ហ្វេសប៊ុកកែតម្រូវការបង្ហោះផ្សាយរបស់អ្នកប្រើប្រាស់ ទៅតាមការទាមទាររបស់រដ្ឋាភិបាលសិង្ហបុរី
ក្រុមហ៊ុនហ្វេសប៊ុក នៅថ្ងៃសៅរ៍នេះ បានចុះផ្សាយសេចក្តីកែតម្រូវ នៅលើទំព័រផ្សាយរបស់អ្នកប្រើប្រាស់ហ្វេសប៊ុក ម្នាក់ ទៅតាមការទាមទាររបស់អាជ្ញាធរសិង្ហបុរី។ កាលពីថ្ងៃសុក្រ អាជ្ញាធរសិង្ហបុរីបានចេញបញ្ជាឲ្យក្រុមហ៊ុនហ្វេសប៊ុក កែតម្រូវ អត្ថបទចុះផ្សាយរបស់អ្នកប្រើប្រាស់ម្នាក់ ដែលអាជ្ញាធរវាយតម្លៃថា មានសរសេរព័ត៌មានមិនពិតទាក់ទងនឹងការបោះឆ្នោត នៅសិង្ហបុរី។ នេះជាលើកទី១ ដែលក្រុមហ៊ុនអាមេរិកាំង ហ្វេសប៊ុក គោរពអនុវត្តធ្វើតាមច្បាប់ប្រឆាំងព័ត៌មានមិនពិត ដែលសភាសិង្ហបុរីទើបបានបោះឆ្នោត អនុម័ត កាលពីពាក់កណ្តាលឆ្នាំនេះ។
ចុះផ្សាយនៅថ្ងៃ៖
ស្តាប់ - ០២:៤៧
អាជ្ញាធរសិង្ហបុរី ចាប់អនុវត្តច្បាប់ដ៏ចម្រូងចម្រាស កាលពីថ្ងៃសុក្រ ដោយបានបញ្ជាឲ្យក្រុមហ៊ុនហ្វេសប៊ុក កែតម្រូវអត្ថបទរបស់វិបសៃតិ៍មួយ ដែលមាននិន្នាការប្រឆាំងរដ្ឋាភិបាល។ តាមស្ថាប័នត្រួតពិនិត្យ ខ្លឹមសារ នៅលើបណ្តាញអ៊ីនធ័រនែត របស់រដ្ឋាភិបាលសិង្ហបុរី អត្ថបទដែលវិបសៃតិ៍ States Times Review បង្ហោះផ្សាយនៅលើបណ្តាញសង្គមហ្វេសប៊ុក កាលពីសប្តាហ៍មុន មានព័ត៌មានមួលបង្កាច់ ចោទប្រកាន់ដោយគ្មានមូលដ្ឋាន ទៅលើរដ្ឋាភិបាលសិង្ហបុរី។
វិបសៃតិ៍ ប្រឆាំងរដ្ឋាភិបាលសិង្ហបុរី States Times Review ជាកម្មសិទ្ធិរបស់លោកAlex Tan (រស់នៅប្រទេសអូស្ត្រាលី) ដែលបានបដិសេធ កាលពីថ្ងៃព្រហស្បតិ៍ មិនព្រមកែតម្រូវអត្ថបទចុះផ្សាយរបស់ខ្លួន នៅក្នុងហេតុផលថា លោកមិនមែន ជាជនជាតិសិង្ហបុរី ដូច្នេះ មិនត្រូវគោរពតាមច្បាប់សិង្ហបុរីនោះទេ។ នៅក្នុងអត្ថបទចុះផ្សាយ របស់ខ្លួនកាលពីថ្ងៃទី ២៣វិច្ឆិកា វិបសៃតិ៍របស់លោកAlex Tan បានសរសេរថា ការបោះឆ្នោតត្រូវរៀបចំឡើងដើម្បីធានាឲ្យគណបក្សកាន់អំណាច នៅបន្តកាន់អំណាចតទៅទៀតនៅសិង្ហបុរី។
សម្រាប់វិបសៃតិ៍ របស់រដ្ឋាភិបាល ដើម្បី តាមដានព័ត៌មានក្លែងក្លាយ អត្ថបទរបស់លោកAlex Tan គឺជាការចុះផ្សាយព័ត៌មានមិនពិត និងចោទប្រកាន់ ដោយគ្មានភស្តុតាង។
ពិត ឬមិនពិត គឺអាស្រ័យទៅលើការសម្រេច វិនិច្ឆ័យរបស់មន្រ្តីរដ្ឋាភិបាលសិង្ហបុរី ដែលមានអំណាចទៅតាមច្បាប់ ដើម្បី ទាមទារឲ្យក្រុមហ៊ុនបច្ចេកវិទ្យា អ៊ីនធ័រនែត កែតម្រូវខ្លឹមសារ អត្ថបទ នៅលើបណ្តាញសង្គម ឬនៅលើអ៊ីនធ័រនែត។ ទៅតាមច្បាប់ថ្មីរបស់សិង្ហបុរី សរសេររិះគន់ រដ្ឋាភិបាលនៅក្នុងប្លុក ឬបញ្ចេញមតិ នៅលើបណ្តាញ សង្គម ដែលអាជ្ញាធរមិនចូលចិត្ត នោះ គេនឹងអាចប្រឈមនឹងការបង់ប្រាក់ពិន័យ ៧សែនដុល្លារ ឬជាប់ពន្ធនាគារ ដល់ទៅ ៧ឆ្នាំ។
ក្រុមហ៊ុនហ្វេសប៊ុក ដែលធ្លាប់សំដែងកង្វល់ពីការរឹតត្បិតសិទ្ធិសេរីភាព បញ្ចេញមតិ ដោយសារច្បាប់ប្រឆាំងព័ត៌មានក្លែងក្លាយរបស់រដ្ឋាភិបាលសិង្ហបុរី នៅបំផុត បានយល់ព្រមធ្វើតាមការទាមទាររបស់អាជ្ញាធរសិង្ហបុរី។
ក្រុមហ៊ុនហ្វេសប៊ុក នៅថ្ងៃសៅរ៍ បានបង្ហោះផ្សាយ អត្ថបទ កែតម្រូវ របស់រដ្ឋាភិបាល សិង្ហបុរី នៅក្បែរអត្ថបទចុះផ្សាយរបស់វិបសៃតិ៍ របស់លោកAlex tan។ នៅក្នុងសេចក្តីសង្ខេបដែលស្រង់បានដោយទីភ្នាក់ងារព័ត៌មានបារាំង AFP ហ្វេសប៊ុកសរសេរថា ទៅតាមច្បាប់តម្រូវ ហ្វេសប៊ុក ជូនដំណឹងថា រដ្ឋាភិបាលសិង្ហបុរី វាយតម្លៃថា ខ្លឹមសាររបស់អត្ថបទបង្ហោះផ្សាយ មានព័ត៌មានមិនពិត។
ចាប់តាំងពីថ្ងៃចន្ទ ដែលរដ្ឋាភិបាល ចាប់អនុវត្តច្បាប់ប្រឆាំងព័ត៌មានក្លែងក្លាយ ហ្វេសប៊ុកជាក្រុមហ៊ុនបច្ចេកវិទ្យាបរទេសដំបូងគេដែលគោរពអនុវត្ត តាមច្បាប់របស់រដ្ឋាភិបាលសិង្ហបុរី។ ក្រុមហ៊ុនហ្វេសប៊ុកដែលជាអ្នកវិនិយោគធំជាងគេនៅសិង្ហបុរី ធ្លាប់បានប្រកាសកាលពីឆ្នាំមុន ពីផែនការកសាង មជ្ឈមណ្ឌលទិន្នន័យរបស់ខ្លួន តម្លៃ ១ពាន់លានដុល្លារ និងមានទីស្នាក់ការប្រចាំអាស៊ីរបស់ខ្លួន នៅទឹកដីសិង្ហបុរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ