ពុទ្ធសាសនិកភូមាប្រកាសធ្វើបាតុកម្មប្រឆាំងការផ្តល់ជំនួយដល់ជនអន្តោប្រវេសន៍
ក្រុមពុទ្ធសាសនិកជ្រុលនិយមនៅភូមាទំនងមិនលះបង់ចោល គំនិតប្រឆាំងនឹងក្រុមជនជាតិអ៊ីស្លាម រ៉ូហ៊ីងយ៉ា។ កាលពីថ្ងៃអាទិត្យ ចលនាពុទ្ធសាសនិក ជាតិនិយមជ្រុល បានប្រកាសពីគម្រោងធ្វើបាតុកម្មប្រឆាំងនឹង ការផ្តល់ជំនួយរបស់រដ្ឋាភិបាលភូមា ទៅឲ្យជនអន្តោប្រវេសន៍ ដែលស្រង់ចេញពីសមុទ្រ និងដែលភាគច្រើនជាជនជាតិរ៉ូហ៊ីងយ៉ា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១២
រដ្ឋរ៉ាគីន ដែលជារដ្ឋដ៏ក្រីក្រជាងគេរបស់ប្រទេសភូមា នៅតែគ្របដណ្តប់ដោយភាពតានតឹង រវាងអ្នកកាន់សាសនាព្រះពុទ្ធ និងក្រុមជនជាតិភាគតិច រ៉ូហ៊ីងយ៉ា ដែលកាន់សាសនាអ៊ីស្លាម។ កាលពីថ្ងៃអាទិត្យ សមាគមក្នុងស្រុកមួយចំនួន នៅក្នុងរដ្ឋរ៉ាគីនបានប្រកាសគម្រោងធ្វើបាតុកម្ម នៅថ្ងៃអាទិត្យសប្តាហ៍ក្រោយ ថ្ងៃទី ១៤ មិថុនា ដើម្បីប្រឆាំងនឹងការជួយទំនុកបំរុងរបស់រដ្ឋាភិបាលទៅលើជនអន្តោប្រវេសន៍ ដែលអាជ្ញាធរភូមាទើបជួយសង្រ្គោះពីក្នុងសមុទ្រ កាលពីសប្តាហ៍មុន។
នៅក្នុងរយៈពេល ២សប្តាហ៍ កងទ័ពជើងទឹកភូមា រកឃើញទូកដឹកជនអន្តោប្រវេសន៍ជាង ៩០០នាក់ ដែលត្រូវក្រុមឈ្មួញបោះបង់ នៅក្នុងសមុទ្រ ក្បែរដែនទឹកភូមា។ បន្ទាប់ពីរារែកអស់ជាច្រើនថ្ងៃ អាជ្ញាធរភូមា បានសម្រេចសណ្តោងទូកដឹកជនអន្តោប្រវេសន៍ ចូលឆ្នេរ ក្នុងរដ្ឋរ៉ាគីន។ បើទោះជាអាជ្ញាធរប្រកាសបញ្ជូនជនអន្តោប្រវេសន៍ ទាំងនោះចេញពីប្រទេសភូមា នៅថ្ងៃខាងមុខ ប៉ុន្តែ វិធានការជួយសង្រ្គោះជនអន្តោប្រវេសន៍ និងយកមកដាក់នៅក្នុងទឹកដីរ៉ាគីន បានបង្កឲ្យក្រុមអ្នកជាតិនិយម ភូមាជាច្រើន ខឹងសម្បារ។ កាលពីថ្ងៃអាទិត្យ ពួកគេបានប្តេជ្ញាប្រមែរប្រមូលមនុស្សនៅទូទាំងរដ្ឋរ៉ាគីន ធ្វើបាតុកម្ម រារាំងកុំឲ្យជនជាតិបង់ក្លាដែស មកពីបង់ក្លាដែស បន្តស្នាក់នៅក្នុងទឹកដីភូមា និងដាក់គំនាបលើរដ្ឋាភិបាលឲ្យបញ្ជូនជនអន្តោប្រវេសន៍ទាំងនោះ ទៅប្រទេសបង់ក្លាដែសវិញ។
ទាំងប្រជាជន និងរដ្ឋាភិបាលភូមា ប្រកាសមិនទទួលស្គាល់ជនជាតិភាគតិចរ៉ូហ៊ីងយ៉ាជាប្រជាជនភូមា ប៉ុន្តែ ជាជនជាតិបង់ក្លាដែស ដែលចូលមករស់នៅខុសច្បាប់ ក្នុងប្រទេសភូមា។ ជនអន្តោប្រវេសន៍ ១៥០នាក់ ក្នុងចំណោម៩០០នាក់ នឹងត្រូវគេបញ្ជូន នៅថ្ងៃ ចន្ទនេះ ទៅបង់ក្លាដែស បន្ទាប់ពីអាជ្ញាធរភូមា និងបង់ក្លាដែសបានយល់ស្របគ្នា ពីដើមកំណើតរបស់ពួកគេ។ ប៉ុន្តែ ជោគវាសនារបស់ជនអន្តោប្រវេសន៍ ជាង ៧០០ ផ្សេងទៀត ដែលត្រូវគេដឹងថា ជាជនជាតិរ៉ូហ៊ីងយ៉ា នៅតែមិនច្បាស់លាស់។ ក្នុងពេលដែលអាជ្ញាធរភូមា និងបង់ក្លាដែស បោះទម្លាក់ ឲ្យគ្នាទៅវិញ ទៅមក ឲ្យទទួលខុសត្រូវ ជនជាតិរ៉ូហ៊ីងយ៉ា កំពុងរស់នៅក្នុងភាពអត្តខ័តនៅក្នុងជំរំក្បែរព្រំដែនបង់ក្លាដែស និងភ័យខ្លាចថា ខ្លួននឹងត្រូវបញ្ជូនទៅរស់នៅក្នុងទឹកដីបង់ក្លាដែស ដែលមិនមែនជាទឹកដីកំណើតរបស់ខ្លួន គឺភូមា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ