ជាប់គុក ២៥ឆ្នាំដោយសារសរសេរសារ ៥ ទាក់ទងនឹងព្រះមហាក្សត្រថៃនៅក្នុងហ្វេសប៊ុក
នៅប្រទេសថៃ បុរសវ័យ ៥៨ឆ្នាំម្នាក់ ត្រូវបានតុលាការយោធា នៅថ្ងៃពុធនេះ កាត់ទោស ឲ្យជាប់គុក ២៥ឆ្នាំ ពីបទបានចុះផ្សាយ សារ ជេរប្រមាថព្រះមហាក្សត្រថៃ នៅក្នុងបណ្តាញសង្គមហ្វេសប៊ុក។ អង្គការការពារសិទ្ធិមនុស្សបានប្រតិកម្មរិះគន់ ដោយចាត់ទុក ការសម្រេចរបស់ចៅក្រមថា មិនយុត្តិធម៌ និងធ្ងន់ធ្ងរ មានន័យ ស្មើនឹងការដាក់គុកអស់មួយជីវិត បើមើលទៅលើអាយុរបស់ជនជាប់ចោទ។
ចុះផ្សាយនៅថ្ងៃ៖
ស្តាប់ - ០២:២៣
នៅក្នុងសវនាការបិទទ្វារ ជិត មិនឲ្យសាធារណជនចូលស្តាប់ តុលាការយោធាថៃ បានសម្រេចកាត់ទោស អ្នកជំនួញថៃម្នាក់ ឲ្យជាប់គុក ២៥ឆ្នាំ។ ដំបូងឡើយ ចៅក្រមបានប្រកាសដាក់ពិន័យ ទោសជាប់គុក ១០ឆ្នាំ សម្រាប់សារនីមួយៗដែលជនជាប់ចោទ បានសរសេរនៅក្នុងទំព័រសង្គមហ្វេសប៊ុករបស់ខ្លួន។ សារចំនួន ៥ត្រូវបានចៅក្រមចាត់ទុកថា មានខ្លឹមសារនិយាយដៀមដាម ដែលមានន័យស្មើជេរប្រមាថព្រះមហាក្សត្រថៃ។ ប៉ុន្តែ ដោយជនជាប់ចោទបានសារភាពកំហុស ទទួលស្គាល់ទង្វើរបស់ខ្លួន ចៅក្រមតុលាការយោធា បានកាត់បន្ថយ ទោសពី៥០ មកនៅត្រឹម២៥ ឆ្នាំ វិញ។ ដោយសារ សាលក្រមធ្វើឡើង ដោយតុលាការយោធាថៃ បុរសអភ័ព្វ មិនអាចប្តឹងទៅឧទ្ធរណ៍ បានទេ។
ចំនួនឆ្នាំជាប់ពន្ធនាគារត្រូវបានកាត់បន្ថយមកនៅពាក់កណ្តាលមែន ប៉ុន្តែ មេធាវី កាពារចុងចោទ និងអង្គការការពារសិទ្ធិមនុស្សនៅប្រទេសថៃ នៅតែចាត់ទុកថា វាមានលក្ខណៈធ្ងន់ធ្ងរ ជ្រុលហួសហេតុ បើប្រៀបធៀបនឹងអ្វីដែលជនជាប់ចោទ បានប្រព្រឹត្ត។
សម្រាប់អង្គការការពារសិទ្ធិមនុស្សAmnesty Internationale តាមរយៈការផ្តន្ទាទោស មិនសមហេតុផលយ៉ាងដូច្នេះ គេឃើញថា អាជ្ញាធរថៃកំពុងដំឡើង សាច់ដុំ គំរាមដាក់រាល់អ្នកដែលមិនយល់ស្របនឹងខ្លួន។
ចំនួនមនុស្សត្រូវផ្តន្ទាទោស ដោយសារការជេរប្រមាថព្រះមហាក្សត្រថៃ បានកើនឡើង ខ្លាំង ចាប់តាំងពីយោធា ធ្វើរដ្ឋប្រហារ ចូលកាន់កាប់អំណាច ជំនួស រដ្ឋាភិបាលស៊ីវិល។ ជាមធ្យម មនុស្ស ៤០០នាក់ ត្រូវបានផ្តន្ទាទោសឲ្យជាប់គុក ចាប់ពី ៣ ទៅ ១៥ឆ្នាំ ដោយសារបទចោទប្រកាន់ជេរប្រមាថព្រះមហាក្សត្រ។
មួយរយៈចុងក្រោយនេះ អ្នកលេងអ៊ីនធ័រនែតថៃ ជាច្រើននាក់ ត្រូវបានចាប់ដាក់គុកបន្ទាប់ពីបានបានសរសេរពាក្យពេជន៍ ដែលយោធាចាត់ទុកថា បានប៉ះពាល់ដល់កេរ្តិ៍ឈ្មោះរបស់សាច់ញាតិរាជវង្ស ឬព្រះរាជបល្ល័ង្ក។ សមាគមជាច្រើន ត្រូវបានបង្កើតឡើង ដោយយោធាចូលនិវត្តន៍ថៃ ដើម្បីតាមដានប្រមាញ់រកអ្នកលេងអ៊ីនធ័រនែតណា ដែលហ៊ានសរសេរពាក្យមិនសមរម្យទាក់ទងនឹងព្រះរាជវាំង។ សមាគមទាំងនោះដែលដាក់ឈ្មោះថា “តាមប្រមូលសំរាម” បានបង្កើតទំព័រសង្គម ហ្វេសប៊ុក និងបានទទួលដំណឹងជាច្រើន ពីអ្នកលេងអ៊ីនធ័រនែតដទៃទៀត ដែលបានបរិហារជាបន្តបន្ទាប់ អ្នកដែលសរសេរសារប៉ះពាល់ស្តេចថៃ។
សាលក្រមផ្តន្ទាទោស អ្នកសរសេរហ្វេសប៊ុក ធ្វើឡើង នៅមួយថ្ងៃក្រោយប្រមុខដឹកនាំយោធាថៃ លោកប្រាយុទ្ធ ចាន់អូចា ប្រកាសគម្រោងប្រើក្រឹត្យ លេខ ៤៤ ដើម្បី ជំនួស ច្បាប់អាជ្ញាសឹក ដែលរបបសឹក បានស្នើ ទៅព្រះចៅភូមិបុល ដើម្បីដកលើកចេញពីផ្ទៃប្រទេស។ តាមក្រុមអ្នកការពារសិទ្ធិមនុស្ស ក្រឹត្យលេខ ៤៤នៃរដ្ឋធម្មនុញ្ញថ្មី នឹងផ្តល់អំណាចពេញទី ដល់លោកប្រាយុទ្ធ ចាន់អូចា និងក្រុមទាហាន ដើម្បីចាប់ក្រុមអ្នកប្រឆាំង នឹងខ្លួន ដោយមិនចាំបាច់ ឆ្លងកាត់សភា ឬរង់ចាំសាលដីការបស់តុលាការ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ