ចិនបាញ់បង្ហោះរ៉ុកកែតផ្ទុកផ្កាយរណបប្រភេទថ្មី
នៅថ្ងៃអាទិត្យនេះ ចិនបានបាញ់បង្ហោះប្រកបដោយជោគជ័យនូវរ៉ុកកែតប្រភេទថ្មីរបស់ខ្លួន ដើម្បីទុកប្រើបាញ់បង្ហោះផ្កាយរណប។ នេះបើយោងតាមការចុះផ្សាយរបស់ទីភ្នាក់ងារព័ត៌មានរដ្ឋស៊ីនហួ ដែលបានបញ្ជាក់ថា រ៉ុកកែតប្រភេទថ្មីនេះមានទំហំតូចជាងមុន ទំនើបជាងមុន ព្រមទាំងផ្ទុកផ្កាយរណបបានច្រើនជាងមុន។ ការផលិតរ៉ុកកែតប្រភេទថ្មីនេះ គឺជាផ្នែកមួយនៃយុទ្ធសាស្រ្តរបស់ចិន ដែលកំពុងតែព្យាយាមពង្រីកឥទ្ធិពលរបស់ខ្លួននៅក្នុងវិស័យអវកាស។
ចុះផ្សាយនៅថ្ងៃ៖
ស្តាប់ - ០២:០១
រ៉ុកកែតដែលចិនទើបនឹងផលិតថ្មី ហើយបាញ់បង្ហោះនៅថ្ងៃអាទិត្យនេះ គឺជាប្រភេទរ៉ុកកែត ដែលចិនដាក់ឈ្មោះថា Chang Zheng (ហៅតាមភាសាអង់គ្លេស Long March)។ រូបភាពចាក់ផ្សាយដោយទូរទស្សន៍រដ្ឋចិន (CCTV) បានបង្ហាញឲ្យឃើញនូវរ៉ុកកែតពណ៌ ស ដែលមានរូបទង់ជាតិចិននៅផ្នែកខាងលើ ត្រូវបានគេបាញ់បង្ហោះចេញពីខេត្តប៉ែកខាងជើងប្រទេសចិន ហើយបើយោងតាមទីភ្នាក់ងារព័ត៌មានស៊ីនហួ រ៉ុកកែតនេះផ្ទុកផ្កាយរណបតូចៗរហូតដល់ទៅ ២០គ្រឿង។
បណ្តាញពត៌មានផ្លូវការរបស់ចិនបាននាំគ្នាលើកសរសើររ៉ុកកែតប្រភេទថ្មីនេះថាជាជោគជ័យដ៏ធំមួយក្នុងវិស័យអវកាសចិន ពីព្រោះថា រ៉ុកកែតនេះនៅពេលបាញ់បង្ហោះម្តងៗ អាចផ្ទុកផ្កាយរណបបានច្រើនបំផុតដែលចិនមិនធ្លាប់ធ្វើបាន ហើយម្យ៉ាងទៀត រ៉ុកកែតថ្មីនេះក៏ប្រើប្រេងឥន្ធនៈដែលបំពុលបរិយាកាសតិចជាងមុនផងដែរ។
គួររំឭកឡើងវិញថា កាលពីឆ្នាំ២០១១ រដ្ឋាភិបាលចិនធ្លាប់បានចេញផ្សាយនូវរបាយការណ៍មួយទាក់ទងនឹងនយោបាយអវកាសរបស់ខ្លួន ដោយបានបញ្ជាក់ថា រ៉ុកកែតធុន Long March-6 នេះ មានសមត្ថភាពដឹកទម្ងន់រហូតដល់ទៅមួយតោន ហើយបាញ់បង្ហោះទៅដាក់ក្នុងតារាវិថីជុំវិញផែនដី ក្នុងរយៈកម្អស់រហូតដល់ទៅ ៧០០គីឡូម៉ែត្រ។
កាលពីដើមខែកញ្ញាថ្មីៗនេះទៀត ក្រុមអ្នកវិទ្យាសាស្រ្តចិនក៏ធ្លាប់បានអះអាងឲ្យដឹងផងដែរថា ចិនមានគម្រោងបញ្ជូនយានគ្មានមនុស្សបើកឲ្យទៅចុះចតនៅលើព្រះចន្ទសាជាថ្មីម្តងទៀត នៅយ៉ាងយូរបំផុតត្រឹមឆ្នាំ២០២០ខាងមុខ ក្រោយពីបានធ្វើការចុះចតយានលើព្រះចន្ទប្រកបដោយជោគជ័យជាលើកទីមួយ កាលពីឆ្នាំ២០១៣កន្លងទៅ។
រ៉ុកកែតប្រភេទថ្មីដែលចិនទើបនឹងបាញ់បង្ហោះជាលើកដំបូងនៅថ្ងៃអាទិត្យនេះ ក្រៅពីអាចជួយជំរុញគម្រោងចុះចតលើព្រះចន្ទ ក៏អាចនឹងបង្កើនសមត្ថភាពរបស់ចិនក្នុងការបាញ់បង្ហោះផ្កាយរណបផងដែរ ដែលជាជំហានដ៏សំខាន់មួយ នៅក្នុងពេលដែលទីផ្សារផ្កាយរណបនៅទូទាំងពិភពលោកកំពុងតែកើនឡើងខ្លាំង។ ក្រៅពីអាចបាញ់បង្ហោះផ្កាយរណបខ្លួនឯង សម្រាប់ប្រើប្រាស់ក្នុងវិស័យយោធានិងស៊ីវិល ចិនអាចប្រជែងជាមួយប្រទេសមហាអំណាចផ្សេងទៀត ក្នុងការស៊ីឈ្នួលបាញ់បង្ហោះផ្កាយរណបរបស់ប្រទេសដទៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ