អូស្រា្តលីកំពុងបន្តប្រឈមនឹងភ្លើងឆេះព្រៃដែលមានឥទ្ធិពល និងរីករាលដាលកាន់តែធំ
ប៉ែកខាងកើតប្រទេសអូស្រ្តាលីកំពុងបន្តប្រឈមមុខកាន់តែខ្លាំងនឹងភ្លើងឆេះព្រៃដែលបានចាប់ផ្តើមតាំងពីខែកញ្ញា។ តែសន្ទុះអណ្តាតភ្លើងមានកាន់តែខ្លាំងដែលរដ្ឋអំណាចមិនអាចទប់ស្កាត់បាន ទោះក្នុងរយៈពេលប៉ុន្មានថ្ងៃចុងក្រោយនេះ មានក្រុមជំនួយពន្លត់អគ្គីភ័យមកពីអាមេរិក និងកាណាដាក៏ដោយ។ គិតមកទល់ពេលនេះ មានផ្ទះជាង ៧០០ខ្នងត្រូវបានបំផ្លាញ មានមនុស្សស្លាប់ចំនួន ៦នាក់ និងព្រៃចំនួន ២លានហិចតាត្រូវបានឆេះខ្ទេច ពោលស្មើពាក់កណ្តាលនៃផ្ទៃក្រឡាដីប្រទេសស្វីស។ បន្ទាប់ពីទីក្រុងស៊ីដនី អ័ភ្រពុលដែលកើតចេញពីផ្សែងភ្លើងបានចូលគ្របទីក្រុងកង់បេរ៉ានាថ្ងៃអាទិត្យ ទី៨ ធ្នូ។ អ្វីដែលក្រុមអ្នកពន្លត់អគ្គីភ័យកំពុងបារម្ភខ្លាំង គឺស្ថានភាពបរិយាកាសមិនអនុគ្រោះនៅប៉ុន្មានសប្តាហ៍ខាងមុខជាមួយនឹងកំណើនសីតុណ្ហភាពខ្ពស់។ លោកស្ហេន ហ្វីតស៊ីមម៉ុន (Shane Fitzsimmons) ស្នងការសេវាអគ្គីភ័យក្នុងរដ្ឋ New South Wales បានរៀបរាប់ពីស្ថានការណ៍ទូទៅ។
ចុះផ្សាយនៅថ្ងៃ៖
ស្តាប់ - ០១:៣៤
« យើងបានចេញការហាមមិនឲ្យមានការប្រើភ្លើងនៅក្នុងតំបន់ចំនួន ៧ ក្នុងនោះមានតំបន់ជុំវិញទីក្រុងស៊ីដនី នៅតាមជ្រលងភ្នំហាន់ធ័រ (Hunter) និងនៅក្បែរព្រំដែនរដ្ឋ Queensland។ យើងរាប់ទៅឃើញមានកន្លែងឆេះចំនួន ៩០កន្លែងជានិច្ច ហើយមានចំនួនពាក់កណ្តាលនៅមិនទាន់បានពន្លត់ទេ។ មានកន្លែងឆាបឆេះចំនួន ១១កន្លែងកំពុងស្ថិតក្នុងកម្រិតអាសន្នខ្ពស់ ព្រោះអណ្តាតភ្លើងកំពុងធ្វើដំណើរឆ្ពោះទៅប៉ែកខាងជើងទីក្រុងស៊ីដនី និងឆ្លងរាលដាលចូលតំបន់ឆ្នេរកណ្តាល។
យើងមានកន្លែងឆេះមួយទៀតនៅប៉ែកភាគនិរតីក្រុងស៊ីដនី និងមានប្រភពភ្លើងថ្មីបានលេចឡើងកាលពីយប់ថ្ងៃសៅរ៍ ទី៧ ធ្នូនៅខូស្វ ហាបឺ (Coffs Harbour) ស្ថិតប៉ែកខាងជើងក្រុងស៊ីដនី។ មានកន្លែងឆាបឆេះជាច្រើនកំពុងកើនឥទ្ធិពលកាន់តែខ្លាំង ហើយវានឹងមានកាន់តែខ្លាំងថែមទៀត។ ថ្ងៃអង្គារ ទី១០ ធ្នូសប្តាហ៍ក្រោយ យើងកំពុងរងចាំសីតុណ្ហភាពឡើងខ្ពស់ក្នុងចន្លោះពី ៣០ ទៅ ៤០អង្សារ។ នេះជាបញ្ហាប្រឈមថ្មីមួយទៀត។ សម្រាប់អ្នកដែលចង់ធ្វើដំណើរក្នុងពិធីបុណ្យចុងឆ្នាំ ខ្ញុំស្នើដល់ពួកគេឲ្យមានការប្រុងប្រយ័ត្ន។
ផ្លូវសំខាន់ៗជាច្រើនត្រូវបានបិទមិនឲ្យធ្វើចរាចរណ៍ និងមានមួយចំនួនទៀតនឹងត្រូវបិទនៅប៉ុន្មានសប្តាហ៍ខាងមុខ។ គ្រោះថ្នាក់គឺពិត ហើយគេត្រូវដឹងពីរបៀបគេចយ៉ាងឆាប់រហ័ស បើមានការគំរាមកំហែងដោយភ្លើង ទោះបីជាគេស្ថិតឆ្ងាយពីតំបន់ពាក់ព័ន្ធនៅក្នុងប៉ុន្មានសប្តាហ៍ខាងមុខក៏ដោយ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ