អាជ្ញាធរឥណ្ឌាចាប់ឃាត់ខ្លួនអតីតអនុប្រធានាធិបតីម៉ាល់ឌីវ
អាជ្ញាធរឥណ្ឌានៅថ្ងៃព្រហស្បតិ៍ម្សិលមិញ បានចាប់ឃាត់ខ្លួន អតីតអនុប្រធានាធិបតីប្រទេសកោះ ម៉ាល់ឌីវ ក្នុងបទឆ្លងដែនចូលខុសច្បាប់ក្នុងប្រទេសឥណ្ឌា។ តាមប៉ូលិសឥណ្ឌា អតីតអនុប្រធានាធិបតីម៉ាល់ឌីវ លោក អាម៉េដ អាដិប គ្មានលិខិតឆ្លងដែនជាប់ខ្លួន និងបានបន្លំខ្លួន ជាសមាជិករបស់ទូកសណ្តោង សំដៅកំពង់ផែ ឥណ្ឌា។
ចុះផ្សាយនៅថ្ងៃ៖
តាមអ្នកនាំពាក្យរបស់ក្រសួងការបរទេសឥណ្ឌា អតីតអនុប្រធានាធិបតីម៉ាល់ឌីវ បានធ្វើដំណើរចូលប្រទេសឥណ្ឌា ដោយខុសច្បាប់ តាមរយៈកប៉ាល់អូសទូកមួយ កាលពីថ្ងៃព្រហស្បតិ៍។ មន្រ្តីប៉ូលិសឥណ្ឌាវិញ បាននិយាយប្រាប់អ្នកកាសែតក្នុងស្រុក ថា នៅពេលឃាត់ខ្លួន នៅលើទូកសណ្តោង ជាទីដែលលោកបន្លំខ្លួនជាអ្នកធ្វើការលើទូក អតីតអនុប្រធានាធិបតី ម៉ាល់ឌីវ គ្មានកាន់លិខិតឆ្លងដែនជាប់ខ្លួននោះទេ។
លិខិតឆ្លងដែនរបស់លោក អាម៉េដ អាដិប ត្រូវបានរដ្ឋាភិបាលម៉ាល់ឌីវ រឹបអូស ទុក នៅក្នុងពេលដែលអតីតអនុប្រធានាធិបតីរូបនេះ កំពុងប្រឈមនឹងបទចោទប្រកាន់តាមផ្លូវតុលាការ នៅកោះម៉ាល់ឌីវ។
លោកអាម៉េដ អាដិបធ្លាប់ត្រូវបានតុលាការម៉ាល់ឌីវ កាត់ទោសឲ្យជាប់ពន្ធានគារ ១៥ឆ្នាំ ក្នុងបទប៉ុនប៉ងសម្លាប់អតីតប្រធានាធិបតីម៉ាល់ឌីវ ដែលលោកធ្វើការជាមួយ កាលពី ឆ្នាំ ២០១៥។ ប៉ុន្តែ នលោកត្រូវបានដោះលែងឲ្យមានសេរីភាពមកវិញ នៅខែឧសភា ឆ្នាំនេះ នៅក្រោយ តុលាការឧទ្ធរណ៍បដិសេធ ទាត់ចោល ការសម្រេចផ្តន្ទាទោសរបស់តុលាការដំបូង។
នៅក្នុងសេចក្តីថ្លែងការណ៍ កាលពីថ្ងៃព្រហស្បតិ៍ ប៉ូលិសម៉ាល់ឌីវអះអាងថា គេបានដាក់ពាក្យស្នើសុំឲ្យ ប្រទេសជិតខាង ចាប់បញ្ជូន លោកអាម៉េដ អាដិប ព្រោះថា នៅក្នុងប្រទេស លោកអាដិប កំពុងប្រឈមនឹងការចោទប្រកាន់ផ្សេងទៀត ដូចជាសំណុំរឿងពុករលួយ លួចកេងលុយរដ្ឋ ហើយនិងរឿងអាស្រូវលាងលុយ នៅក្នុងជំនាន់លោកធ្វើជាអនុប្រធានាធិបតី ម៉ាល់ឌីវ ពីឆ្នាំ ២០១៣ ដល់ឆ្នាំ ២០១៨។
រឿងអាស្រូវពុករលួយ ដែលធ្វើអតីតប្រធានាធិបតី អាប់ឌូឡា យ៉ាមេន បរាជ័យឆ្នោត មិនអាចបន្ត តំណែងមួយអាណត្តិទៀត។ តាមប៉ូលិស ម៉ាល់ឌីវ នៅមុនដំណឹងចាប់ខ្លួន លោកអតីតអនុប្រធានាធិបតី ម៉ាល់ឌីវ ត្រូវបង្ហាញខ្លួន នៅក្នុងសំណុំរឿងបទចោទប្រកាន់ថ្មី ប៉ុន្តែ លោកបានអាក់ខាន និងបែរជាត្រូវបានប៉ូលិសចាប់ឃាត់ខ្លួន នៅក្នុងទូកសណ្តោង សំដៅប្រទេសឥណ្ឌាទៅវិញ។
តាមមន្ត្រីឥណ្ឌាដែលសុំមិនបញ្ចេញឈ្មោះ គេនឹងអាចបញ្ជូនភ្លាម លោកអាដិប ទៅម៉ាល់ឌីវវិញ ឬត្រូវពិភាក្សាជាមុន ជាមួយរដ្ឋាភិបាលម៉ាល់ឌីវ។ ការឆ្លងដែន របស់អតីតអនុប្រធានាធិបតីម៉ាល់ឌីវ ទៅក្នុងទឹកដីឥណ្ឌាដោយគ្មានលិខិតឆ្លងដែន អាចជាសំណុំរឿងមួយដែលគេព្រួយបារម្ភ ជាពិសេសនៅពេលលោកត្រូវចាប់បញ្ជូនទៅកោះម៉ាល់ឌីវវិញ ជាទីដែលកំពុងប្រឈមនឹងបទចោទប្រកាន់ ពីការប្រព្រឹត្តបទល្មើសធ្ងន់ធ្ងរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ