កូនយាន Philae ចុះចតដោយជោគជ័យលើផ្កាយដុះកន្ទុយ "ជូរី"
កូនយានឈ្មោះ Philae របស់ទីភ្នាក់ងារអវកាសអឺរ៉ុប បានចុះចតដោយជោគជ័យលើផ្កាយដុះកន្ទុយឈ្មោះ “ជូរី” កាលពីល្ងាចថ្ងៃពុធ ហើយនៅថ្ងៃព្រហស្បតិ៍នេះ កូនយានគ្មានមនុស្សបើកនេះបានផ្តល់ទិន្នន័យតាមវិទ្យុទាក់ទងមកកាន់ភពផែនដីជាធម្មតា។ ក៏ប៉ុន្តែ បញ្ហាចម្បងមួយ ដែលកំពុងតែធ្វើឲ្យគេព្រួយបារម្ភ គឺគេមិនដឹងថា តើជើងទ្ររបស់យាននេះត្រូវបានដោតភ្ជាប់មាំទាំទៅនឹងផ្កាយដុះកន្ទុយដែរឬក៏យ៉ាងណា?
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៨
នៅក្នុងបន្ទប់បញ្ជាការហោះហើរ នៃទីភ្នាក់ងារអវកាសអឺរ៉ុប ដែលមានទីតាំងនៅក្នុងប្រទេសអាល្លឺម៉ង់ ការទះដៃ និងហ៊ោកញ្ជ្រៀវបានផ្ទុះឡើង កាលពីល្ងាចថ្ងៃពុធ ក្រោយពីគេទទួលដំណឹងថា កូនយាន Philae បានចុះចតប្រកបដោយជោគជ័យលើផ្កាយដុះកន្ទុយ “ជូរី”។
“គ្រប់គ្នាមានក្តីរំភើប សប្បាយរីករាយ ហើយខ្លះក៏ស្រក់ទឹកភ្នែកដោយអំណរ ហើយគ្រប់គ្នាហាក់ដូចជាមិនទាន់ជឿខ្លួនឯងថាយើងពិតជាអាចធ្វើការនេះបានជោគជ័យ” នេះគឺជាការថ្លែងរបស់លោក Paulo Ferri អ្នកទទួលខុសត្រូវបេសកកម្មបញ្ជូនយានទៅផ្កាយដុះកន្ទុយនេះ។ ក៏ប៉ុន្តែ លោក Paulo Ferri ក៏បានបញ្ជាក់ផងដែរថា សហការីរបស់លោកមិនមានពេលច្រើន ដើម្បីអរសប្បាយពីហេតុការណ៍ជាប្រវត្តិសាស្រ្តនេះទេ ដោយត្រូវនាំគ្នាដុតដៃដុតជើងដោះស្រាយភាពមិនប្រក្រតីមួយចំនួនដែលគេសង្កេតឃើញ។
ជាការពិត អ្វីដែលធ្វើឲ្យគេបារម្ភខ្លាំងជាងគេ គឺភាពមិនប្រក្រតី នៃជើងទម្ររបស់យាន ដែលទំនងជាមិនបានដោតជាប់ក្នុងដីផ្កាយដុះកន្ទុយ ហើយដែលអាចនឹងធ្វើឲ្យយាន Philae មិនមានលំនឹង។
នៅព្រឹកថ្ងៃព្រហស្បតិ៍នេះ ប្រធានមជ្ឈមណ្ឌលអវកាសរបស់បារាំង ដែលជាផ្នែកមួយនៃទីភ្នាក់ងារអវកាសអឺរ៉ុប បានឲ្យដឹងថា គេនៅមិនទាន់ដឹងច្បាស់នៅឡើយទេ អំពីបញ្ហាជើងទម្ររបស់យាន ក៏ប៉ុន្តែ យ៉ាងហោចណាស់គេអាចដឹងប្រាកដថា យាន Philae កំពុងស្ថិតនៅលើផ្កាយដុះកន្ទុយ “ជូរី” កញ្ចក់ស្រូបថាមពលពីពន្លឺព្រះអាទិត្យក៏មានដំណើរការល្អ ហើយប្រព័ន្ធវិទ្យុទាក់ទងរវាងយាន Philae និងភពផែនដីក៏មានដំណើរការជាធម្មតា ដែលអាចឲ្យអ្នកវិទ្យាសាស្រ្តនៅទីភ្នាក់ងារអវកាសអឺរ៉ុបទទួលបានទិន្នន័យជាប់ជាប្រចាំពី Philae។
ប្រសិនបើអ្វីៗដំណើរការទៅជាធម្មតា យាន Philae នឹងចំណាយពេលរាប់ខែ ដើម្បីថតរូបភាពនៃសណ្ឋានដីរបស់ផ្កាយដុះកន្ទុយ ព្រមទាំងសិក្សាមើលអំពីរចនាសម្ព័ន្ធ និងធាតុផ្សំគីមីរបស់ផ្កាយដុះកន្ទុយ។ លទ្ធផលនៃការសិក្សានេះអាចនឹងជួយឲ្យអ្នកវិទ្យាសាស្រ្តដឹងកាន់តែច្បាស់ អំពីដើមកំណើតនៃប្រព័ន្ធព្រះអាទិត្យ និងជាពិសេស អំពីភពផែនដី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ