អ៊ុង សានស៊ូជី និមិត្តរូបនៃសិទ្ធិសេរីភាព និងលទ្ធិប្រជាធិបតេយ្យរបស់ប្រជាជនភូមា
ចុះផ្សាយនៅថ្ងៃ៖
ស្តាប់ - ០៦:១៤
នៅក្នុងប្រទេសភូមា លទ្ធផលនៃការបោះឆ្នោតសភាជាប្រវត្តិសាស្រ្តកាលពីថ្ងៃអាទិត្យ ទី៨ វិច្ឆិកានៅមិនទាន់បានប្រកាសជាផ្លូវការទេ។ តែលទ្ធផលដែលទទួលបានពីការរាប់សន្លឹកឆ្នោតបណ្តើរៗបានបង្ហាញឲ្យឃើញពីជោគជ័យរបស់គណបក្សប្រឆំាង គឺគណបក្សសម្ព័ន្ធជាតិដើម្បីលទ្ធិប្រជាធិបតេយ្យរបស់លោកស្រីអ៊ុង សានស៊ូជី។ ចំណែកគណបក្សកាន់អំណាចក៏ហាក់បានសារភាពពេញមាត់ពីបរាជ័យរបស់ខ្លួន។ ទន្ទឹមគ្នានេះ សហគមន៍អន្តរជាតិហាក់បានបញ្ចេញប្រតិកម្មយ៉ាងប្រយ័ត្នប្រយែងដោយពួកគេបានរង់ចាំការប្រកាសលទ្ធផលជាផ្លូវការ។ តើលោកស្រីអ៊ុង សានស៊ូជីមានប្រវត្តិរូបសង្ខេបយ៉ាងដូចម្តេចខ្លះ?
ចាប់កំណើតក្នុងថ្ងៃទី១៩ មិថុនា ឆ្នំា ១៩៤៥ ក្នុងទីក្រុងរ៉ង់ហ្គូន លោកស្រីអ៊ុង សានស៊ូជីជាកូនទី៣ របស់លោកអ៊ុង សាន និងអ្នកស្រីដា ឃិន ជី។ អ្នកស្រីដា ឃិន ជី មានអាជីពជាគីលានុបដ្ឋាយិកា ចំណែកលោកអ៊ុង សានជាមេបញ្ជាការកងទ័ពរំដោះប្រទេសដែលទទួលបានងារជាវីរបុរសឯករាជ្យជាតិ។ តែតំាងពីមិនទាន់ដឹងក្តីស្រួលបួល លោកស្រីអ៊ុង សានស៊ូជីបានជួបប្រទះនឹងរឿងអភ័ព្វជាបន្តបន្ទាប់នៅក្នុងគ្រួសារ។ អ្វីៗបានចាប់ផ្តើមពីឱពុករបស់លោកស្រី គឺលោកអ៊ុង សាន។ បន្ទាប់ពីបានក្លាយជានាយករដ្ឋមន្រ្តីដឹកនំារដ្ឋាភិបាលអន្តរកាល ឧត្តមសេនីយអ៊ុង សានត្រូវបានគេធ្វើឃាតក្នុងខែកក្កដា ឆ្នំា ១៩៤៧ ពោល ១ឆ្នំាមុនភូមាទទួលបានឯករាជ្យជាផ្លូវការក្នុងឆ្នំា ១៩៤៦។ ៦ឆ្នំាក្រោយការស្លាប់របស់ឱពុក ប្អូនប្រុសពៅរបស់លោកស្រីអ៊ុង សានស៊ូជី គឺលោកអ៊ុង សានលីនក៏បានលង់ទឹកស្លាប់។
ក្នុងឆ្នំា ១៩៦០ ម្តាយរបស់លោកស្រីអ៊ុង សានស៊ូជី គឺអ្នកស្រីដា ឃិន ជីក៏បានក្លាយជាឥស្សរជនសាធារណៈម្នាក់ដោយទទួលបានតួនាទីជាឯកអគ្គរដ្ឋទូតភូមាប្រចំាប្រទេសឥណ្ឌា។ ក្នុងពេលនោះ លោកស្រីអ៊ុងសានស៊ូជីក៏បានទៅសិក្សារៀនសូត្រនៅឥណ្ឌារហូតដល់ឆ្នំា ១៩៦៤។ មានអាយុ ២០ឆ្នំា លោកស្រីអ៊ុង សានស៊ូជីបានភៀសខ្លួនទៅប្រទេសអង់គ្លេសដោយបានបន្តការសិក្សាផ្នែកទស្សនៈវិជ្ជា នយោបាយ និងសេដ្ឋកិច្ចក្នុងសាកលវិទ្យាល័យ Oxford។ ក្នុងពេលសិក្សានៅសាកលវិទ្យាល័យ Oxford លោកស្រីអ៊ុង សានស៊ូជីបានជួបលោកមីកាអែល អារីសដែលលោកស្រីបានរៀបការជាមួយក្នុងខែមករា ឆ្នំា ១៩៧២។ ជាមួយលោកមីកាអែល អារីស លោកស្រីអ៊ុង សានស៊ូជីសម្រាលបានកូនប្រុសពីរ គឺអាឡិចសង់ដ័រកើតក្នុងឆ្នំា ១៩៧៣ និងគីមកើតក្នុងឆ្នំា ១៩៧៧។
តែជីវិតរបស់លោកស្រីអ៊ុង សានស៊ូជីបានផ្តើមក្រឡាប់ចាក់ក្នុងឆ្នំា ១៩៨៨ បន្ទាប់ពីលោកស្រីបានទទួលដំណឹងថា ម្តាយមានជម្ងឺធ្ងន់សម្រាកព្យាបាលក្នុងមន្ទីរពេទ្យ។ នៅពេលនោះ លោកស្រីអ៊ុង សានស៊ូជីក៏សម្រេចចិត្តត្រឡប់ទៅភូមាមើលម្តាយ ហើយក៏លែងចាកចេញពីស្រុកកំណើតតំាងពីពេលនោះមក។ ៩ខែក្រោយមក ម្តាយក៏បានចែកឋានបាត់ទៀត។ បន្ទាប់មកក្នុងថ្ងៃទី២៣ កក្កដា ឆ្នំា ១៩៨៨ ឧត្តមសេនីយផ្តាច់ការនេ វីនបានលាចុះពីតំណែងដែលជាហេតុបង្កឲ្យមានក្បួនបាតុកម្មទាមទារលទ្ធិប្រជាធិបតេយ្យ។ ក្បួនបាតុកម្មដែលត្រូវបានរបបសឹកវាយបង្រ្កាបយ៉ាងបង្ហូរឈាមដោយបណ្តាលឲ្យស្លាប់បាតុករជាច្រើនពាន់នាក់។ គឺក្នុងឱកាសនោះឯងដែលលោកស្រីអ៊ុង សាស៊ូជីបានចូលប្រឡូកក្នុងឆាកនយោបាយដោយប្រសូត្រចេញគណបក្សសម្ព័ន្ធជាតិដើម្បីលទ្ធិប្រជាធិបតេយ្យ។
មានអាយុ ៤៣ឆ្នំា លោកស្រីអ៊ុង សានស៊ូជីបានចេញមុខតទល់នឹងរបបសឹករហូតដល់ក្រុមឧត្តមសេនីយចាប់ទៅឃុំឃំាងក្នុងគេហដ្ឋានក្នុងថ្ងៃទី២០ កក្កដា ឆ្នំា ១៩៨៩។ នៅក្នុងការបោះឆ្នោតជាតិឆ្នំា ១៩៩០ គណបក្សសម្ព័ន្ធជាតិដើម្បីលទ្ធិប្រជាធិបតេយ្យទទួលបានសម្លេងគំាទ្រដល់ទៅ ៨២% តែរបបសឹកមិនទទួលស្គាល់លទ្ធផល។ គឺនៅពេលនោះហើយដែលឈ្មោះលោកស្រីអ៊ុង សានស៊ូជីផ្តើមល្បីល្បាញលើឆាកអន្តរជាតិរហូតទទួលបានរង្វាន់ជាច្រើន ពិសេសរង្វាន់ណូបែលសន្តិភាពក្នុងឆ្នំា ១៩៩១។ ក្នុងខែកុម្ភៈ ឆ្នំា ១៩៩៤ របបសឹកបានអនុញ្ញាតជាលើកទី១ ឲ្យលោកស្រីអាចទទួលជួបក្រុមគ្រួសារ និងបេសកជនបរទេសនៅក្នុងគេហដ្ឋានដែលលោកស្រីកំពុងជាប់ឃុំ។
ក្នុងខែកញ្ញា ឆ្នំា ១៩៩៤ ប្រមុខរបបសឹកលោកថាន់ ស្វេបានជួបលោកស្រីជាលើកទី១។ ជិត ១ឆ្នំាក្រោយមក ពោលក្នុងខែកក្កដា ឆ្នំា ១៩៩៥ របបសឹកបានដោះលែងលោកស្រី បន្ទាប់ពីបានឃុំអស់រយៈពេល ៦ឆ្នំា។ ក្នុងឆ្នំា ១៩៩៩ ស្វាមីរបស់លោកស្រី គឺលោកមីកាអែល អារីសបានបាត់បង់ជីវិតដោយជម្ងឺមហារីកក្នុងទីក្រុងឡុដ៏ តែលោកស្រីបានបដិសេធមិនចាកចេញពីប្រទេសដោយប្តេជ្ញាបន្តការតស៊ូប្រយុទ្ធដើម្បីសេរីភាព និងលទ្ធិប្រជាធិបតេយ្យដើម្បីប្រជាជនភូមា។ ក្នុងខែកញ្ញា ឆ្នំា ២០០០ របបសឹកបានចាប់លោកស្រីអ៊ុង សានស៊ូជីទៅឃុំក្នុងគេហដ្ឋានជាលើកទី២។ តែត្រូវបានដោះលែងឲ្យមានសេរីភាពក្រោមការតានដាននៅ ២ឆ្នំាក្រោយមក គឺក្នុងឆ្នំា ២០០២។ ក្នុងឆ្នំា ២០០៣ ពោលការប្រទូស្រ្តាយរវាងសកម្មជនរបស់បក្សលោកស្រី និងសមាជិករដ្ឋាភិបាល របបសឹកក៏សម្រេចយកលោកស្រីទៅឃុំជាថ្មី។
ក្នុងខែកញ្ញា ឆ្នំា ២០០៧ ពោលក្នុងការបះបោររបស់ព្រះសង្ឃ គេឃើញលោកស្រីលេចមុខនៅមាត់របងផ្ទះលោកស្រី។ ក៏ដូចជាក្នុងឆ្នំា ១៩៨៨ បាតុកម្មរបស់ព្រះសង្ឃក៏ត្រូវបានទទួលការបង្រ្កាបយ៉ាងហិង្សា។ គេត្រូវរង់ចំាដល់ក្រោយការបោះឆ្នោតឆ្នំា ២០១០ ទើបលោកស្រីអ៊ុង សានស៊ូជីទទួលបានសេរីភាពជាថ្មី។ គឺចាប់ពីពេលនោះឯងដែលរបបសឹកបានផ្តើមធ្វើកំណែទម្រង់ដ៏ភ្ញាក់ផ្អើល រហូតប្រកាសរំលាយរបបសឹកដោយបង្កើតរដ្ឋាភិបាលស៊ីវិលក្នុងឆ្នំា ២០១១។ ឆ្នំា ២០១១ ដែលគណបក្សសម្ព័ន្ធជាតិដើម្បីលទ្ធិប្រជាធិបតេយ្យ និងលោកស្រីអ៊ុង សានស៊ូជីបានផ្តើមចូលប្រឡូកក្នុងឆាកនយោបាយយ៉ាងសកម្ម។
នៅក្នុងការបោះឆ្នោតសភាមួយភាគក្នុងឆ្នំា ២០១២ គណបក្សលោកស្រីទទួលបាន៤០អសនៈនៅក្នុងចំណោម៤៥អសនៈប្រកួតប្រជែង។ រូបលោកស្រីផ្ទាល់ក៏បានចូលអង្គុយកៅអីតំណាងរាស្រ្តជាលើកទី១ នៅក្នុងប្រវត្តិអាជីពនយោបាយរបស់លោកស្រី។ តែមហិច្ចតានយោបាយរបស់លោកស្រីមិនមែនបញ្ចប់ត្រឹមកៅអីតំណាងរាស្រ្តទេ តែគឺកៅអីនាយករដ្ឋមន្រ្តី ឬមួយក៏កៅអីប្រធានាធិបតី។ យ៉ាងណាក៏ដោយចាប់ពីពេលនេះតទៅ និងក្រោមភ្នែកច្រមុះជាតិ អន្តរជាតិ លោកស្រីអ៊ុង សានស៊ូជី ជានិមិត្តរូបនៃសិទ្ធិសេរីភាព និងលទ្ធិប្រជាធិបតេយ្យរបស់ប្រជាជនភូមា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ