មេដឹកនាំបក្សកុម្មុយនិស្តចិនប្រជុំគ្នាក្នុងពេលកំពុងជួបបញ្ហាសេដ្ឋកិច្ច
ថ្នាក់ដឹកនាំបក្សកុម្មុយនិស្តចិនបានបើកកិច្ចប្រជុំនៅថ្ងៃចន្ទនេះ ដើម្បីជជែកគ្នា អំពីផែនការយុទ្ធសាស្រ្ត សម្រាប់រយៈពេល ៥ឆ្នាំខាងមុខ។ កិច្ចប្រជុំរយៈពេលបួនថ្ងៃនេះធ្វើឡើង នៅចំពេលដែលចិនកំពុងតែឆ្លងកាត់បញ្ហាសេដ្ឋកិច្ចដ៏គួរឲ្យព្រួយបារម្ភ។
ចុះផ្សាយនៅថ្ងៃ៖
ស្តាប់ - ០៥:៤២
កិច្ចប្រជុំគណៈមជ្ឈិមបក្ស ដើម្បីកំណត់ផែនការ ៥ឆ្នាំ គឺជាទម្លាប់ដែលបក្សកុម្មុយនិស្តចិនតែងតែធ្វើ តាំងពីពេលបានឡើងកាន់អំណាច កាលពីឆ្នាំ១៩៤៩។ ផែនការ ៥ឆ្នាំ (២០១៦-២០២០) ដែលគណៈមជ្ឈិមបក្សចិន កំពុងប្រជុំជជែកគ្នានៅពេលនេះ គឺជាផែនការ ៥ឆ្នាំ លើកទី១៣។
យោងតាមប្រព័ន្ធផ្សព្វផ្សាយផ្លូវការរបស់ចិន នៅក្នុងកិច្ចប្រជុំបិទទ្វារ ពីថ្ងៃចន្ទទី២៦តុលា ដល់ថ្ងៃព្រហស្បតិ៍ទី២៩តុលា គណៈមជ្ឈិមបក្សចិននឹងជជែកគ្នាអំពីបញ្ហាជាយុទ្ធសាស្រ្តមួយចំនួន រួមមាន កំណើនសេដ្ឋកិច្ច កំណែទម្រង់ហិរញ្ញវត្ថុ បញ្ហាបរិស្ថាន និងកំណែទម្រង់គោលនយោបាយគ្រប់គ្រងប្រជាសាស្រ្ត (នយោបាយ “គ្រួសារមួយកូនមួយ”)។
ក៏ប៉ុន្តែ បើគេពិនិត្យមើលទៅលើស្ថានភាពសេដ្ឋកិច្ចចិនបច្ចុប្បន្ន បញ្ហាធំ និងបន្ទាន់ជាងគេ គឺប្រាកដជាបញ្ហាសេដ្ឋកិច្ច ពីព្រោះថា កំណើនសេដ្ឋកិច្ចចិនកំពុងតែធ្លាក់ចុះខ្លាំង គឺធ្លាក់ចុះរហូតដល់ក្រោម ៧% ដែលជាគោលដៅដាក់ចេញដោយរដ្ឋាភិបាលចិន កាលពីដើមឆ្នាំ។
មន្រ្តីរដ្ឋាភិបាលចិនបានឲ្យដឹងថា លោកនាយករដ្ឋមន្រ្តីចិន លី ខឺឈាំង ទើបនឹងបានលើកឡើង កាលពីចុងសប្តាហ៍កន្លងទៅនេះថា រដ្ឋាភិបាលរបស់លោកមិនកំណត់ថាត្រូវតែសម្រេចឲ្យបាននូវអត្រាកំណើនសេដ្ឋកិច្ច ៧% ដោយខានមិនបានទេ។ ក៏ប៉ុន្តែ នៅចាំបានថា កាលពីដើមឆ្នាំ លោកលី ខឺឈាំង ខ្លួនឯងផ្ទាល់ក៏ធ្លាប់បានលើកឡើងដែរថា ចិនត្រូវការជាចាំបាច់នូវអត្រាកំណើនសេដ្ឋកិច្ចយ៉ាងតិច ៧% ក្នុងមួយឆ្នាំ ដើម្បីបង្កើតការងារដល់ប្រជាជន ហើយបញ្ចៀសវិបត្តិសង្គម។
បញ្ហាបរិស្ថានក៏ជាប្រធានបទដ៏សំខាន់ ដែលគេកំពុងតែតាមឃ្លាំមើលច្រើនដែរ ពីព្រោះថា ចិនជាប្រទេសដែលបញ្ចេញឧស្ម័នកាបូនិកច្រើនជាងគេលំដាប់ទី២បន្ទាប់ពីអាមេរិក ដូច្នេះ នយោបាយបរិស្ថានរបស់ចិនមានឥទ្ធិពលខ្លាំងទៅលើការចរចាស្តីពីការប្រយុទ្ធប្រឆាំងនឹងការប្រែប្រួលអាកាសធាតុ។
គួរបញ្ជាក់ថា កន្លងមក គេនាំគ្នារិះគន់ចិនថា បានផ្តោតអាទិភាពតែទៅលើកំណើនសេដ្ឋកិច្ចរបស់ខ្លួនដោយមិនគិតគូរពីបរិស្ថាន។ ប៉ុន្តែ មួយរយៈកាលចុងក្រោយនេះ រដ្ឋាភិបាលរបស់លោកស៊ី ជីនពីង ហាក់ដូចជាបានបង្ហាញជំហរវិជ្ជមានច្រើន ទាក់ទងនឹងការកាត់បន្ថយការបញ្ចេញឧស្ម័នកាបូនិក។ អ្នកខ្លះបារម្ភថា ការធ្លាក់ចុះនៃអត្រាកំណើនសេដ្ឋកិច្ចនៅពេលនេះ អាចនឹងធ្វើឲ្យមេដឹកនាំចិនទុកបញ្ហាបរិស្ថានចោលមួយអន្លើសិន ហើយទៅផ្តោតអាទិភាពតែទៅលើកំណើនសេដ្ឋកិច្ច ដូចកាលពីមុន។
ក៏ប៉ុន្តែ បច្ចុប្បន្ននេះ បញ្ហាបរិស្ថានក៏កំពុងតែក្លាយជាបញ្ហាសង្គមមួយសំខាន់ មិនខុសពីបញ្ហាសេដ្ឋកិច្ចប៉ុន្មានទេ សម្រាប់ចិន។ ផ្សែងដែលចេញពីសកម្មភាពឧស្សាហកម្ម និងវិស័យដឹកជញ្ជូនរបស់ចិន មិនមែនត្រឹមតែបង្កឲ្យផែនដីឡើងកម្តៅ នៅក្នុងរយៈពេលវែងខាងមុខប៉ុណ្ណោះទេ តែវាបង្កឲ្យមានបញ្ហាបំពុលបរិយាកាសនៅក្នុងពេលបច្ចុប្បន្ន ហើយដែលកំពុងតែធ្វើឲ្យប្រជាជននៅតាមទីក្រុងមិនសប្បាយចិត្ត។
មែនទែនទៅ បញ្ហាផ្សែងពុលនេះហើយដែលជាកត្តាដ៏សំខាន់មួយ ជំរុញឲ្យមេដឹកនាំចិនចាប់ផ្តើមងាកមកគិតគូររឿងបរិស្ថាន នៅក្នុងមួយរយៈកាលចុងក្រោយនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ