ហាបង្កអសណ្តាប់ធ្នាប់សាធារណៈ ហើយនិងសកម្មភាពខុសច្បាប់ មកធ្វើជាហេតុផលនៃការបិទប្រព័ន្ធអ៊ីនធ័រនែតនៅរ៉ាឃីន។ ប៉ុន្តែ សម្រាប់ អ្នករាយការណ៍ពិសេស របស់អង្គការសហប្រជាជាតិ ទទួលបន្ទុក សិទ្ធិមនុស្សនៅភូមា ការបិទអ៊ីនធ័រនែត នៅរដ្ឋរ៉ាឃីន វិធានការរបស់អាជ្ញាធរភូមា ដើម្បី អាចបិទបាំង ការរំលោភ សិទ្ធិមនុស្សធ្ងន់ធ្ងរ នៅក្នុងតំបន់ ដែលកងទ័ពភូមា ធ្លាប់បើកប្រតិបត្តិការហិង្សា វាយបណ្តេញ ប្រជាជនភាគតិចរ៉ូហ៊ីងយ៉ា។
អ្នករាយការណ៍ពិសេស របស់អង្គការសហប្រជាជាជាតិ លោកស្រី Lee Yanghee និយាយមិនលាក់ទេថា លោកស្រី ខ្លាច បារម្ភពីសុវត្ថិភាពរបស់ប្រជាជនស៊ីវិល ព្រោះថា ប្រតិបត្តិការបោសសម្អាតរបស់អាជ្ញាធរភូមា នឹងអាចផ្ទាំងក្រណាត់ ទៅបិទបាំង អំពើហិង្សា រំលោភបំពានរបស់កងទ័ពភូមា ទៅលើប្រជាជនស៊ីវិល នៅក្នុងរដ្ឋរ៉ាឃីន។
ការបិទប្រព័ន្ធអ៊ីនធ័រនែត ដោយគ្មានកាលកំណត់យ៉ាងដូច្នេះ គឺជារឿងដែលមិនធ្លាប់កើតមានទេ ពីមុនមកនៅភូមា។ ប្រជាជនម្នាក់នៅរដ្ឋរ៉ាឃីន បានសំដែងក្តីបារម្ភ ប្រាប់ ទីភ្នាក់ងារព័ត៌មានបារាំង AFP តាមទូរស័ព្ទ ថា ដោយសារតែគ្មានអ៊ីនធ័រនែត ពួកគេត្រូវបានកាត់ផ្តាច់ទាំងស្រុងពីពិភពខាងក្រៅ។ វាជារឿងគ្រោះថ្នាក់ណាស់ ដែល ប្រជាជន រស់នៅក្នុងតំបន់ជម្លោះ ដ៏គ្រោះថ្នាក់ មិនអាចចែករំលែក ព័ត៌មាន ទៅខាងក្រៅ បាន។
វិធានការបិទអ៊ីនធ័រនែត នៅរដ្ឋរ៉ាឃីន មិនមែនប៉ះពាល់តែទៅលើប្រជាជនរ៉ូហ៊ីងយ៉ាម្នាក់ទេ ប៉ុន្តែ វាប៉ះពាល់ផងដែរ ការងាររដ្ឋបាលរបស់អាជ្ញាធរភូមា នៅថ្នាក់មូលដ្ឋាន។ ប៉ូលិសភូមាម្នាក់ ដែលសុំមិនបញ្ចេញឈ្មោះ បាននិយាយប្រាប់ទីភ្នាក់ងារ AFPថា ការប្រយុទ្ធជាមួយក្រុមឧទ្ទាមរ៉ូហ៊ីងយ៉ា នៅបន្តមាន រៀងរាល់ថ្ងៃ។ ប៉ុន្តែ ដោយសារតែគ្មានអ៊ីនធ័រនែត ប៉ូលិស ត្រូវរាយការណ៍ ទៅថ្នាក់លើ តាមរយៈ សារផ្ញើតាមទូរស័ព្ទ ឬតាមតែទូរសារ តែប៉ុណ្ណោះ។
សូមបញ្ជាក់ថា ការវាយប្រហាររបស់ពួកឧទ្ទាមរ៉ូហ៊ីងយ៉ា ទៅលើកប៉ាល់យោធា ភូមា កាលពីចុងសប្តាហ៍មុននេះ បានសម្លាប់មនុស្ស២នាក់ នៅទីក្រុង Sittwee រដ្ឋរ៉ាឃីន។ នៅចុងខែឧសភា អង្គការការពារសិទ្ធិមនុស្ស Amnesty International បានចោទប្រកាន់កងទ័ពភូមាថា បានប្រព្រឹត្តបទឧក្រិដ្ឋកម្មសង្រ្គាម សម្លាប់មនុស្សក្រៅច្បាប់ ហើយនិងធ្វើទារុណកម្មទៅលើក្រុមឧទ្ទាម នៅក្នុងរដ្ឋរ៉ាឃីន ប៉ែកខាងលិចភូមា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ