ចិន៖ក្រុងប៉េកាំងប្រកាសអាសន្នពីកម្រិតផ្សែងពុលខ្ពស់នៅក្នុងបរិយាកាស
នៅថ្ងៃចន្ទ ទី៧ ធ្នូ រដ្ឋាភិបាលចិនបានប្រកាសឲ្យដឹងពីអត្រាផ្សែងពុលមានកម្រិតខ្ពស់ក្នុងបរិយាកាសនៅក្នុងទីក្រុងប៉េកាំង។ នេះជាលើកទី១ដែលចិនបានប្រកាសសារភាពជាផ្លូវការពីគុណភាពខ្យល់ក្នុងបរិយាកាសដ៏អាក្រក់ពោរពេញដោយជាតិពុល។ ដើម្បីកាត់បន្ថយអត្រាផ្សែងពុលនៅក្នុងបរិយាកាស ចៅហ្វាយក្រុងប៉េកាំងបានផ្តើមចាត់វិធានការពិសេសមួយចំនួនចាប់ពីថ្ងៃអង្គារ ទី៨ ធ្នូសម្រាប់អ្នករស់នៅក្នុងទីក្រុងប៉េកាំង។
ចុះផ្សាយនៅថ្ងៃ៖
ស្តាប់ - ០១:៥៥
វិធានការពិសេសដើម្បីទប់ស្កាត់កំណើនអត្រាផ្សែងពុលនៅក្នុងបរិយាកាសត្រូវធ្វើឡើងសម្រាប់តែពលរដ្ឋចិនរស់នៅក្នុងទីក្រុងប៉េកាំងប្រមាណជា ២០លាននាក់ប៉ុណ្ណោះ នេះបើតាមការប្រកាសឲ្យដឹងរបស់ការិយាល័យគាំពារបរិស្ថានក្នុងក្រុងប៉េកាំង។ គឺជាវិធានការដែលត្រូវអនុវត្តន៍រយៈពេល ៣ថ្ងៃដោយចាប់ផ្តើមពីថ្ងៃអង្គារ ទី៨ ធ្នូនេះដល់ថ្ងៃព្រហស្បតិ៍ ទី១០ ធ្នូ។ វិធានការពិសេសទំាងនោះរួមមាន ចរាចរណ៍រថយន្តក្នុងទីក្រុងប៉េកាំងនឹងត្រូវឆ្លាស់គ្នារវាងលេខគូ និងលេខសេស មានទាំងរថយន្តឯកជន និងរថយន្តរដ្ឋ គឺលើកលែងតែរថយន្តដើរដោយអាគុយផង និងសាំងផង ឬដើរដោយតែអាគុយមួយមុខចេញ។
ជាការបំពេញបន្ថែមនឹងការកាត់បន្ថយចរាចរណ៍រថយន្តក្នុងទីក្រុង ក្រុមហ៊ុនដឹកជញ្ជូនរដ្ឋបានបន្ថែមរថយន្តក្រុងចំនួន ២០០គ្រឿងដើម្បីជួយដឹកជញ្ជូនអ្នកដំណើរក្នុងទីក្រុង។ ក្នុងរយៈពេល ៣ថ្ងៃ រោងចក្រដែលបញ្ចេញផ្សែងពុលខ្លាំង និងការដ្ឋានសំណង់ផ្សេងៗត្រូវបិទទ្វារ ហើយឡានដឹកជញ្ជូនគ្រឿងសំណង់ និងកម្ទេចថ្មក៏នឹងត្រូវហាមឃាត់មិនឲ្យធ្វើចរាចរណ៍ចូលទីក្រុងដែរ។ ក្នុងរយៈពេល ៣ថ្ងៃ រដ្ឋអំណាចក៏បានស្នើឲ្យមានការបិទទ្វារសាលាមតេយ្យ សាលាបឋមសិក្សា និងអនុវិទ្យាល័យ តែនេះមិនមែនជាសំណើចាំបាច់ដែលនាយកសាលាត្រូវតែធ្វើតាមទេ។
គួរជម្រាបជូនថានារយៈពេលចុងក្រោយនេះ កម្រិតអត្រាផ្សែងពុលក្នុងបរិយាកាសនៅក្នុងទីក្រុងធំៗរបស់ចិនមួយបានក្លាយជាក្តីបារម្ភ និងភាពមិនសប្បាយចិត្តរបស់ពលរដ្ឋចិនទូទៅ ពិសេសព្រួយបារម្ភពីការប៉ះពាល់សុខភាព។ អ្វីជាការកត់សម្គាល់ ការប្រកាសអាសន្នផ្សែងពុលក្នុងក្រុងប៉េកាំងរបស់រដ្ឋអំណាចចិនបានធ្វើឡើង ចំពេលដែលសន្និសីទអន្តរជាតិស្តីពីអាកាសធាតុកំពុងបន្តធ្វើក្នុងប្រទេសបារាំង។ កាលពីសប្តាហ៍កន្លងទៅ និងក្នុងនាមជាប្រទេសបំពុលបរិយាកាសច្រើនជាងគេ ចិនបានប្រកាសឲ្យដឹងពីឆន្ទៈក្នុងការកាត់បន្ថយការចាក់ចោលឧស្ម័នពុលក្នុងបរិយាកាសឲ្យបាន ៦០% ចាប់ពីពេលនេះដល់ឆ្នាំ ២០២០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ